نبشتہ کار: بھادر بلوچ
بی این ایم راجی آجوئی جُنز ءِ پاسبان ءُ توار اِنت، بی این ایم آجوئی جُنز ءِ براہ ءُ شان اِنت، بی ایس او ءَ مارا رودینتگ بی این ایم ءَ زندگ داشتگ۔ بی این ایم ءَ بہ پلگار اِت، بی این ایم ءِ کوپگ جوڑ بہ بہ اِت، بی این ایم ءِ رھشون ءُ باسکاں گوں وتی ھوناں بی این ایم گوناپ داتگ ءُ سبزینتگ، ھمے سبزینتگیں کِشارانی پاسبانی کنگ بلوچ راج ءِ زمہ واری اِنت۔ ھوناں گوں گوناپ داتگ ءُ مینتگیں ھمے کشارانی بر آجوئی اِنت۔ آجوئی ءِ واستا بی این ایم ءِ راھشون ءُ باسکاں ھوار دگہ ھزاراں بلوچاں وتی سر ندْر کتگ ءُ کُربان بوتگ اَنت ءُ دگہ ھزاراں سر دُژمن ءِ ٹارچرسیلانی تہ ءَ بندیگ اِنت کہ ھمے بندیگانی تہ ءَ بی این ایم ءِ باسکاں ھوار راھشون ڈاکٹر دین جان ھوار اِنت۔
بی این ایم ءِ راھشون واجہ گلام مھمد، لالا منیر، سمد تگرانی، کماش رزاک گل، ڈاکٹر منان جان گوں پنچ سنگتاں ھوار دگہ بازیں راھشون ءُ باسک ندر بوتگ اَنت ءُ اگاں انوگیں وھد ءَ بہ چاریں بی این ایم ءِ راھشون واجہ دوستا جان گون وتی زالبول ءَ ھوار کسان ءُ نُنکیں زھگاں پہ زمین ءَ ندر ءُ کُربان بیت کہ آئی لوگ ءِ سر ءَ دژمن بمبگْواری کنت ءُ دنیا ءَ ھمے جار ءَ پرّینیت کہ من سرمچارانی بگیر ءَ ”مرگ بر سرمچار آپریشن“ لانچ کتگ، لھتیں وھد پیسر بی این ایم ءِ یلیں ھمبل چیئرمین زبیر جان گوں سنگتاں دالبندین ءَ لوگ ءِ تہ ءَ شھید کنگ بیت۔ ھمے کِلیں شھیدانی دیمونیانی برورد اِنت کہ مرچی بلوچستان اے کلیں دمگانی تہ ءَ بی این ایم انچوش توانمند ءُ مھکم جوڑ بوتگ کہ نوں بی این ایم ءِ پْروش دیگ چہ دُژمن ءِ وس ءَ ڈنّ اِنت،
بندات ءَ بہ گِر داں روچ ء مروچی دژمن ءَ پہ بی این ایم ءِ پروش دیگ ءُ کاؤنٹر کنگ ءَ ھمک رنگیں پندل ساز اِتگ ءُ پروپیکنڈہ مھم بندات کتگ۔ بی این ایم ھستیں راھشونانی سر ءَ ھمک وڑیں دُروگیں بھتام جتگ دانکہ بلوچ راج ءِ دل چہ بی این ایم ءَ بہ پْروش اِیت، دُژمن کواس، تجزیہ نگار، شھزانت، شوربندی ٹھینوکانی (منصوبہ سازانی) گْوشگ مدام ھمیش اِنت کہ اگاں بلوچ آجوئی جُنز پروش دیگی اِنت گُڑا لس مھلوک ءَ چہ بلوچ آجوئی جُنز ءِ راھشون ءُ چہ پارٹیان بہ سِند آیانی مجگ ءُ دماگاں بدل کن دانکہ بلوچ راج چہ آیاں دلپروش بہ بیت ءُ لس مھلوک ءِ تہ ءَ نااِمیتی ءُ دلرنجی پیداک بہ بیت ءُ آجؤئی جُنز ءِ ھستیں رھشون ءُ گل وت ماں وت ءَ پْرشت ءُ پْروش، نزور بہ بنت۔
