نبشتہ کار: میجر کاسم
تو ، من ءُ زمین ، منی دل ءَ ھر سئینانی مھر یکین اِنت۔
’’ چی پیم ءَ زان ئے ؟ ‘‘
پمیشکا کہ تو اے سرزمین ءِ سر ءَ ودی بیتگ ئے ءُ چہ ھمے زمین ءِ وشبوئیں ھاک ءَ جوڑ بیتگ ئے۔ ھر جاہ کہ من ترا گند آں من ھمے سما کن آں کہ تو چہ من نزیک ئے ۔ ھما کہ چہ من بھ جتا نہ اِنت۔
گپ ایش اِنت کہ ھر جاہ منی چم اے زمین ءِ ھاک ءَ کپ اَنت ، من ھمے سرپد بہ آں کہ تو منی ھمراہ ئے _گڑا چہ اے زمین ءَ جتا نہ ئے۔
ھر جاہ بہ بہ آں بلے زمین ءِ سر ءَ آں زمین منی ھمراہ اِنت ۔ ءُ آ چیز کہ ھمراہ اِنت آ یات نیئت پرچا کہ یات ھما چیز بیت کہ تو شموشتگ، شموشتگیں چیز بزاں ترا گون نہ اِنت ۔ ءُ آ کہ ھمراہ اِنت گڑا آئی ءِ یات ھم نئیت، اگاں یات کئیت گڑا بزاں کہ تئی ھمراہ نہ اِنت۔
بنکی گپ ایش اِنت کہ تو منی ھمراہ ئے ھما اِنت من چم پچ کرتگ اَنت ترا دیستگ ، پد ءَ چہ تو جتا نہ بیتگ آن ءُ ناں کہ بہ آں۔من اگاں مرت آں ھم پد ءَ ھمے زمین ءِ سینگ ءَ تل کن آن ءُ گوں وشبوئیں ھاک ءَ ھوار بہ آں۔
اے زمین اِنت کہ من ھچ بر نہ شموشتگ ءُ یات ھم نے اتکگ ، ھر وھد ءَ گوں من ھوار بیتگ۔ تو ھم ھمئے وڑ ءَ گوں من ھچ بر جتا نہ بیتگ ئے تئی ھم یات من ءَ ھچ بر نے اتکگ اَنت۔ پرچا کہ تو منی زمین ءِ وشبوئیں ھاک ئے ءُ اے وشبوئیں ھاک من ءَ ھر جاہ گون اِنت تو ھمے وڑ ءَ ھر جاہ من ءَ ھمراہ ئے ۔
ھما وھد ءَ تو من ءَ یات کائے کہ من چہ اے زمین ءَ جتا بہ آن ءُ جتا بیتگیں چیز پد ءَ یات کنگ نہ بیت ۔ من اگاں یات کنگ بہ بہ آں بزاں کہ بیھال نہ بیتگ آں ۔تئی مھر ءُ زمین ءِ مھر ھردو منی دل ءَ برابر اَنت۔ ھچ کم ءُ گیش نہ اَنت پرچا کہ مھر مھر اِنت کم ءُ گیش نہ بیت۔ اگاں کم ءُ گیش بیت گڑا بزاں ترا مھر نہ اِنت بس ترا دوست بیت ءُ دوست مردم ءَ باز چیز بیت بلے مھر گوں باز ءَ نہ بیت مھر گوں یکے ءَ بیت۔ پمیشکا گْوش اَنت کہ تئی ءُ زمین ءِ مھر یک اِنتءُ چہ شمئے مھراں ھچ چہ دومی ءَ گیش ءُ کم نہ اِنت ۔ھر کج ءَ ئے ، ھوار ایں من، تو ءُ زمین۔
بلے بنکی گپ اِش انت کہ من ، تو ءُ زمین اے چوش جتا جتا بیگ ءَ اَنت۔ اے درست یلہ کنگ بہ بہ اَنت، گار کنگ بہ بہ اَنت ءُ چوش گْوشگ بہ بیت کہ ’مھراں ھوار ایں‘ پرچا کہ مھر یکے بیت من ، تو ءُ زمین سئے ئیں جتا جتا کنگ بیگ ءَ این ءُ جتا جتا بیگ ءَ مھر نہ گْوش اَنت۔ آئی ءَ کہ مھر گْوش اَنت، آ جتا نہ بہ اَنت۔ تو ، من ءُ زمین ھچ نہ ایں درست ءَ چہ وش تر ءُ شرتریں چیز ھما اِنت ناں تو ئے ناں من آں، ناں زمین اِنت ھما اِنت کہ برز برز ءِ آولی لبز اِ نت ، ھر کج ءَ ئے مھراں ھوار ایں۔
