اوست ءِ درچک | کازی ریھان

بلوچستان ءَ گار ءُ بیگواھی ءُ گار ءُ بیگواھیں مردمانی ژانگولیں کنٹانی دست کپگ ، دیریگیں گپے۔چد ءُ پیش دلیپ داس ، اسد مینگل ءُ اھمد شاہ ءِ بیگواھی بہ بیت یا مئے یات ءُ ھوش ءَ اکبال ءِ ۔ مرگاپ ءَ بلوچ سیاسی گلانی نامی ئیں سروکانی بیگواھی ءُ پد ءَ کنٹانی دست کپگ ءَ پد داں مروچی چوشیں روچے نیست کہ جاھے ناں جاھے بلوچے آوار جنگ ءُ بیگواہ کنگ مہ بیت۔

بندات ءَ ھرکس ءَ ھمے لیک اتگ ءُ پہ وتی دل ءِ ساڑینگ ءَ وت دلیں گپے ٹاھینتگ کہ اے بیگواھیں مردم الم ءَ سلاھبندیں مردم اَنت ، گوں پاکستانی سرکار ءَ دیم پہ دیم جنگءَ اَنت پمیشکا بیگواہ ءُ لٹ ءُ کٹ دیگ ءَ پد یلہ کنگ بہ اَنت داں دگہ برے وتگڑیں پاکستان ءِ پْروشگ ءُ بلوچستان ءِ آزادی ءِ سبزینگ ءِ گپ ءَ مہ جن اَنت۔رند ءَ کہ شھید واجہ گلام مھمد گونگیں سیاسی کارکن آوار جنگ بوت اَنت ھم مردماں وتی نیمون ءِ دپتر بوتک ءُ نشت اَنت ھمینچک دپ دو ھمینچک گپ۔اے مردم کہ نیمون ساچوک اَنت ایشاں وڑے ناں وتی دلانی تہ ءَ اے گپ من اتگ کہ بیگواھیں مردم میاربار اَنت ءُ شرچیزیں پاکستانی واک ھما کار ءَ کنگ ءَ اِنت کہ چوناھیں سرکار ءُ واکے پہ وتی واکداری ءِ برجاھی ءَ کنت۔مردمگری ءِ جھانی رھبند، راجانی وتواجھی، بلوچستان ءِ گْوستانک اے نیمون کنیں مردماں نیم چپی ھم نہ چار اِت اَنت۔ ھمود ءَ کہ وار اش گیگ بوت وتی دپ ءَ اش ریتک اَنت، وتی چھر ءُ شبینی گالانی تہ ءَ ھلوتی نبشت اَنت۔

نیشنل پارٹی کہ بلوچستان ءِ راجدوستیں سیاست ءِ مستریں ڈودار اِنت ، کہ پاکیں سیاست ئِے گوں لاپچاری ءَ پولنگ کرت۔ بی ایس او کہ جھان ءِ چہ درساں مستریں توانمندیں آشوبی نودربر گلانی تہ ءَ یکے زانگ بیت چہ آیاں ونڈے ءِ واگ دست ءَ کرت ءُ دزمجولی کاربست۔ کم زانت ءُ کم سنچیں مردم اگدہ دار کرت اَنت ءُ چہ آئی ءَ درکپتگیں سیاسی کارکنانی رم چاگرد دوستی ءُ آشوبی لیکھاں سست ءُ وتواہ جوڑ کرت اَنت۔ بزاں سیاست کن ئے وتی جند، وتی کھول ءِ سیتاں پھریز اِت کن ئے۔ اگاں ٹریکٹر ءِ گھنٹھے رس ایت بے ونڈ نہ بہ ئے ۔ سولرانی بھر بہ بیت یا پہ لنگ ءُ لوچاں سرکار پرپٹے بہ دنت تو چوش کہ سیاسی کارکنے ئے ترا وتی بانجیگ رس ایت کہ رس ایت۔ نیشنل پارٹی ءِ کارکنانی نک ءَ ھمے شرکنی پٹینگ بوت ، سیاست ءِ نام لاپچاری اِنت۔ دگانی سر ءَ بہ یا ککار ءُ جاک کن ءُ تھاریں کتانی تہ ءَ وتی ھمے ککار ءُ جاکانی سودا ءَ بہ جن۔ روتاکانی تہ ءَ گر ءُ نھر بہ کن پد ءَ کرنل ءُ جرنلانی در ءِ پیالہ وار بہ بہ ئے ، چہ اے گل ءَ کجام شری ءِ اوست دارگ بیت ؟

