19 پروری 2014 ءِ بامگواہ ءَ زورگریں پاکستانی لشکر ءَ جاہ ء آھو ( جاھو) ملائی گزی ءَ گوں مزنیں کچے ءَ بیڑ برت پہ زمینی لشکر ءِ کمک ءَ ھیلی کاپٹراں تر ءُ گرد ءِ ھواری ءَ تیرگواری کرت۔ پاکستانی لشکر ءَ زوراکی کنان ءَ پنچ دست ءُ گوشیں مردم ملا نور جان، تاج مھمد، سالونک نواز، تالب ءُ گلام جان شھید کرت اَنت۔ بی این ایم ءِ کلانھیں باسک ، بلوچی زبان ءِ شائر ءُ اھوالکار ھاسل ھان ھسرت ءَ ھوار نزیک ء پنجاہ مردم آوار جت ءُ بیگواہ کرت، ( آدگہ درست یل کنگ بوتگ اَنت ھاسل ھسرت ءُ دولت ھان انگت بیگواہ اَنت) ۔
پاکستانی لشکر ءِ اے زوراکی ءَ پد دگہ نوکیں ترسے ءَ ردوم زرت۔ جاہ ء آھو ءَ بازیں میتگانی مردم وتی گس ءُ جاھانی یل کنگ ءَ لاچار بوت اَنت۔ مدام مردمانی دپ ءَ ھمے گپ اَت کہ پاکستانی لشکر ءَ اے رندی انگت ءَ انچو زوراکی نہ کرتگ اگاں نوں بیت گڑا تباھی کنت۔ چہ اے لشکر کشی ءَ پد بازیں میتگانی مردماں وتی گِس ءُ جاگاہ یل دات اَنت ءُ لڈ ءُ بار اش کرت۔
اے میان ءَ جاہ ء آھو ءَ ٹیلی پون ءِ ھچ آسراتی نیست اَت، بس واجہ ءِ باگ ءَ پی ٹی سی ایل ءُ برز ءَ جاھے جاھے ءَ لوپ ( PTCL ) کار کنگ ءَ اَت، آئی ءِ نیٹورک نزو اَت ءُ روگ ءُ آھگ ءَ اَت۔ اگاں پاکستانی لشکر چہ تھسیل کیمپ ءِ بنجل ءَ در بہ کپتیں دانکہ برزا کوھڑو ءُ آدگہ جاھاں بہ اتکیں کس سرپد نہ بوتگ اَت۔
لشکر ءِ اے زوراکی ءَ پد ھما مردم کہ لیکھی جھدکار نہ اَت اَنت ، پہ شوک ءَ ھوار کپتگیں جھدکارانی پاداں لرزگ بنا کرت۔ بازیں ھمبلاں ، بی ایس او آزاد ءِ ورنا ءُ بی این ایم ءِ کماشاں وت ءَ چہ آجوئی جھد ءَ یک کر کنان کرت۔ بلے ھاک ءِ شیدا ءُ لیکھی ھمبلانی ھمت چو کوہ ءَ مھکم اَت۔
دُژمن ءِ زوارکی ءَ پد اے ترس ءِ پژدر ءَ شھید کمبر مھروان ءِ ٹھک ءُ کار دوئیں یکشل ءَ برجاہ اَت اَنت ، آئی ءِ مدام گپ ھمیش اَت اے جاور چہ مئے لوٹ ءُ واھگانی پد ءَ ودی بوتگ اَنت ءُ نوں مارا گوں اے جاوراں دیم پہ دیمی کنگی اِنت۔ بلوچ ءِ سرمچاریں بچاں وتی ارش ءُ کارروائی ترند کرتگ اَنت ءُ سیاسی سنگتاں وتی سیاسی پروگرام برجاہ داشتگ اَنت۔
