مھکمیں ورنا | بنداتی بھر

( شھید پدائی جمال شاد پنام کمبر مھروان)

جاھے کہ زرمبشت بندات بہ اَنت گڑا آ اود ءَ مردم بازیں کچے ءَ زْرمبشت ءَ ھوار بہ اَنت۔ گیشتریں مردم ھما بہ اَنت کہ جزبات ءِ بنیاد ءَ پیلسہ زور اَنت ءُ ھوار کپ اَنت، زانشت ءِ بنیاد ءَ ھوار بوتگیں مردم باز کم بہ اَننت، بلے آ وتی جھد ءَ یکشل ءَ برجاہ دار اَنت۔ اے وڑیں مچیانی تہ ءَ ھمک تب ءِ مردم ھوار بیت، لھتے ایوک وت ءَ پیش دارگ لوٹ ایت ءُ لھتے مردم پہ وتی نپاں ھوار بیت، بلے آشوب چو دریا ءِ وڑ ءَ اِنت وتی تہ ءَ گند ءُ گسڑاں نہ ھل ایت ءُ آیاں پھنات ءَ کشاں کنت۔

آشوب ءِ تہ ءَ تھنا ھما مردم ابدمان بہ اَنت کہ آ سگ ءُ اوپار کنوک، دور چاروک، لیکھی ءُ کار کنوکیں مردم، جوانیں کردانی واھبند بہ اَنت۔ اے درستیں درور مئے بلوچ راجی جز ءِ تہ ءَ ھست اَنت ءُ انگت ءَ بوگ ءَ اَنت۔ چہ ھما ابدمانیں سراں یکے شھید پدائی جمال شاد پنام کمبر مھروان اِنت۔

چوناھا منی ءُ شھید جمال شاد ءِ میتگ سک نزیک اَنت بلے من شھید ھما وھد ءَ زانتگ کہ من بی این ایم ءُ آ بی ایس او آزاد ءِ باسکے بوتگ۔ منی ءُ آئی ءِ سیاسی سپر یکجاہ ءَ بندات بوتگ 2009 ءَ آ بی ایس او آزاد ءُ من بی این ایم ءَ ھوار بوتگ آں۔ بلے آ وھد ءَ شھید جمال شاد باز کسان اَت۔

آ وھد ءَ کہ بلوچ راجی زْرمبشت سکا پر زور اَت مئے ھند ءَ سکا باز ھمبل بی ایس او آزاد ءُ بی این ایم ءَ ھوار اَت۔ بلے شھید جمال شاد بی ایس او آزاد ءِ سکا پرکار ءُ جاہ ء آھو ( جاھو ) ءِ تہ ءَ چہ نامداریں ھمبلاں زانگ بوتگ اَت۔

شھید جمال شاد مدام وتی گل ءِ کارانی تہ ءَ تچ ءُ تاگ کنگ ءَ اَت، برے گل ءِ کتاب یا پنتاکاں بھر ءُ بانگ کنگ ءَ اَت۔ برے بنزھاں تر ءُ گرد کنگ ءَ اَت، برے ھمبل ءُ مھماناں آرگ ءُ گوازینگ ءَ اَت۔ چوش کہ سکا پرکاریں ھمبل وتی ھند ءُ دمگانی تہ ءَ زوت نامدار بیت ءُ آئی ءَ ھرکس زانت، شھید جمال شاد ھم وتی ھند ءُ دمگاں ھما وڑ نامدار اَت۔

2011 ءَ شھید ناکو ھیر بکش ءِ زوریں بیگواھی ءَ پد شھیدی، 2013 ءَ استاد الی جان ءِ شھیدی، 2014 ءَ ھاسل ھان ھسرت ءُ دگہ باز مردمانی زوریں بیگواھی۔ چہ جاہ ء آھو (جاھو ) ءَ ابید کراچی، ھب، ھزدار، نال، گریشگ، آواران مشکے، کولواہ ءُ آدگہ بازیں جاھانی بی این ایم ءُ بی ایس او آزاد ءِ سنگت ءُ دوزواہ بیگواہ کنگ بوتگ اَت۔ سک باز ءَ شھید جمال زانتگ دُژمن ھم اے گپ ءَ سرپد بوتگ کہ جمال بی ایس او آزاد ءِ سکا جپاکشیں ھمبلے۔

شھید جمال شاد ءَ ھم زانتگ کہ لگوریں دُژمن منی بارو ءَ شر سرپد اِنت بلے آئی ءَ انگت ءَ داں 2014 ءَ جاہ ء آھو ءُ لسبیلہ ءِ شھدگ ءَ موٹر سائیکل ءِ سر ءَ سپر کرتگ، چہ لسبیلہ ءَ سنگت جاہ ء آھو ءَ آرتگ اَنت ءُ چہ جاہ ءِ آھو ءَ سنگت پہ گوازینگ ءَ لسبیلہ ءَ برتگ اَنت۔

اے گپ سنگتاں زانتگ کہ پہ جمال ءِ وڑیں جپاکشیں سنگتے ءَ اے شھدگ ءَ سپر کنگ سکا بلائیں رسکے بلے مھکمیں ورنا ءِ گپ ھمیش اَت کہ ھچ نہ بیت، من چہ وتی شور بندیاں دلجماں اے دُژمن من ءَ داں ھدے ءَ زانت نہ کنت۔ اگاں من ءَ دُژمن در بہ گیج ایت بیگواہ ءُ شھید بہ کنت چہ آدگہ راجی شھیداں شرتر نہ آں منی واھگ پہ سرڈگار ءَ نْدر بوگ اِنت مرگ کجام وھد ءَ کئیت آئی ءَ رزا اِنت من دانکہ زندگ آں وتی راجی ڈبو ءَ پیلو کن آں ، شھیدی منی مستریں واھگ اِنت۔

شھید جمال ءِ گپ مدام ھمیش اَت کہ کسے چہ وت ءَ پشت ءِ آھوکیں ھمبلاں مھکم کنگ لوٹ ایت گڑا آئی ءِ دیم ءَ اول وت ءَ سکا مھکم بہ کنت ءُ وتی کرد ءُ کاراں آیاں پیش بہ دار ایت گڑا چہ آئی ءَ پد آدگہ سنگت ھم گیش مھکم بہ اَنت ءُ شریں وڑے ءَ کار کرت کن اَنت۔

شھید جمال شاد ءِ سیاسی کار بہ بہ اَنت یا جنگی آ ایوک دروے ءُ مئے میان ءَ ساڑی بوتگ، آئی ءَ ھمک پڑ ءَ جوانیں کردے پیش داتگ۔ آئی ءَ وڑ وڑیں کار کرتگ بلے اے گپ کدی نہ گوشتگ کہ من چون کرتگ یا کنگ ءَ آں بلے آئی ءِ گپ ھمے بوتگ مارا انگت ءَ چہ گیش ءَ گیش کار کنگ لوٹ ایت۔

شھید جمال شاد ءَ سیاسی سپر ءُ جنگی پڑ ءَ چونیں ھم زمہ واری دیگ بوتگ اَنت آئی ءَ شریں وڑے ءَ وتی کرد پیلو کرتگ۔ بلے آئی ءَ وتی گْوست ءِ درسیں کار یک کر کرت اَنت ءُ مجید برگیڈ ءِ کاروان ءَ ھوار بوت، بولان ءِ ھند مچ ءَ پدائی اُرش ءَ وتی زند ءِگڈی واھگ پیش داشت ءُ نمیران بوت۔

روان اِنت…