مجید برگیڈ

بلوچستان ءَ سیاسی سنچ ءِ ردوم چہ پاکستان ءِ زوراکیاں بیتگ۔چوش کہ ڈاکٹر اللہ نزر ءَ وتی درشانے تہ ءَ گْوشتگ: سرمتابی ءِ بن زورگری اِنت۔بلے کم کم ءَ بلوچ ءَ وتی سیاسی لیکہ ءِ گیش گوار کرت ءُ اے گپ ءَ پوہ بوت اَنت کہ داں وھدے آیانی گور ءَ سائنسی بنیاد ءَ تْرام اتگیں گلے مہ بیت آ اے زوراکیں دژمن ءِ دیم ءَ وتی مانشت ءَ برجاہ داشت نہ کن اَنت۔ بلوچانی جیڑہ ایوک ءَ مڈیانی ونڈ ءِ سر ءَ نہ اِنت کہ پنجاپ ایشاں پلگ ءُ برگ ءَ اِنت یا گوں ارزانیں نھادے ءَ دری ساھوکارانی گْور ءَ بھا کنگ ءَ اِنت بلکیں چہ ایشی ءَ ترسناک تریں گپ ایش اِنت کہ پنجاپ بلوچ ءِ زمین ءَ چہ آئی ءَ پچگ گرگ ءُ وتی نوک آبادی جوڑ کنگ لوٹ ایت۔

اے ترس ھما وھد ءَ گیش بوت کہ پاکستانی لشکر ءَ گوادر ءَ مزنیں بند ءُ ساچی کارانی بنیاد ایر کرت ءُ ایشی ءَ ٹوھیں پروجیکٹ ءِ نام دات۔چہ ایشی ءَ ھما مردم ھم گڑ اِت اَنت کہ آیاں چد ءُ پیش اے گپ نہ مار اتگ کہ پاکستان ءِ واکداریں پنجاپی ایوک ءَ بلوچ ءِ مڈیاں دزگ ءُ برگ ءَ نہ اَنت بلکیں آ بلوچ گلزمین ءَ ھم چہ بلوچاں پچ گرگ لوٹ اَنت۔شھید ڈاڈا اکبرھان بگٹی چہ بلوچستان ءِ کماشیں سیاسی سروکاں ھما بنداتی سروکان اَنت آئی ءَ نا ایوک ءَ اے گپ جوانیں رنگے ءَ مار اِت بلکیں گوں تچکیں رنگے ءَ ھمے لوٹ ایر کرت کہ گوادر ءَ ٹوھیں پروجیکٹانی بنا کنگ ءَ پیش بلوچ ءِ مانشت ءِ سر ءَ چست بیتگیں جست ءِ پسو دیگ بہ بیت۔شھید اکبرھان بگٹی ءَ وتی لوٹانی تہ ءَ گوادر ءِ زمینانی واھندی ءِ پہ مدامی بلوچانی دست ءَ بیگ ءُ باپار ءِ تہ ءَ مزن ھور ءِ ڈیھانی رھبند ءَ ء باپاری سیتانی تہ ءَ بلوچاں 51 ماں سدی ونڈ دیگ ءِ لوٹ کرت ۔۔۔ آئی ءِ آسر ما درساں دیست۔شھید ڈاڈا اکبرھان ءِ لوگ ءِ سر ءَ لشکرکشی کنگ بیت ءُ داں 26 اگست 2006 ءَ آ ماں تراتانی ءِ کوھاں شھید کنگ بوت۔

پاکستان ھمے سرپد اَت کہ بلوچستان ءِ توانمندیں سروکے ءِ کوش ءَ پد آ بلوچستان ءَ باج ءَ بارت ءُ سرجمیں بلوچستان آسانی ءَ آئی ءِ دست ءَ کئیت۔گْوستانک ما بہ چار ایں ما گند ایں کہ بلوچستان ءُ پاکستان ءِ میان ءَ درمیان ءَ وھدے کہ جنگ سارت بیتگ ، توپک ءِ توار بند بیتگ ءُ سیاسی گلاں دگ ءُ مچیانی تہ ءَ وتی توار برز کرتگ پاکستانی لشکر ءَ اوپار نہ کرتگ ءُ گوں زور ءَ بلوچ ءِ دیم ءِ دارگ ءِ کوشست کرتگ چہ ایشی ءَ بلوچاں شریں وڑے ءَ مار اتگ کہ پہ آیاں تچکیں راہ جنگ اِنت ءُ آیانی پانک ھشیمیں ماتکوہ اَنت۔