اے گل ءِ تہ ءَ سیاست وتی جاہ ءَ کردانک ھم پشت نہ کپتگ چہ ایشانی دست ءَ اگاں پہ کسے ءَ شری یے بہ بیت گڑا بزاں آئی ءِ پشت ءَ دو سری سیتے گون اِنت۔ باید اَت کہ ایشاں وتی کاسگ چٹیں سرکار ءِ باریگ ءَ بیگواھیں مردمانی جیڑہ چہ بلوچستان ءِ سیاسی جیڑہ ءَ گستا کرت ءُ بہ چار اتیں۔ اے گپ پہ جار بہ گْوشتیں کہ بلوچ ھمے جھان ءَ نشتگ اَنت باید گوں آیاں جھان ءِ ھمے رھبنداں کہ ھست اَنت ھمیشانی بنیاد ءَ پیش آیگ بہ بیت۔ بیگواھی جھانی رھبندانی رد ءَ میارے ، ھچ رنگیں واکے پہ وتی سیاسی سیتاں کس ءَ بیگواہ کرت نہ کنت۔ھما آمیدگس کہ آیانی آمیدکار پاکستانی سرکار ءِ وتی ایر کرتگین اَنت کہ ھمایانی رھبندانی رد ءَ مردماں ڈنڈ دئے اَنت ءُ بلوچ کہ آیانی سر ءَ ڈیھ دژمنی ءِ زنڈھیں میار لڈگ بیت ، آیاں پاھو داتین اَنت بلے بیگواہ مہ کرتین اَنت۔

نیشنل پارٹی کہ وت ءَ وانندگ ءُ سوگھیں مردمانی گل گْوش ایت نیمون کنت ، چوش کہ بیگواھیں مردمانی جیڑہ سیاسی جیڑھے گوں بلوچستان ءِ آجوئی ءِ جنگ ءَ بندوک اِنت ، داں زْرمبشت ھست ، بیگواھی ءِ دْرچ ھمے رنگ ءَ برجاہ مان ایت ۔۔۔ اے سیاسی نیمونے ، لھتے لاپچار کہ وت دل ءَ سیاسی باسک اَنت آیا لک ءُ پادی چاپ جت کہ راستیں گپے جنگ بیتگ کہ اے بیگواھی بلوچ زْرمبشت ءِ پدگوانک اِنت۔

جھندم چہ لاپچارانی چاپ ءَ لھتے نیم بزوکیں درانڈیھاں کہ چارکتابی جوڑ بیتگ اَنت ھم گْوشت کہ اے گپ ءِ تہ ءَ لوجک ھست۔ ایشاں مروچاں ھرچ ھما گپ ءِ تہ ءَ کہ وڑے ناں وڑے بلوچ راجی زْرمبشت ءِ تچکیں گامگیجے ءِ بگیری ءَ بہ بیت ، سنچ ءُ زانشت گند کئیت۔ کراچی اسٹاک ایکسچینج ءِ سر ءَ بیتگیں دیمونی ارش ءِ سر ءَ اے شھزانتاں چونیں دانک نہ شکساتگ۔ برے برے دل ءَ گْوشتگ کہ ایشانی پوسٹانی چیر ءَ بہ رو ایشاں گون بہ جن ، جست بہ کن کہ آیا شمئے بندیک ءِ سر نوکی گار بیتگ یا ھما وھد ءَ کہ شھید واجہ گلام مھمد زندگ بیتگ ھم شما چوش بریں پس ءَ بیتگ اِت؟