پمیشکا مرچی دُژمن ءَ ھزاراں مھلوک پہ وت اے واستا داشتگ ءُ آیانی سر ءَ بے کساس زر ھرچ کنگ ءَ اَنت کہ آ پروپیکنڈہ بہ کن اَنت، بی این ایم ءِ بگیر ءَ دُژمن ءَ وڑ وڑیں رِپک ءُ پندل ساز اِتگ دانکہ راجی جُنز نِزور بہ بیت، بلے اے توامیں چِست ءُ ایرانی دیم ءَ بی این ایم چو مھکمیں چیدگے ءَ میلانک بوتگ ءُ راستی ءِ پیگام داتگ۔ ھمے راستی ءِ پُژدر ءَ بی این ایم ءَ وتی رھشون ءُ باسکانی دیمونی داتگ ءُ انگت پہ منزل ءِ پاند ءَ جُنزگ ءَ اِنت۔ پمیشکا مارا بلوچ راج ءِ ھر پُسّگ ءَ را پہ وتی راجی باندات ءِ سمبھینگ ءَ بی این ایم ءِ ھواری ءَ راجی زْرمبشت مھکم کنگی ءُ دُژمن ءِ ھر پندلانی دارگی ءُ بے سوب کنگی اَنت۔
دُژمن گوں وتی مکراں لس مھلوک ءِ زھناں ٹگلینگ ءِ ناکامیں کوشست کنت، چاگردی رسانکدر ءَ راھشونانی مْیان ءَ دوری پیداک کنگ ءِ جھد کنت ءُ پارٹیانی تہ ءَ پْرشت ءُ پروش ودی کنگ لوٹ اِیت ءُ بی این ایم ءَ آ یک برے پد ءَ گوں تْرندی کاؤنٹر کنگ لوٹ اِیت، بلے نوں دژمن ءِ اے ساز اِتگیں پندلاں بلوچ راج پوہ ءُ سرپد بیت ءُ چو پیسریگین پیم ءَ بی این ایم ءِ کاؤنٹر کن ءَ بے سوب بیت۔
دُژمن ءَ مدام آجوئی لوٹوکیں گل ءُ راھشونانی بگیر ءَ پندل ساز اِتگ ءُ پروپیکنڈہ کتگ کہ اے کاراں روچ ء مروچی گوں تْرندی ءَ کنگ ءَ اِنت۔ بی این ایم ءِ نمیرانیں راھشون واجہ شوکت بلیدی ءِ بگیر ءَ ھما زمانگ ءَ ھمے پیم ءَ دژمن ءَ پروپیکنڈہ بندات کتگ اَت ، وھدے کہ واجہ شوکت بلیدی چہ دژمن ءِ زوراکیاں وتی دمگ ءَ یل کنت ءُ روت پہ گمنامی پارٹی ءِ کار ءُ جنز ءِ کاراں دیم ءَ بران کنت گُڑا دژمن وتی چیر ءُ اندریں چارِیگ ءُ چریکانی پارِست ءَ واجہ ءِ ھند ءُ دمگءِ تہ ءَ ھمے پروپیکنڈہ ءَ بندات کنت کہ واجہ شوکت لگور بوتگ ءُ پہ من چیر ءُ اندری کار کنگ ءَ اِنت ءُ آ واجہ ڈاکٹر اللہ نزر ءَ جنائینگ لوٹ اِیت۔
دژمن اے پروپیکنڈہ ءَ پمیشکا کنت دانکہ واجہ ءِ دمگ ءِ آجوئی لوٹوکیں مھلوک چہ واجہ شوکت ءَ دلپروش بہ بنت ءُ وتارا چہ بی این ایم ءَ گِستا بدار اَنت، چہ دژمن ءِ اے پیسریگیں پروپیکندہ ءُ زوراکیاں بہ گر داں روچ ءِ مروچیگیناں در ءَ ھمے زانگ بیت کہ بی این ایم بندات ءَ بہ گر داں روچ ء مرچیگ ءَ دژمن ءِ دیم ءَ میلانک ءُ مھکمجں پدیانک بوتگ ءُ ھست اِنت ءُ بلوچ آجوئی جُنز ءِ مستریں سیاسی گل اِنت، بی این ایم ءِ راھشوناں بہ گر داں باسکاں دُرس پہ زمین ندر بوتگ اَنت، زندانی کنگ بوتگ اَنت ءُ انگت پہ زمین ءَ ندر ءُ زندانی بوَگ ءَ اَنت، بلے انگت بی این ایم پُشت ءَ پدکنز نہ بوتگ ءُ مروچی انگت ماں گراؤنڈ ءَ جوانیں رنگے ءَ مھکم ءُ نوکیں شونداتاں کار کنگ ءَ اِنت۔ وتی کاراں دیم ءَ برگ ءُ جنزگ ءَ اِنت، راج ءِ ھمراھداری کنگ ءَ اِنت ءُ بی این ایم گون راج ءَ ھم پت ءُ ھم کوپگ اِنت۔