وھدے پاکستان ءِ لشکری واکدار جرنل پرویز مشرپ ءَ بلوچاں بیھار دات کہ اے ھپتاد دھک نہ اِنت کہ بلوچ توپک ءَ چست کن اَنت ءُ کوھاں رو اَنت، چہ بلوچانی نیمگ ءَ ھم ھمے پسو دیگ بوت کہ اگاں پہ پاکستان ءَ اے ھپتاد دھک نہ اِنت گڑا پہ بلوچاں ھم اے ھپتاد دھک نہ اِنت۔ زور ءَ اے گپ تچک اِنت کہ پاکستان ءِ گور ءَ مزنیں لشکرے ھست، جنگی بالیگ ، ،موشک ، ٹینک ءُ ٹوپ ھست اَنت بلے بلوچ یک کسانیں لشکرے نہ اِنت کہ گوں جنگ ءَ لپاشگ ءُ نیست کنگ بہ بیت۔

چہ مروچیگ ءَ ھزارھاں سال پیش انوشیروان نامیں ساسانی بادشاھے ءَ بلوچی بگیری ءَ لشکرکشی کرتگ ، ھمینچو بلوچ کشتگ کہ کوھی کاہ ءُ بوٹگ ءُ چدگانی سر ءَ بلوچانی جون تلام بیتگ اَنت۔انوشیروان ءَ جار پرینت کہ من درسیں بلوچ کشتگ اَنت نا چہ آیاں چک پشت داتگ ، نا جنین ءُ پیریں مردم ، نہ درائی ءَ کسے منتگ نہ چیراندری بلوچے ھست۔

بلے چوشیں زوراکی ءَ پد بلوچ ھست بیتگ ءُ بلوچاں سیاہ سوار ءِ سروکی ءَ ساسانی بادشاھانی پْروش ءُ پارس ءِ شھنشاھی گاری ءِ بن ھشت ایر کرت۔ بلوچ ءِ مانشت ءِ چہ درساں مستریں مانزمان آئی ءِ سرمتابی ءُ جنگ بیتگ۔

ما بلوچ گْوستانک ءَ سیل بہ کن ایں داں انوشیروان ءَ بلوچانی جنگ ، سیاہ سوار ءُ چہ آئی ءَ پد ھمک باریگ بلوچ ءَ انچیں سرمچاریں سروک بیتگ کہ آیاں وتی سرانی پرواہ نہ داشتگ، وتی دود ءُ ربیدگ ءُ راجی مانشت برجاہ داشتگ۔

نوکیں زمانگے لوٹ مٹ بیتگ اَنت نی بلوچ ءِ مانشت گوں آئی ءِ سرڈگار ءَ بندوک اِنت اگاں آ وتی راجی پجار ءَ برجاہ دارگ لوٹ ایت باید وتی سرڈگار ءَ بہ پھریز ایت۔ اے جنگ ءَ ھم بلوچ وتی نزوری ءُ ناتوانی ءَ پد ھم پشت ءَ نہ کنز اتگ ءُ دژمن ءِ راہ سر ءَ کنٹگ بیتگ۔

