بلوچستان ءِ آجوئی، لس مھلوک ءُ اِستان

نبشتہ کار: بابا بلوچ

بلوچستان ءِ آجوئی ءِ پند دو روچی پندے نہ اِنت، مرچی اے پند ءَ ھپتاد ءُ پنچ (75) سال ءَ گیش اِنت کہ روان اِنت۔ تھر تھر ءَ گْوزان ءَ اے پند مرچی انچیں جاھے ءَ سر اِنت کہ پد کِنزگ پہ بلوچ ءَ پَشت نہ کپتگ۔ ھپتاد ءُ پنچ (75) سال ءَ پیسر بلوچاں پہ وتی پجّار ءَ جنگ داتگ ءُ مرچی ھم ھونی ئیں رنگے ءَ بلوچ پہ وتی پجّار ءَ جنگ دَیگ ءَ اَنت۔ بندات ءَ بلوچ ءَ بلکیں گوں پاکستان ءَ یکجاھی ءُ ایمنی ءَ زند گْوازینگ ءِ جار پِرّینتگ ءُ اُوستے داشتگ، بلے وھد ءَ پدّر کنان کُتگ کہ پاکستان بلوچ ءَ شرپداریں زندے ءِ دَیگ ءَ ساڑی نہ بوتگ ءُ بلوچ ءَ ایردستے لیک اِتگے ءُ وتی زورآوری برجاہ داشتگ اَنت۔
اگاں بابو نوروز ھان (بابو نوروز خان) ءِ ھبر ءَ بہ کن ایں، بابو ءَ بلوچستان ءِ آجوئی ءِ جار نہ پرّینتگ بلے پہ بلوچ ءِ شرپ ءُ اِزت ءَ جنگ داتگ۔ وھدے ھان اھمد یار ھان (خان احمد یار خان) بے شرپی ءَ گوں بندیگ کنگ بیت گُڑا بابو پہ ھان ءِ آجوئی ءُ بلوچستان ءِ شرپ ءَ دیم پہ کوھاں روت۔ بابو ءِ لوٹ بلوچستان ءِ آجوئی نہبیت ءُ نیکہ چہ پاکستان ءَ سندگ ءِ واھشتے دار اِیت۔ بلے اے بے رھمیں اِستان بابو نوروز ءَ گوں آئی ھمراھاں کُران ءِ اُوست ءَ جھل ءَ کاراِیت ءُ بندیگ کنت۔ بابو آجز ءُ پیر بیت ءُ بندیگجاہ ءَ شھید بیت۔
بابو ءِ شھیدی ءَ پد بلوچ ءِ زھرگ پہ اِستان ءَ گیشتر ودّ اِیت ءُ پہ پجّار ءُ شرپ ءَ تْرند تریں جنگے جنرل شیرو مری بِندات کنت۔ اے جنگ ھم پہ بلوچستان ءِ آجوئی ءُ وتواجھی ءَ نہ بیت۔ اِستان انگہ بلوچ ءِ گوش دارگ ءَ ساڑی نہ بیت ءُ بلوچ ءِ ایردستی ءَ گیشتر ودّین اِیت۔ وھدے اوّلی رند ءَ بلوچستان ءِ جمھوری ھکومت بیت ( نیپ ءِ ھکومت ) اے ھکومت پہ بلوچ ءَ ھکّ ءُ برابری ءِ لوٹ ءَ کنت، استان دوبر پندل ساز اِیت ءُ ھکومت ءِ مردماں بندیگ کنت۔
دیمتر ءَ 1974 ءِ دْھک ءَ کوھلو کاھان ءَ لس مھلوک ءَ چو دلوت ءَ کُش اِیت دور دنت، چمالنگ ءِ بلوچ زالبولاں پہ نِھادی ءَ بارت۔ اے وھد ءَ ھم اِستان ءِ گور ءَ بلوچ ءِ جیڑہ ءِ توجیل تھنا زورآوری بیت۔ وھدے بنگلادیش چہ پاکستان ءَ سِد اِیت، گُڑا پاکستان بلوچستان ءَ چو کالونی یے ءَ چار اِیت، پرچا کہ پنجاپی ءِ نپسیات اِنت کہ آ ھر وھد ءَ وت ءَ زورآور لیک اِیت ءُ دومی ءَ ایردست ، ھمے رنگ ءَ پد ءَ بلوچستان ءَ بِندات کنت۔
پنجاپی گْوش اَنت کہ بلوچستان ءِ دیمروئی سرداراں داشتگ ءُ سردار نئیل اَنت کہ بلوچستان ءَ وانگجاہ ، دگ ءُ ھسپتال جوڑ بہ بیت، بلے ھمے سردار پہ پوجی بُنجل ءِ جو! بوَگ ءِ وھد ءَ اڑاند نہ بنت۔ یک بلائیں وھدے 1977 ءَ رند بیت کہ ھچ بلوچ گھگیری نہ کنت ءُ ھچ سردار پہ اِستان ءَ اڑاند نہ بیت، بلے انگہ بلوچستان ھما بلوچستان بیت کہ 1948٫1958 ءُ 1974 ءَ بیت۔ اِستان بلوچستان ءِ دیمروئی ءِ ھک ءَ نہ بیت ءُ پد ءَ بُھتام جنت کہ بلوچ وت وتی دیمروئی ءِ ھک ءَ نہ اَنت۔