من وھدے کہ وتی چیزے روچانی پند ءَ ایشانی ھمراھی ءَ ، دیری ءَ نزیکی ءَ ایشانی وت ءَ پیر ءُ مرشد لیکگ ءُ کلب پالیکٹس ءِ ھنراں گند آں ایشانی ءُ لاپچارانی میان ءَ ایوک ھمے دگری گندگ بیت کہ آیاں دیناداسی سیاست ءِ نام بدنام کرتگ ءُ ایشاں دیر بستگ داں روچے وتی بار ءَ بہ بوج اَنت زانگ بیت کہ ایشانی گرنچاں چونیں چونیں نیمون مان اِنت۔ من و اجکہ بہ آں کہ اے گلانی ھمراھی ءَ اے پرچا گون اَنت ؟ اد ءَ راہ ءُ رند تچک اَنت ، لیکہ گیش اتگ ، لوٹ ھم زانگ بیت ءُ اے گپ ھم پدر اِنت کہ ما وتی مولاں ، وتی برتگیں سرڈگار ءَ چوں پچ گر ایں۔ شھید گلام مھمد ءَ گوں ھمراھاں بنداتی روچ ءَ وتی گپانی تہ ءَ گْوشتگ بلوچستان گوں سیاسی گپ ءُ درشاناں آجو نہ بیت۔ بلوچستان ءِ سر ءَ زورگری ءِ دیم گوں توپک ءِ زور ءَ ، گوں جنگ ءَ دارگ بیت دگہ ھرچی کہ ھست آ درسیں کار پمیشکا کنگ بہ اَنت داں مئے جنگ مھکم بہ بیت ءُ جھان ایشی ءِ سیاسی پھناتاں سرپد بہ بیت۔ اے پند ءَ یا اناگاہ اے شھزانتاں سما کرت کہ ما و رنگراھے ءَ کپتگ ایں بلے اگاں چار ءُ ٹپاس بہ بیت ایشانی کرد چہ بندات ءَ چی بیتگ؟ گْوستانک کور دیم نہ اِنت ، ھرکس زانگ بیت اگاں ایشاں پیش ءَ مزنیں زھمے جتگ ، گوں جھد ءَ دلجم بیتگ اَنت ءُ نی ایشاں لھتے ردی دیستگ ءُ گپ ءَ اَنت۔ گڑا ھو الم ءَ اے گھتری لوٹ اَنت بلے آ گھتری کہ ایشانی زھن ءِ تہ ءَ اِنت ایش اِنت کہ زْرمبشت ءِ بن ھشت در کنگ بہ بیت۔ اے گھتری یے نہ اِنت بلکیں ھما کردگار اِنت کہ نیشنل پارٹی ءَ گون اِنت۔

ھمیشانی شھزانتی ءِ برورد اِنت کہ وھدے جھانی تک ءَ من اتگیں اھوالکاری گلے ءَ اے گپ جت کہ شھیدساجد ھسین پاکستانی آئی ایس آئی ءَ کشتگ ءُ مئے گور ءَ گواچنیں دستاویز ھست ، ایشاں گْوشت ناں اے گپ چہ پیشہ وردی رھبنداں ڈن اِنت ، پولیس پٹ ءُ پول کنگ ءَ اِنت باید پولیس وت بہ چار ایت کہ چی بیتگ ؟ ۔۔آسر ، سوئیڈن پولیس ءَ کیس ءِ دپتر بند کرت ءُ جار جت کہ ساجد ھسین ءِ کوش ءِ ھچ رند ءُ پد دست نہ کپتگ۔پرچا کہ پولیس ھم دیندار ءِ گپاں چار ایت ءُ اد ءَ دیندار ءَ وت ءَ پشت ءَ کش اتگ کہ من ءَ دیندار نیست تو وتی وڑ ءَ پول کن۔

تچکیں گالانی تہ ءَ نیشنل پارٹی پاکستانی لشکر ءِ پلہ مرزی کنگ ءَ اِنت کہ اگاں مردم بیگواہ اَنت آیانی میار وتیگ اِنت یا بلوچ زْرمبش ئیگ اِنت، گڑا ؟ بلوچ وتی مانشت ءِ جنگ ءَ یلہ بہ کنت ؟ مئے سْرپانی تہ ءَ کمین جتگ ءُ نشتگیں مردمانی مڑو مڑو ءُ سک سک ھم انچین اَنت۔

بندات ءَ باز مردمانی ھمے گمان بیتگ کہ بیگواھی ءِ آماچ بیوکیں مردم جنگی مردم اَنت یا کم ءَ کم بی ایس او ءُ بی این ایم ءِ باسک اَنت کہ اے وڑے ناں وڑے جنگی گلانی پلہ مرزی کن اَنت۔ بلے ھما کسانسالیں چک کہ بیگواہ کنگ بہ اَنت۔ ھما جنین کہ بیگواہ کنگ ءَ پد جنسی زوراکی ءِ نشانگ کنگ بیگ ءَ اَنت ھمایانی میار چی اِنت ؟ اد ءَ پاکستانی لشکر ءِ درمردمی کرد گوں کجام سیاسی جیڑہ ءِ برپشت ءَ پلگارگ بوت کنت؟

اگاں تچکیں سیاستے کن ئے ، آوار بہ ئے ، تچکیں گپے نبیس ئے کشگ بہ ئے۔اے زوراکی ءَ پد ءَ بہ نند ءُ سیاسی جیڑہ ءِ نام بہ دئے، اے کرد گوں پاکستانی لشکر ءَ سیاسی ھمراھداری ءِ کرد اِنت۔اے گپ پاکستانی لشکر ءِ ڈوہ ءُ میارانی چیر دیگ اِنت۔