بلوچ سرمچاری ءُ دیمپانی جنگ ءِ تہ ءَ دیمونی جنگ ءِ ھم مارا درور رس ایت کہ بلوچ سرمچار چہ وتی زند ءَ سر گْوستگ اَنت ءُ دژمن ءِ سر ءَ ارش اش کرتگ۔بلوچستان ءِ سر ءَ زوراکی کنوکیں واکدارانی تہ ءَ زولپکار الی بھٹو ھم گون بیتگ۔آئی ءَ 13 پروری 1973 ءَ بلوچستان ءَ راجدوستانی گچین بیتگیں سرکار پْروشت۔ چہ ایشی ءَ بلوچاں باھند کرت ءُ گوں اسلام آباد سرکار ءَ جنگ ءَ یک رندے پد ءَ تج کرت۔

ایران ءِ شاہ چہ بلوچستان ءِ جنگ ءَ پریشان بوت آئی ءَ پاکستان ءَ کلوہ کرت کہ اگاں تو بلوچاں داشت نہ کن ئے من وت رودرتکی بلوچستان ءَ ھم گر آں پرچا کہ بلوچستان منی ڈیھ ءِ پیشگاہ اِنت۔آ وھدی پاکستان ءِ گور ءَ جنگی سامان نیست اَنت ایران ءِ شاہ وتی جنگی بالگرد دات اَنت آیاں بلوچانی میتگ ءِ سر ءَ بم گواری کرتگ۔گْوش اَنت اے جنگ ءَ 30 ھزار بلوچ شھید بیتگ۔

بلے بلوچاں اے زھر وتی دل ءَ داشت چہ آیاں ورنائیں شھید مجید کہ مستونگ ءِ جاھمنند اَت ھم گون اَت۔ 02 اگست 1974 ءَ آئی ءَ شال ءَ زولپکار الی بھٹو ءِ سر ءَ گوں دستی تْراک ءَ دیمونی ارش ءِ کوشست کرت ، آ بے سوب بیت بلے آئی ءِکلوہ پہ جھان ءُ پہ آئی ءِ جند ءِ پدریچ ءَ پہ مدامی پشت کپت۔ ھمے پیم 09 دسمبر 1979 ءَ شھید ھمید بلوچ ءَ ماں تربت ءَ امان ءِ شاھی لشکر ءِ کماندار کرنل کلپان ءِ سر ءَ ارش کرت۔ آ وھدی کہ شھید ھمید دزگیر بوت آئی ءَ 22 سال اَنت ءُ تربت شھدربرجاہ ءِ نودربرے اَت۔شھید ھمید ءَ اے کار گوں امانی سرکار ءَ جنگ کنوکیں زپارانی پلہ مرزی ءَ کرتگ۔ شھید ھمید ءِ لیکہ اَت کہ بلوچ وت چیردستیں راجے آ پہ زپارانی کشگ ءَ امانی لشکر ءَ ھوار مہ بیت۔

بلوچ زْرمبشت ءِ نوکیں باریگ سال 2000 ءَ دیم بنا بیت۔چہ اے سال ءَ پد بلوچ راجدوست سیاست ءُ جنگ ھر دوئینانی من ءُ مول تچک اَنت۔ پیش جنگ ءُ لوٹ اگبال، وتواکی ءُ شھری آسراتیانی چاگرد ءَ بیتگ اَنت نی بلوچاں تچک ءَ تچک آزادی لوٹ کرت۔ سیاسی گلاں بلوچ راج ءَ سرپدی دات کہ ابید چہ آزادی ءَ بلوچ اے گلزمین ءَ وتواک ءُ پرمنگھیں زندے ءِ ھدابند بوت نہ کنت۔اے بنداتی رند اِنت کہ بلوچ ءِ جنگ ھمک بلوچ ءِ لوگ ءَ سر اِنت۔ اے سری رند اِنت کہ اے جنگ یک سروک یا ٹکے ءِ چیردستی ءَ بیگ ءَ نہ اِنت بلکیں اے جنگ سائنسی بنیاد ءَ کارکنوکیں سیاسی گلانی چیردستی ءَ بیگ ءَ اِنت۔

