پرز شناسیں ورنا

پرز شناسیں ورنا

( شھید کینگی سلیمان)

گْوش اَنت کہ ’’ آشوبی جھدکارے ءَ چہ وتی کھول ءُ آدگہ مردمانی دیمونیانی پشت ءَ نامداری ءُ مزنی ءِ واھگ مہ بیت بلکیں وتی جند ءِ کردار ءَ جھان ءِ دیم ءَ بہ یار ایت۔‘‘ کسان سالیں شھید کینگی جان ءَ ھمے گپ راست کرت ءُ مارا پیش دات۔

شھید کینگی پنام مسلم، بلوچ راجی راھشون ڈاکٹر اللہ نزر ءِ گْوھار زتک شھید کماندار سلیمان پنام شھیک جان ءِ بچ اَت ءُ شھید مسلم ءُ شھید زاکرجان ءِ بزازتک اَت۔ شھید کینگی ءِ پس شھید سلیمان ءِ ناکو ماسٹر سپر ھان ءُ الی نواز ھم شھید بوتگ اَنت۔ چوناھا شھید کینگی ءِ کھول ءِ مردم ءُ آدگہ سیاد کہ شھید بوتگ اَنت سک باز اَنت ءُ دھانی ھساب ءَ اَنت۔ چہ راجی شھیدیاں ابید دگہ سکا باز مردم بلوچ راجی آجوئی جز ءَ ھوار اِنت۔

شھید کینگی انچیں کھولے ءِ بچ اَت کہ اے کھول ءِ دیمونی راجی جز ءِ پڑ ءَ سکا باز اَنت۔ یک ھسابے ءَ بلوچ راجی راھشون ڈاکٹر اللہ نزر ءِ نواسگ بیت ءُ شھید کماندار سلیمان پنام شھیک جان ءِ بچ اَت، آئی ءِ دیم ءَ وتی کھول ءِ دیمونی ھم بیتگ اَنت بلے آئی ءِ دل ءُ ھیال گوں وتی پرز ءِ پیلو کنگ ءَ گیشتر اَت۔

اے منی وش بھتی اِنت کہ من شھید کینگی جان ءُ آئی ءِ پس شھید سلیمان پنام شیھک جان ءُ آئی ءِ شھیدیں ناکو ءُ آدگہ بازیں شھیدانی ھواری ءَ بلوچ راجی راھشون واجہ ڈاکٹر اللہ نزر ءُ آئی ءِ نزیکیں سیاد ءُ آ دگہ بلوچ راجی جھدکار گوں وتی چماں دیستگ اَنت ءُ گوں آیاں ھم نیاد بوتگ آں۔

شھید کینگی جان آئی ءِ نزیکیں مردماں گیشتر کیم جان ءِ نام ءَ توار کرتگ اَت، پمیشکا من ھم برے برے آ کیم جان گوشتگ ءُ توار کرتگ۔ منی گندگ ءَ آ سکا بے تواریں ورنایے اَت۔

شھید کینگی جان ءَ گوں من ءَ واٹساپ ءَ ھم ھال ءُ اھوال کرتگ اَت، آئی ءَ من ءَ دو سے رند ءَ گوشتگ من ءَ زرمبش ءَ ھم کار بہ گر من گوں شما کار کنگ ءَ آں، دانکہ من گوں شما کمک بہ بہ آن ءُ من ھم چیزے در بہ بر آں۔

من یک رندے جست کرت ’’ پل! تو زْرمبش ءِ تہ ءَ کجام زبان ءَ کار کنگ لوٹ ئے ، ھال شر کرت کن ئے؟ ‘‘

گْوشت ئِے ’’ من کم کمو براھوئی زان آں بلے من ءَ گیشتر اکس ءُ ویڈیو ءِ شر کنگ ءِ شوک ھست۔ ھمے کہ سنگت نبشتانکانی اکساں شر کن اَنت یا ھمے نبشتانک ءُ شئیرانی ویڈیواں جوڑ کن اَنت۔‘‘

شھید کینگی جان امر ءَ کسان اَت بلے آئی ءِ زانت ءُ سما سکا مزن اَت ءُ پَرز شناسیں ورنایے اَت، آئی ءِ مدام دل ءُ ھیال گوں راجی جز ءُ ادارھانی مھکمی ءُ وتی پرز ءِ پیلو کنگ ءَ اَت۔

درمیان ءَ منی ءُ آئی ءِ ھال ءُ اھوال مھتل بوت، یک روچے من ءَ پہ شھید کینگی ءَ کارے کپتگ اَت ، من آئی ءِ نمبر چار اِت کہ آئی ءِ نمبر بند اَت۔ من سنگتے ءَ جست گپت ’’ کیم جان ءِ نمبر بند اِنت ، آئی ءَ وتی نمبر مٹ کرتگ ءُ من ءَ دیگ ءَ بے ھال بوتگ تو من ءَ آئی نمبر ءَ بہ دے۔‘‘

سنگت ءَ کند اِت ءُ گْوشت ’’ کیم جان چوشیں بچے نہ اِنت آ وتی نمبر ءَ مٹ بہ کنت ءُ سنگتاں مہ دنت، بلے آ سپرے ءَ اِنت پمیشکا آئی ءِ نمبر بند اِنت۔‘‘

من گْوشت ’’ شر اِنت پاکیں ھاوند آئی ءِ سپر ءَ وش بہ کنت۔‘‘

من ءَ 29 نومبر 2023 ءَ سنگتے ءَ ھال کرت کہ سولیر، تنک کور ءُ مشکے ءِ روکپتی کوھاں پاکستانی لشکر ءِ ھیلی کاپٹر ءُ ڈرون تر ءُ گرد کنگ ءَ اَنت، اے بارو ءَ ھالے شنگ کن اِت۔ 30 دسمبر ءَ پد ءَ من ءَ سنگتے ءَ ھال کرت کہ ’’ مشکے ءِ روکپتی کوھاں ھیلی کاپٹر ءُ ڈرون تر ءُ گرد کنگ ءَ اَنت، ٹوھیں توار ھم اش کنگ بوتگ ھمے گمان کنگ بیت کہ ڈرون اُرشے بوتگ۔‘‘

ھمے توارانی بارو ءَ مئے جست ءُ پرس برجاہ اَت کہ مارا ھمے بدیں ھال سربوت کہ ’’ سرور پنام دُرک گوں دگہ چار ھمبل آزم پنام باسد، اَبدلستار پنام مھراج، کینگی پنام مسلم ءُ الی پنام اتا شھید بوتگ اَنت۔‘‘