9 جولائی 2020 ، شپ ءِ ادار یک ءَ ، کراچی ءِ شاہ پیسل کالونی ملیر ءَ پاکستانی چیریں واکانی 8 ویگو گاڑیاں اوست گھبودی گل ءِ کارگشاد کیوم وپا ءِ سر ءَ بیڑ برت ءُ آوار جت۔ وپا چاگرد ءِ اوشیش کردیں مردمے ، اوست کہ زوراکیں سرکار ءِ وتی من اتگیں گلے۔کاگدی ءُ رھبندی کار کنگ ءَ اِنت۔ یک روچے پیش کیوم ءَ جار جتگ اَت کہ آیاں یکیں ھپتگءَ ھپت لک ءُ پنجاہ ھزار کلدار ءَ برز زر نادراہ ءُ نادزرسانی درمان ءُ دارگاں ھرچ کرتگ۔ کیوم ءَ ھم وتی دل ءَ جیڑ اتگ کہ اے جوانیں کارے ھما مردماں کہ آیانی سر ءَ اوست کرتگ ءُ اے زر داتگ اَنت باید آ سرپد بہ بہ اَنت کہ اے زر چوں ھرچ بیگ ءَ اَنت۔

شما زان اِت اے مردم چون کار کن اَنت ؟

ایشاں کارگس نیست، گاڑی نیست۔ وت ءَ زر نیست، پگار نہ بستگ کہ مروچیگیں زمانگ ءَ ھزاراں این جی اوز کمک ءِ نام ءَ شانداریں ماڑیانی تہ ءَ گوں وتی کارمنداں کہ ھر یکے لکانی پگار گرگ ءَ اِنت کار ءَ اَنت۔ بلے اے سجھیں شپ ءَ برے رکشہ ، برے بس ، برے موٹر سائیکل ءَ اد ءَ تچ ءُ آ اود ءَ تچ۔ برے اے نادراہ ءَ ھڈ ءِ ڈاکٹرے ءَ بر ، برے آئی ءَ پہ شیمک ءِ بنجل ءَ سرکن۔روچے ھپت ھپت جتا جتائیں نادرھجاھاں گول پہ کئے ءَ ، پرچا؟

پہ ھمے بزگیں راج ءَ کہ نام ئِے بلوچ اِنت۔ وپا ءِ بیگواھی اوست ءِ بیگواھی اِنت۔ من سد ماں سدی دلجم آں کہ وپا ءَ وتی زند ءِ ھچ ادار ءَ چوشیں ناراھیں کارے نہ کرتگ کہ زورگریں سرکار ءِ وتی جند ءِ دید ءَ ناراہ بہ بیت بلکیں وپا پمیشکا آوار جنگ بیتگ کہ وپا بلوچانی تہ ءَ بلوچ بیگ ءِ مارشت ءَ زندگ دارگ ءِ کوشست ءَ کنگ ءَ اِنت۔ راج کہ وتی راجی دْروشم ءَ برجاہ مان ایت گڑا آ وتی سیاسی ارزشت ءَ سما کنت ۔ وتی سیاسی سیتاں ھم پوہ بیت۔ وپا ءَ مسیتے ءِ نام ءَ ، مدرسھے ءِ نام ءَ کروڑانی کلدار چہ ڈیھ ءُ درانڈیھاں بہ گپتیں واکدارانی گوش ءَ مورے ءَ نہ وارتگ اَت کہ آ زر اللہ ءِ راہ ءَ اتکگ ءُ « مولانا سید پیر ء تریکت ازرت کیوم سلپی دیوبندی بریلوی مکی مدنی کادری جاپری الوی اباسی» ءِ راہ ءَ شتگ اِت اَنت۔بلے آواریں وپا بلوچ ءِ نام ءَ زر گپت ءُ پہ بلوچ ءَ ھرچ کنت۔ بے وسیں بلوچاں اے سما ءَ دنت آیانی راج ءِ تہ ءَ چوشیں مردم ھست کہ آ درد وار اَنت۔چہ ایشی ءَ راج ءِ تہ ءَ وت ماں وتی مھر ءِ ھما توم کہ اوست ءِ نام ءَ کل کنگ بیگ ءَ اِنت تج ایت بر ءُ برورد دنت۔ کم کم ءَ وتی ریشگاں روتگ ءُ روتگاں ھنڈال کنت، بنڈ ءَ مھکم کنت ءُ شاہ ئِے پراہ روان بہ اَنت۔ وپا پمیشکا آوار جنگ بیتگ داں اے درچک بہ مر ایت؟

نی جست ایش اِنت شما بلوچ ، اے اوست ءِ درچک ءَ مرگ ءَ کل اِت ؟

دانک بلد