بلوچ جنگی گلانی کماندار ءُ رھشوناں مدام اے سما گور بیتگ کہ آ چہ وتی دژمن ءَ جنگی تک ءَ نزور اَنت۔ بلوچستان ءِ آبادی کم ءُ شنگ ءُ شانگ اِنت۔ بلوچ گلزمین پہ چیرجنگی ءَ جْوان اِنت بلے شھری جنگ ءَ بلوچ ءِ گور ءَ چوشیں توان نیست کہ آ لشکرے بہ رمبین ایت ءُ گوں دژمن ءَ دیم پہ دیم بہ بیت۔پاکستانی لشکر ءَ چہ ھمے نزوریاں سیت چست کرتگ یک نیمگ ءِ شھرانی تہ ءَ سیاسی کارکن ءُ بلوچ راجدوستیں مردم یک پہ یک نشانگ کنگ گار ءُ بیگواہ کنگ یا شھید کنگ بیتگ اَنت دومی وتی کاسگ چٹ ءُ ناشریں مردماں توپگ بڈ ءَ داتگ ءُ آیاں بلوچانی کشگ ءِ سکین داتگ۔ چہ ایشاں چہ درساں گیشتر تاوانبار شپیک مینگل اِنت کہ آئی ءَ ھزارھانی بلوچ کشتگ ءُ یک گور کرتگ اَنت۔شپیک مینگل ءَ وت ءَ انچوش مھر کرتگ کہ آئی ءِ سر ءَ چوشیں ارشے ءِ گمان نیست اَت ءُ تاوان باز اَت۔ پمیشکا بلوچ جنگ ءِ تہ ءَ تْرام اتگیں وتکش ارشانی بنیاد بازمھمد پنام درویش ءَ کرتگ۔ شھید درویش ءِ کوھلو ءِ جاھمنند بیتگ۔ آئی ءَ 30 دسمبر 2011 ءَ شپیک مینگل ءِ سر ءَ وتکش ارش کرت۔

بی ایل اے کہ بے گمان بلوچ جنگی گلانی تہ ءَ گیشتر نامدار ءُ بودیگیں گلے زانگ بیت آئی ءِ تیوکیں نزوری ھمیش اَت کہ آ ٹکی سردارانی چیر دست اَت۔ چہ اے ارش ءَ پد کہ گمان اَت کہ بی ایل اے ءِ دژمن ءِ سر ءَ وتکشانی دْرچے بندات کنت بلے بی ایل اے زیت وت ماں وتی جیڑھانی آماچ بوت ءُ بی ایل اے نامانی کماندار جرنل استاد شھید اسلم گوں وتی سنگتاں چہ بی ایل اے ھما بھر ءَ گستا بوت کہ آیانی کمانداری ٹکی سردار ءَ گستا اِنت۔چہ ایشی ءَ بی ایل اے جنگی بودشت ءِ تہ ءَ گھتری گندگ بوت۔

ھمے گمان اَت کہ چد ءُ دیم بی ایل اے وت کش ارش نہ کنت بلے دراجیں اوسپانے ءَ پد دالبندین ءَ اگست 2018 سینڈک ءَ کار کنوکیں چینی مھندسانی سر ءَ وتکش ارشے کنگ بوت اے ارش ءَ سئے چینی مھندس کشگ بوت۔اے ارش ءَ وتکش کنوکیں سرمچار بی ایل اے ءِ جند ءِ کماندار ءُ مجید برگیڈ ءِ بن ھشت ایر کنوک شھید جنرل استاد اسلم ءِ جند ءِ بچ ریھان اَت۔ ریھان ءِ دیمون بیگ ءَ یک نیمگے دژمن ءِ دیم ءَ اے گپ پدر بوت کہ بلوچ پہ وتی دیمپانی ءَ داں گڈی سیمسر ءَ روگ ءَ ھم ساڑی اَنت ءُ دومی نیمگ ءَ بلوچاں ھم اے مار اِت کہ اے جنگ ءِ سروک وتواہ ءُ چہ دیمونیاں وتی جند ءَ پھریزوکیں مردم نہ اَنت۔شھیداستاد اسلم ءُ آئی ءِ لوگبانک یاسمین ءَ شھید ریھان ءَ دستان ء وت سالونک کرت ءُ وتکش ءَ دیم ءَ دات چہ ایشی ءَ بلوچ سرمچارانی ھاٹیگ ءُ باور مھکم بوت اَنت۔

