مھکمیں ورنا
( شھید پدائی جمال شاد پنام کمبر مھروان )
راجی جنز ھم وھد پہ وھد ءَ تیز بوگ ءَ اَت زورگریں لشکر ءَ ھم وتی زوراکی تیز کناں کرت اَنت، آ ھمے سرپد اَت کہ من وتی زوراکیاں تیز کن آں گڑا اے جھدکار ترس آماچ بہ اَنت ءُ چہ وتی راجی جھد ءَ دز کش بہ اَنت۔ بلے چہ راجی گْوستانکاں نابلدیں دژمن اے گپ ءَ زانگ ءَ نہ اَت کہ راجی جنگول چہ اے وڑیں زوراکیاں نزور نہ بہ اَنت، بلکیں گام پہ گام ءَ گیشتر مھکم بوان بہ اَنت۔
چوناھا اے ھاک ءِ اشک ءُ پگری ھمبلانی مھر ءِ راہ ءَ جھدکارانی روچ ءُ شپ انچوش گوزان بہ اَنت، مردم ءَ را سما نہ کپ ایت کہ اے ماہ ءُ سال چون گوزگ ءَ اَنت۔ ھمے وڑ ءَ وھد گوں تیز گامی ءَ جزاں اَت کہ 2015 بوت۔ اے وھد پہ آجوئی لوٹوکیں نشانیں ھمبلاں شھرانی تہ ءَ سیاست کنگ ءَ ھم شر نہ اَت، شھید جمال شاد بی ایس او آزاد ءِ باسکے اَت آئی ءَ مار اِت کہ من نودربری سیاست کرت نہ کن آں من ءَ نوں چد ءُ گیش مھکمیں پیسھلے زورگ لوٹ ایت۔
سال 2015 ءَ شھید پدائی جمال شاد وھدے چہ بی ایس او آزاد ءَ گیش اِت گڑا آئی ءَ پہ وتی راجی جز ءِ برجاہ دارگ ءَ بلوچ آجوئی لوٹوکیں سلاہ بندیں گل بلوچستان آجوئی سنگر ( بی ایل ایپ ) ءَ بھر زرت ءُ سلاہ بندیں جھد بندات کرت۔
اے وَ پروش وارتگیں پاکستانی لشکر ءِ کار اِنت کہ آ گوں بلوچ راجی جنگولیں پسگاں دیم پہ دیمی ءَ جنگ داتگ نہ کنت بلکیں گوں دست ءُ گوشیں مردماں زوراکی کنت۔ گیشتر جھدکارانی کھولاں زوراکیانی نشانگ کنان کنت۔ دژمن ھمے سرپد بوت کہ جمال شاد انگت کسان اِنت من آئی ءِ کھول ءَ زوراکی ءِ نشانگ کن آں، بوت کنت کہ آ نزور بہ بیت ءُ وتی سلاھاں چگل بہ دنت۔
6 جنوری 2016 ءَ زورگریں پاکستانی لشکر ءَ کوھڑو ءَ آیانی ڈگارانی سر ءَ بیڑ برت ءُ شھید جمال شاد ءِ پس ’مجید ء سبزل‘ ءَ آوار جت ءُ بیگواہ کرت۔ اے درگت ءَ ھندی مردمانی گپ ھمیش اَت کہ پاکستانی لشکر ءِ گْوشگ اِنت کہ من مجید ءَ ھما وھد ءَ یل کن آں کہ آئی ءِ بچ جمال توپک ءَ ایر بہ کنت ءُ بیئت۔ اگاں جمال ءَ سرمتابی کرت ءُ نے اتک گڑا آئی ءِ پس چوناھا مئے دست ءَ اِنت کش ان ءُ لاش ءَ ئِے چگل دے ایں ءُ آئی ءِ کھول ءِ دگہ مردماں ھم بیگواہ کن ایں۔
چوش کہ جمال شاد وتی ماس ءُ پس ءِ مستریں زھگ اَت چہ پس ءِ بیگواھی ءَ پد گس ءُ کھول ءِ زمہ واری ھمائی ءِ کوپگاں بوت اَنت بلے آ ھچ وڑ ءَ گمیگ نہ اَت ءُ پہ پھر ءُ شان ھمے گوشگ ءَ اَت ’’ منی جھد ءَ رنگ آورتگ ءُ دُژمن منی جھد ءِ دیم ءَ نزور ترگ اتگ کہ آ منی کھول ءَ نشانگ کنگ ءَ اِنت۔‘‘
آئی ءِ گْوشگ اَت من درسیں گپ چہ جھد ءَ پیش زانتگ اَنت کہ منی جھد ءِ آسر ءَ پہ من ھچ پشت نہ کپ ایت ءُ اے لگوریں دُژمن پہ زوراکی ءَ وتی گڈی زور ءَ جنت۔ من انچوکیں پندے بر اتگ ءُ منی ھمپگریں اینکس ھمبل شھید بوتگ اَنت من نوں چہ اے وڑیں چیزاں سرگْوستگ آں، لگوریں دُژمن پہ منی نزور کنگ ءَ ھرچی کہ کرت کنت بہ کنت۔ من ھم پہ وتی ماتیں سرڈگار ءِ رکینگ ءَ چونیں گامے چست کرت دُژمن ئِے وت گند ایت۔
داں ماھے ءَ زورگریں پاکستانی لشکر ءَ آئی ءِ پس مجید چیریں آزار جاہ ءَ بندیگ کرت ءُ آزار دات۔ بلے اے میان ءَ جمال شاد ءِ توکل چوش کوہ ءَ مھکم اَت ، نزور بوگ ءِجاہ ءَ آ گیشتر گوں مھکمی ءَ جھد کنگ ءَ اَت۔ ماھے ءَ پد پاکستانی لشکر ءَ شھید ءِ پس یل دات۔
( روان اِنت )
