پد ءَ ھور ایں نبشتہ کار منزور آدل

زی ھور بوت ءُ مرچی پد ءَ ھم ھور انت۔۔

اے ساھت ءَ من کہ اے کاگد ءَ نبشتہ کنگ ءَ آں اے ساھت روچ ءِ پنچ ءُ سے انت، ما ھپت سنگت ایں یک پلاسٹکے ءِ چیر ءَ نشتگ این ءُ ھر سنگت ءَ پلاسٹک ءَ را دست سَکّ کُتگ، ھور دل ءِ تب ءَ رچگ ءَ انت برے ترونگل انت  ءُ برے نہ، بلے ھور یکشل ءَ رچگ ءَ انت، کساس ءَ چِلّ منٹ ئِے  بیت۔۔

ھُور ءَ را بلاھیں گواتے ھم گون انت ءُ گوات برے تُرند بیت ءُ برے سست، چیزے سنگت ءَ پلاسٹک ءِ  لمب داشتگ انت ءُ چیزے سنگت ءَ پلاسٹک ءَ را بڈ داتگ کہ گوات ئِے سامانانی سر ءَ دورے مہ دنت۔

ھور ءِ آپ ءَ مئے پلاسٹک ءِ تھ ءَ دور کُتگ، سنگت پلاسٹک ءَ  آپشون کنگ ءَ انت ءُ ٹیلگ جان ءَ چو مُدامی وڑ ءَ آرتی پلاسٹکے سر ءَ کُتگ ءُ ھور ءِ سر ءَ برے پلاسٹک ءِ اے دیم ءِ  آپشون ءَ شر کنگ ءَ انت ءُ برے آ دیم ءِ بزّگ ءِ دُراھیں گُد ترّ انت، ترونگل ئِے سر ءِ توک ءَ ٹَک ٹَک ءَ لگگ ءَ اَنت بلے ٹیلگ جان اے کُلاں مان نیارگ ءَ انت ءُ ھمے جُھد ءُ کوشست ءَ انت کہ سنگت ءُ سنگتانی سامان تر مہ بہ اَنت۔

 ھور ءَ را انچیں گواتے گون کہ مئے دُراھیں ساماناں تر کنگ ءَ انت۔

سنگتانی گپ ءُ مسکرا انت،کندگ انت، ترونگل ءِ چِنگ ءُ ورگ انت، ھور ءِ درْدے روت ءُ درْدے کیت، برے اے دیم ءَ کٹاکوکیں گرندانی توار انت ءُ برے مئے سر ءِ توک ءَ، انچیں گرند ءُ گروک توبہ توبہ۔۔۔

 گوات ءَ ھم مئے پلاسٹک شیشاں پَل کُتگ، ٹیلگ جان ڈنّ ءَ  چے توار جنگ ءَ انت ءُ گُشگ ءَ انت کہ کور ءَ بلاھیں آپے آؤرتگ ھمیش انت ھور ءَ موکہ داتگ وتی پلاسٹک ءِ آپشون ءَ شر کن ات، سپاھی گُشگ ءَ انت کہ اللّہ رھم کنت، پرچا کہ سپاھی ءَ را چہ گرند ءَ سک ءَ تُرس ایت، سنگتے ڈن ءَ گپ ءَ انت کہ سے نیمگ ءَ گروک جنگ ءَ انت، دو سنگت پلاسٹک ءَ  شر کنگ ءَ انت،  ملنگو سنگتاناں ھمے گُشگ ءَ انت کہ پلاسٹک ءَ تُرند مہ کن ات کہ ترونگل ئِے ٹُنگ کن اَنت، منلگو پد ءَ ھمے گپ ءَ گُشگ ءَ انت کہ نوں من چَکُلی موسم ءُ مَکران موسم ءَ منّ آں، ملنگو پد ءَ گُشگ ءَ انت کہ مارا گرند ءُ گرونکاں دلترک کُتگ، دور ءَ چے ماڈو توار جنگ ءَ انت کہ ھرانی لچ آپ ءَ  بُرتگ اَنت، ماڈو گُشگ ءَ انت کہ ھمے تلار ءِ بُن ءَ ما نان پتکگ، ھمے تلار ءَ چے آپ سر کپتگ،

ھور انو مئے کِرّ ءَ کمو لھم انت ءُ مئے نزیک ءُ گوراں زبردست گرند ءُ گروک جنگ ءَ انت، من ھمیش آں نوں ڈن ءَ در کپگ ءَ آں پہ سیل ءُ سواد ءَ۔۔۔

من ڈن ءَ کسانُکیں چَکرے دات کور ءَ بلاھیں آپے آؤرتگ ات،  موسم سک وش ات، ھور ءَ پد ءَ شرو کُرت، من درک بست آں دیم پہ پلاسٹک ءَ۔۔۔

سنگتے شُتگ ات کنور جاہ ءَ پد ءَ آتک گُشگ ءَ انت کہ گوشتانی منجل چہ آپ ءَ پُرّ انت، بوت کنت کہ کسانیں منجل ءُ یک تالے ءُ کرہ آپ ءَ بُرتگ انت، پرچا کہ اے منجل ءِ کرّ ءَ نہ اَنت، اگاں دگہ سنگتے ءَ دگہ جاھے ایر کُتگ انت و کُتگ اَنت، اگاں نہ گُڑا آپ ءَ بُرتگ اَنت۔

اے ھور انچو آتک کہ مارا ھچّ موکھے  نہ دات، پمیشکا مئے بازیں چیزے چو گڑ ءُ منج بوت۔۔

پد ءَ ھور انت ءُ مئے دیوان ءُ کچاری برجاہ انت۔۔۔۔۔۔۔۔

7/6/2024