بیگاھے ءَ چہ بی ایس او آزاد ءِ سنگتاں شھید پدائی جمال شاد ءُ سنگت ھلیل مئے میتگ ڈولیجی ءَ آتک اَنت کہ آیانی لھتے سنگت چہ آواران ءَ پیداک اَت۔ آیاں گوں من ءَ ھمے شور کرت کہ مئے سنگت پیداک اَنت آیاں باز اسپرے رنگ گون اِنت تو بہ یا ما ءُ شما ھوار بی ایس او ءُ بی این ایم ءِ نیمگ ءَ دیوال نبیسی ( چاکینگ ) کن ایں۔ من گْوشت کہ شر اِنت دو سنگت شما اِت من دگہ سنگتے زوران ءُ رو ایں۔
چہ آواران ءِ نیمگ ءَ آھوکیں سنگتاں ھم دیر کرت ءُ مگرب ءَ پد سر بوت اَنت ما سنگت چاہ ءُ نان دات اَنت ءُ سنگتے ءِ کر ءَ واپینت اَنت ءُ دیم پہ وتی کار ءَ درکپت ایں۔
اے وھد ءَ پاکستانی لشکر ءَ ابید آئی ءِ جوڑ کرتگیں ناشرکاریں گل ھدود اللہ ءِ ترس ھست اَت، آ شپاں ترءُ گرد کنگ ءُ دیوال نبیسی کنگ ءَ اَت اَنت۔ بلے مئے سنگتانی ھمت چو کوہ ءَ مھکم اَت۔ سنگتانی سلاہ ھمے بوت چہ لال بازار ءَ جھل ءُ تھسیل کیمپ ءَ پاکستانی لشکر ءِ بنجل ءَ کمیں بزر وتی کار ءَ بندات کن ایں۔
ما چہ سنگتانی شورانی بنیاد ءَ وتی کار بندات کرت اَنت، مئے آدگہ دوئیں سنگت موٹر سائیکلاں ھلائینگ ءَ اَت اَنت من ءُ جمال شاد ھمے دگ ءِ پھنات ءَ دیوالاں نبیسگ ءَ اَت ایں۔ گپ ایش اِنت کہ اے ناگیگیں جاورانی تہ ءَ دست ھالیگیں مردم ءُ یکشل ءَ درسیں دکان ءُ دیوالانی سر ءَ نبشتہ کنان ءُ روان اَت ایں۔
اے وڑیں ناگیگیں جاوراں اے داب ءَ کار کنگ ءَ شھید جمال شاد ءِ پیمیں مھکمیں ورنایانی ھمت ءُ دلبڈی گون اَت۔ شھید جمال شاد مئے سپر ءِ براہ اَت تیوگیں راہ ءَ گپ کنگ ءُ مارا کندینگ ءَ اَت۔ ما شپ ءِ نو ءَ وتی کار بندات کرت دانکہ بامگواہ بوت۔
لال بازار ءُ کورک نزیک ء پنجاہ کلومیٹر اَنت، کار ءِ بندات ءَ پیش مئے شور ھمیش اَت کہ ماکجام جاہ ءَ دمبرت دیوال نبیسی ءَ بس کن این ءُ دگہ شپے ءَ پد ءَ کار کن ایں بلے شھید جمال شاد ءِ وڑیں وژدل ءُ مھروانیں ھمبل مئے ھمراہ اَت ما نہ زانت کہ مئے سپر ءُ شپ چون آسر بوت اَنت۔
وھدے کہ ما کورک ءَ سر بوت ایں مسیت ءِ ملا ءَ سھب ءِ بانگ دات ءُ مئے رنگ ھم ھلاس بوت اَنت۔ ما کورک ءَ سنگتے ءِ گس ءَ شت ایں ، دم کش اِت ءُ سھب ءِ چاہ تیار بوت۔ مئے تیوگیں پند ءُ شپ کمبر مھروان ءَ گوں وتی مھروانی ءَ آسر کرت اَنت۔
( روان اِنت )