شھید ریھان ءِ وتکش ارش ءِ سر ءَ جنگی بنیاد ءَ جتائیں گلاں سیادی داروکیں آزادی پسنداں شرگداری ھم کرت ، آیانی ھمے گْوشگ اَت کہ وتکش پہ دژمن ءَ گیشتر تاوانبار بوت کن اَنت۔اے وتکش ءِ دو ماہ ءَ بلوچ سرمچار ماں کراچی ءَ چینی سپارتجاہ ءِ سر ءَ دیمونیں ارشے کرت۔اے ارش ءَ سئے دیمونیں سرمچار ازل ھان مری ، رزاک ءُ رئیس ءَ بھر زرتگ۔چہ اے ارش ءَ پد سرجمیں جھانی رسانکدر ءَ بلوچ جیڑہ دیم ءَ اتک ءُ اے ارش ءِ ھال ءِ پجیگ ءَ اے جست ھم ایر کنگ بوت کہ بلوچاں پرچا چینی سپارتجاہ ءِ سر ءَ ارش کرتگ۔

دسمبر 2018 ءَ پاکستان شھید جرنل اسلم گوں پنچ سنگتاں یک وتکش تْراکے ءَ شھید کنگ ءَ سوبمند بوت ، آئی ءِ پجیگ ءَ سردارو، کریم مری،اکتر ، پرید ءُ سادک نامیں سنگت شھید بوت اَنت۔ پاکستان ءِ درشان شنگ کنگ بوت کہ چینی سپارتجاہ ءِ سر ءَ ارش ءِ شورکار کشگ بیتگ۔استاد ءِ شھیدی ءَ دو نیمگ ءَ گل کنگ بیتگ یک نیمگے دژمن ءَ گل کرتگ ءُ دومی نیمگ ءَ ھما سرداراں کہ آیانی نز ءَ شھید استاد اسلم ءَ آیانی گل وتی دست ءَ کرتگ اَت۔دژمن ءُ سردار ھر دو ھمے سرپد بوت اَنت کہ بی ایل اے ءِ زور کم بیت یا آ وت ءَ داشت نہ کنت۔

چہ ایشی ءَ پیش 20 اپریل 2018 ءَ بی ایل اے ، بی ایل ایپ ءُ بی آر اے ءَ بلوچ راجی سنگر براس ءِ نام ءَ وتی سنتے ءِ جار جتگ اَت۔چہ ایشی ءَ بی ایل اے ءِ مجید برگیڈ ءَ چہ بی آر اے ءُ بی ایل ایپ ءِ نیمگ ءَ توان ءُ کمک رس اِت۔

مئی2019 ءَ ’’ زر پھاز بیڑ ‘‘ ءِ نام ءَ گوادر ءَ پرل کانٹینیٹل ھوٹل ءِ سر ءَ مجید برگیڈ ءِ دیمونیں سرمچاراں ارش کرت۔ اے ارش چہ مجید برگیڈ ءِ سوبمند تریں ارش ءَ یکے زانگ بیت۔ ارش گوادر ءَ انچیں جاھے کنگ بیتگ کہ پاکستانی لشکر ءَ چاریں نیمگ ءَ انگر ءَ کرتگ ءُ در آیگ ءُ پترگ ءِ راہ بستگ اَنت پمیشکا گوادر ءُ بلوچستان ءِ آ دگہ جاھاں نشتگیں مردم گلزمین پھازیں بچانی اے ارش ءِ سر ءَ شاتکانی درشان کرت۔

