نبشتہ کار: مھروان کمبر
دو ھزار بیست ءُ سے اَت، کیچ شھید پدا چارراہ ءَ زھرشانی ننداکے برجاہ اَت، مردمانی روگ ءُ آھگ اَت، اوگام اَت، درد اِت اِنت کہ مردم لبزانی دْروشم ءَ درشان کنان اِت انت، ھمے مردمانی مُچّی ءَ ماسٹر اکبال ھم نندوک اَت، آئی ءِ ارسیگیں چم، دستانی ٹنگرتگیں رَگ، مُلوریں دیم آئی ءِ تھانگ ءِ دُرستیں درد ءُ گماں درشان کنان اِت انت۔ آ مردمانی مُچّی ءِ تہ ءَ ھم وتی دُنیا ءَ گار ءُ رَنجانی دیمپان اَت۔
ماسٹر اکبال آبسر کیچ ءِ جاہ منند اِنت، آئی ءِ ورناھیں بچ اَدیل آ وھد ءَ زور گیریں ریاست پاکستان ءِ دست ءَ زورانسری بیگواہ کنگ بوتگ اَت۔ روچ ماھانی تہ ءَ، ءُ ماہ سالاں مٹّ بْوان اِت انت ءُ آئی ءِ ودار ھم دْراجتر بْوان اَت۔ آئی ءَ وتی ھند ءِ دُرستیں واجہ ءُ میرانی در گول اِت انت، آمیدگس ءِ دروازگ ھم ٹُک اِت، ھر جاہ ءَ کہ زھرشانی یے بوت گُڑا آئی ءَ ھم وتی بچّ ءِ اکس زرت ءُ اُوشتات۔ ھمک رند آئی ءِ اُمیتانی بالینتگیں چراگ اِیر مِران بوت، بلے آ پِتے اَت ءُ آئی ءِ ورناھیں بچّ گار ءُ بیگواہ۔۔۔۔۔۔۔۔۔آ پہ اِیمنی کُج ءَ نشت کنت۔
ماسٹر بلوچے اَت، پمیشکا آئی ءَ زانتگ اَت کہ آئی ءِ بچّ ھما سیاہ ءُ تھاریں کُوٹیاں، ناشناسیں دیوالانی تہ ءَ بند اِنت کہ اُود ءِ پانپا اِنسان ءَ چہ گیش دْرندگ اَنت۔
پد ءَ یک روچے آئی ءِ بچّ آجو بوت۔
بے توار۔۔۔۔۔۔۔نزور۔۔۔۔۔۔ھیالانی تہ ءَ گار ءُ بیگواہ۔۔۔۔۔۔۔۔، آئی ءِ سرجمیں بالاد ٹپّ ءُ ٹور اَت۔۔۔۔۔۔، آئی ءِ ارواہ اَنچو دمبردگ اَت گْوش ئے آئی ءَ کرنانی سپر جتگ ءُ اَتکگ اَت۔ مات ءَ آئی ءِ پیشانی چُک اِت، ماسٹر ءَ آ وتی امبازاں زُرت، بلے نی آ ھما پیشی مردم نہ اَت کہ زندان ءَ چہ پیسر بیتگ اَت۔
آئی ءِ زھگ مٹ بوتگ اَت۔ آئی ءَ کندگ ویل کُتگ اَت، جُستانی پسّو کنگ ءَ تُرسگ ءَ اَت ءُ آئی ءِ چمّانی واب بیگواہ اِت انت۔ بس آئی ءِ ٹپّ ءُ ٹوریں بالاد واتر بوتگ اَت، آئی ءِ ھر چیز ھما زندان ءِ تھاریں کُوٹیانی تہ ءَ پشت کپتگ اِت اَنت۔
بلے! پہ ماسٹر ءَ ھمے گنج اَت کہ آئی ءِ بچّ واتر اَتکگ اَت، بلے اے گُلامیں اَھد ءُ زمانگ ءَ وشی کُج اِنت کہ ماسٹر دائم ءَ گَل ءُ شادان بہ بیت۔ مروچی لھتیں ماھاں پد آ پد ءَ ماسٹر ءِ دستاں چہ پُلگ بوتگ اَت۔ اے بری زور بیگواہ نہ بوت، بلکیں توپک ءِ رگباریں تیراں آئی ءِ زندگی پچ گِپتگ اَت۔ مروچی یک رندے پد ءَ ماسٹر ھما جاہ ءَ سر بوتگ اَت کہ دو ھزار بیست ءُ سے ءِ وھد ءَ اُوشتاتگ اَت۔
آئی ءِ چم سنگ جوڑ بوتگ اِت انت، دیم گیمرتگ اَت، لرز اِتگیں لُنٹانی سر ءَ ھزاراں جُست اِت انت ءُ دل ءَ بے ھسابیں ٹپّ۔۔۔.۔۔۔۔ءُ ٹپانی تورشت۔ آئی ءِ دیم ءَ آئی ءِ چُک ءِ بے ساھیں کُنٹ اِیر اَت، بلے آ انگت وتی بچّ ءِ شوھاز ءَ اَت۔ گْوش ئے آئی ءِ تھانگ ءِ پِت اے گپ ءِ منّگ ءَ جاڑیگ نہ اَت، کہ ھما بچّ مُدّتے ءَ پد واتر بوتگ اَت آ بچ من مُدامی گار کُتگ۔۔۔۔۔۔ھو پہ مُدامی گار۔۔۔۔۔۔۔
نی آ پت دُنیا ءَ نہ، بلکیں اَچ وت ءَ جُست ءَ اَت: کہ منی بچّ پمیشکا واتر بوتگ اَت کہ آئی ءَ تیر باران بہ کن اَنت۔۔۔؟
منی بچّ ءِ آجوئی ءِ مُز ھمیش اِنت۔۔۔؟
آئی ءِ چمّانی تہ ءَ بے تواری یے چیھال جنان اِنت، اَنچیں چیھالے کہ اے گنگ ءُ کوریں دھر ءَ کس اِش کُت نہ کنت۔ اے ھما چیھال اِنت کہ گُلزمین ءِ ھر کُنڈ ءَ شِنگ ءُ تالان اِنت۔ اے چیھال ھما مات ءُ پِتانی دل ءَ چول وران اِنت کہ آیانی تاسپیں بچّ پیسر ءَ آوار جَنگ ءَ پد گار ءُ بیگواہ کنگ بنت، پد ءَ آ لاشانی دْروشم ءَ گس ءَ سر بنت۔
اے کسہ نہ اَنت۔۔۔۔.۔۔۔۔۔۔، بلکیں اے گْواچنیں راستی اَنت۔