اے درستیں زھرگی لھڑ بلوچ ءِ اندر ءَ ودّان کنت ءُ 2002 ءَ رند دوبر یک ھونواریں گھگیری یے بندات بیت ءُ روچ ءِ مرچی اے مستریں گھگیری اِنت کہ جُنزان اِنت۔ مرچیگیں گھگیری ءَ اے پدّر کُتگ کہ بلوچ ءِ لوٹ گوں پاکستان ءَ پیلو نہ بنت ءُ بلوچ پاکستان ءِ یکجاھی ءَ شُت نہ کنت۔ بلوچ مرچی وتی وتواجھی ءَ لوٹ اِیت ءُ اے وتواجھی ءِ لوٹ انچو یکدم نیاتکگ، ایشی ءِ پُشدر ءَ دُرستیں جھد، گھگیری، اِستانی بے شرپی ءُ بلوچ ءِ بزّگیانی کِسہ ھوار اَنت۔ اے بلائیں پند چوں بے راھبندیں اِستان ءَ گوں پروش دَیگ بیت۔ مرچی بلوچ ءِ سرپدیں مھلوک اے جنگ ءَ ھوار اِنت ءُ اے سرپدیں مھلوک ھما اَنت کہ یک وھدے اِستان ءِ دیم ءَ اتکگ ءُ جیڑہ ءِ توجیل لوٹ اِتگ بلے اِستان ءَ لوٹانی گوش دارگ ءِ بدل ءَ گوں توپک ءُ سانکلاں پسّو داتگ۔
مرچی اے بیست سالی ئیں جھد ءَ بلوچاں وتی راہ گیشّینتگ ءُ آجوئی ءِ جار پِرّینتگ۔ اے آجوئی ءِ جار پیسری جھداں نہ بوتگ، بلے پیسری جھدانی درونت ءُ برورد اِنت۔
ھمے آجوئی جھد ءِ میان ءَ اِستان ءُ بلوچ لس مھلوک دیم پہ دیم اَنت پرچا کہ آجوئی لوٹوکیں بامرداں گوں اِستان دیم پہ دیم بوت نہ کنت۔ اِستان لس مھلوک ءَ آجوئی ءِ لٹّ ءَ جَنَگ ءَ اِنت۔ اِد ءَ اِستان وتی بے سوبی ءَ پیش دارگ ءَ اِنت کہ لس مھلوک ءَ کُشگ ءُ دور دَیگ ءَ اِنت۔ پہ اِستان ءَ اے سکّیں بلائیں لانت ئے کہ اگاں تو اے لس مھلوک ءَ جن ئے، اے لس مھلوک کسے ءِ چُک اِنت، کسے ءِ برات اِنت، کسے ءِ سنگت اِنت۔ اگاں تو یکے کُش ئے گُڑا آئی بندوکیں مردماں چون کن ئے؟ اے پَشت کپتگیں مردم پرتو مھروان بنت؟ اے چتو ترس اَنت؟ اگاں کسے ءِ برات ءَ تو شھید کن ئے، آ وتی برات ءَ بیھال کنت؟ یک آدمے ءَ وتی زند گوں یک دوستیں مردمے ءَ گْوازینتگ، آئی کسانی ءِ یات گوں آئی بندوک اَنت، کندگ، گریوگ، گردگ ءُ نزّیکی، تو اِشاں چوں پُل اِت کن ئے؟ اے پشت کپتگیں یات پرتو پُلّ نہ ریچ اَنت، اے پرتو کھر جوڑ بنت۔ اے نازاکیں ورنا کہ ماتاناں پہ چارگ ءَ شات نہ بنت، گرمیں گوات پہ اِشاں شات نہ بیت ماتاں، ھمیشاں برے سالانی سال گار کن ئے، ژانگولیں لاشاں گریشگ ءُ کَوراں چگل دئے، گُڑا اے مات چونیں مات بنت؟ اے ھما ماتاں ھوار بنت کہ وتی گُڈی ساہ ءَ تئی نیست ءُ نابودی ءِ دُوا ءَ کن اَنت۔
2010 ءِ زمانگ ءَ اِستان بلوچ ءِ گھگیری ءِ لگتمال کنگ ءَ پہ لس بلوچ ءِ کوش ءَ بِندات کنت، ھر میتگ ءُ ھر کُٹم ءِ بے میاریں بلوچاں کُشان کنت۔ اِستان بلکیں ھمے مار اِیت کہ پہ کوش ءَ آ بلوچ ءَ دار اِیت، بلے 2010 ءِ زمانگ وت شاھدی دنت کہ اے کوش ءَ چنچو بلوچ ءِ جُھد توانگر جوڑ کُت ءُ مرچی بلوچ راجی جُنز ءِ تاگت ھمے اِستانی کوش ءِ برورد اِنت۔
مرچی پد ءَ اِستان ءَ دوبر اے رِپک زرتگ ءُ لس بلوچ ءَ کُشگ ءَ اِنت۔ اِستان ءِ دیم ءَ گْوستگیں دور وت درورے بلے انگہ دوبر اے کارپداں کنگ ءَ اِنت، ایشی ءَ چہ زانگ بیت کہ اِستان ءِ گور ءَ نوکیں ھچ پالسی نیست کہ بلوچ ءِ گھگیری ءَ لگتمال کُت بہ کنت ءُ لس بلوچ ءِ کوش بلوچ ءِ گھگیری ءَ گیشتر تاگت دنت، گیشتر سرمچار دنت، گیشتر کار پرمائیت ءُ گیشتر مھکم کنت۔