نوکتریں ارش کہ کراچی اسٹاک ایکسچینج ءِ سر ءَ بیتگ ھم مجید برگیڈ ءَمزنیں نشانگ گچین کنگ ءُ آیانی سر ءَ ارش کنگ ءِ بودشت ءِ درانگازی کنت۔کراچی اسٹاک ایکسچینج پاکستان ءِ گزرانک دل زانگ بیت ءُایشی ءِ ماڑی کراچی ءَ انچیں جاھے ءَ اِنت کہ گام گام ءَ پاکستانی پولیس ءُ سلاھبندیں لشکر پانک اَنت۔کراچی اسٹاک ایکسچینج ءِ سر ءَ شھید سلمان ھمل جاھمنند مند، شھید تسلیم جاھمنند دشت ، شھید شھزاد جاھمنند پْروم ءُ شھید سراج کنگر جاھمنند شاپک بیڑ برتگ ءُ پہ راجی سیتاں شنک بیتگ اَنت۔کراچی اسٹاک ایکسچینج ءِ ونڈانی چینی شرکت 40 ماں سدی ونڈانی واھند اَنت۔ بی ایل اے ءَ وتی درشان گْوشتگ کہ اے ارش پاکستان ءِ گزرانک ءِ پجیگ ءَ چین ءِ سیتانی سر ءَ ھم کنگ بیت۔اے وڑ ءَ سیمی ارش اِنت کہ چین ءِ سیتانی سر ءَ بیتگ۔

مجید برگیڈ کئے نام ءِ سر ءَ اِنت ؟

باز مردم ھمے سرپد بیت کہ مجید برگیڈ سر مجید ءِ نام ءَ اِنت کہ آئی ءَ زولپکار الی بھٹو ءِ سر ءَ ارش کرتگ بلے چوش نہ اِنت بلکیں مجید برگیڈ آئی ءِ کستریں برات ورنا مجید ءِ نام ءِ سر ءَ ایر کنگ بیتگ۔ورنا مجید ءِ نام سر مجید ءِ نام ءِ سر ءَ ایر کنگ بیتگ۔آئی ءِ کھول سرجمی ءَ گوں زْرمبشت ءَ بندوک اَت۔17 مارچ 2010 ءَ آئی ءِ لوگ ءَ سر ءَ پاکستانی لشکر ءَ ارش کرت ءُ لوٹ اِت آئی ءَ زندگ ءَ دزگیر بہ کنت بلے آئی ءَ دزگیری نہ دات ءُ گوں دژمن ءَ دیم پہ دیم جنگ دیان شھید بوت۔

مجید برگیڈ پہ بلوچاں سوبمندی ءِ اوست ءُ پہ دژمن ءَ مزنیں بیمے جوڑ بیتگ۔ دژمن نی سما کنگ ءَ اِنت کہ آ انچوش وتی زوراکی ءَ گیش کنگ ءَ اِنت بلوچ ءِ دیمپانی جنگ ھم ترند تر بیان اِنت۔ بلوچ سرمچارانی بیڑ ءَ پد دژمن الم وتی زوراکیاں گیش کنت ءُ دمگ ءِ ھمساھگیں ڈیھانی تہ ءَ نشتگیں بلوچاں وتی نشانگ جوڑ کنگ ءِ کوشست کنت۔میان استمانی تک ءَ اوگانستان ءُ ایران ءِ سر ءَ زور پر دنت کہ آ بلوچانی انگر کنگ ءِ پاکستان ءِ ھمدست بہ بہ اَنت۔ چوش ھم گندگ بیگ ءَ اِنت لھتے بلوچ گلانی سروک ھم اے ارش ءَ گوں ایران ءَ ھمگرنچ کنگ ءَ اِنت پہ ایشی ءَ بلوچ آزادی پسندیں گل الم ءَ ساڑی اَنت انچوش کہ آیاں پیش ءَ ھم بلوچانی اوست پیلو کرتگ اَنت ءُ پاکستان ءِ مزنیں زوراکیانی دیم ءَ جل اتگ اَنت اے زور ءَ ھم سگ اَنت ءُ جھد ءَ نوکی سرٹلے ءَ سر کنگ ءَ سوبین بہ اَنت ءُ بلوچ راج ءَ داں وس ءُ واک وتی ھمدردی، مالی ءُ جانی کمک گون کنگی اِنت۔