نبشتہ کار: ھنیپ بلوچ
دیمونی وھد ءِ ھمراھی ءَ ھلاس نہ بیت، بلکیں پہ آؤکیں پدریچ ءَ مادنیں راھے نشون دنت۔
بلوچ سرڈگار ءِ ھاک مدام گوں وتی بچانی ھوناں سبز بیتگ۔اے سرڈگار چہ کرناں پہ وتی آجوئی ءُ ھستمان ءَ جُھد کنگ ءَ اِنت۔ھر زمانگ ءَ اے زمین ءِ بچاں پہ وتی سرڈگار ءِ پھریزگ ءَ وتی جان ندر کُرتگ اَنت ءُ دیمونی بیتگ اَنت۔چہ ھمے بامردیں سراں یکے شھید کپٹن اتیک پنام میران جان اِنت۔میران ھوں وتی سرڈگار ءِ ھما سرمچار اَت کہ من پہ آئی ھرچی نبشتہ بہ کناں کم اِنت۔چونائی ءَ اے وڑیں مزنیں کِردانی بیان کنگ چہ ھرکسی دزرس ءَ در اِنت۔
پٹوک دشت ءِ ودی بیتگیں ورنا یک ھنچائیں مردمے نہ اَت، یک کِردے اَت کہ 2013 ءَ وھدے کہ گوں بلوچستان لبریشن پرنٹ( بی ایل ایپ) ءَ ھوار بیتگ اَت،چہ ھما روچاں آئی ءِ تگ ءُ تاچ ءُ کار پہ گل ءُ بلوچ جُھد ءَ ستا ءِ مھتاج نہ اَنت۔ میران ءِ یک مستریں شری یے ھمیش اَت کہ آئی دمبرگ نہ زانت۔کجام وھد ءَ کہ تو دیست داں پارٹی ءُ پہ آئی ءِ جُھد ءَ پریشان اِنت، جیڑگ ءَ اِنت کہ چوں بہ کن ایں کہ دژمن مئے زمین ءَ یل بہ کنت ءُ پہ مدامی چہ مئے ھاک ءَ در ایت۔ اے گپ آئی ءَ وتی شھیدی ءَ چیزے روچ پیش گوں من گْوشتگ اَت کہ نوں باز کار کنگی اِنت، وت ءَ ٹیٹ کن اِت ءُ شریں تیاری یے بہ کن اِت۔بلے من نزانتگ اَت کہ گوں میران اے گپ آئی ءِ گُڈّی گپ بنت ءُ پد ءَ ھنچیں راھے مارا نشون دنت کہ اے راہ مئے منزل ءُ جُھد ءِ لوٹ اِنت۔
مھاتما گاندھی ءَ گْوشتگ کہ
“آ آجوئی ءَ ھچ بستار نیست اگاں آئی ءِ تہ ءَ دیمونی ھوار مہ بیت۔”
میران ءَ ھمے لیکہ وتی زندگی ءِ بھر جوڑ کرتگ اَت۔آئی پہ وت ءَ آسراتی ءُ ایمنی نہ لوٹ اِت بلکیں پہ وتی راج ءُ زمین ءَ وتی جان ندر کُت ءُ یک راھے پہ ھر بلوچ ءَ نشون دات کہ آجوئی بے دیمونی ءَ ھچ وڑ ءَ بوت نہ کنت۔
وھدے کہ 2014 ءَ میران پارٹی ءِ پیسلہ ءِ بنیاد ءَ کوہ ءَ کیت۔کوہ ءِ بزگی، گژن ءُ پیادگی، دگہ بازیں جنجالاں میران پروش دات نہ کُت بلکیں گیش مھکم کُت۔آئی ءِ چم پہ آجوئی ءَ سک اَت۔ میران چہ ھما بامرداں یکے اَت کہ پہ آئی ءَ زمین ءُ راج ءِ آجوئی ءِ واھگدار اَت۔
نیلسن منڈیلا گْوشتگ اَت کہ
“آجوئی ءَ ابید زندگی چو بے جانیں ارواہ ءَ اِنت۔”
میران ءَ پمشکا ھر وڑیں جنجالانی دیمپانی کُت ءُ داں گُڈی دمان ءَ وتی لیکہ ءِ سر ءَ اوشتاتگ اَت۔
میران ءَ شھری ءُ کوھی دوئیں پِڑاں وتی کِرد پہ مردی پیلو کُت۔
جان ایپ کینیڈی ءِ گپے یات اَت کہ آئی گْوشتگ اَت
“آجوئی بے بھائیں چیدے، بلے ھما مردم کہ دیمونی دیگ زان اَنت، آ گْوستانک ءِ بامرد بنت۔”
کیپٹن میران چہ ھما راجی بامردان اِنت کہ آیاں وتی زندگی پہ راجی جُھد ءَ سلاھے جوڑ کُتگ ءُ وتی سرڈگار ءِ پھریزگ ءَ گوں دژمن ءَ دیم پہ دیم اَنت۔
16 ستمبر ءَ کنچتی دوراھی دشت ءَ وھدے کہ سرمچار زورگریں لشکر ءِ کاروان ءِ سر ءَ اُرش کن اَنت،گڑا میران ءُ آشوب جان پہ جوانمردی گوں دژمن ءَ جنگ دے اَنت ءُ وتی آدگہ ھمبلانی کشگ ءَ وتی جاناں ندر کن اَنت۔ اے جوزگ مارا چہ وتی بُن ءُ بیھ ءَ گون اِنت کہ بلوچاں مدام پہ وتی ھمبلانی رکینگ ءَ وت ءَ دیم ءَ داشتگ۔ میران ءُ آشوب ءَ ھوں ھمے ربیدگ زندگ داشت ءُ وت پہ مُدامی نمیران بوت اَنت۔
چے گویرا گْوشتگ اَت کہ
“من مہ باں منی جاہ ءَ دگہ یکے کیت،چے ءَ کہ من یک کسے نہ آں بلکیں یک لیکھے آں۔”
میران ھوں ھمے لیکہ ءِ مردم اَنت۔آئی ءَ وتی جان مدر کُت بلے پہ راج ءَ یک کلوھے اِشت کہ دیمونی راجی آجوئی ءِ مانزمان اِنت۔
نمیرانیں میران جان ءِ دیمونی یک دمانے نہ اِنت بلکیں یک گْوستانکے۔آئی ءِ گیر اے گپ ءِ شاھدی ءَ دے اَنت کہ آجوئی ءِ راہ مشکل اِنت بلے پہ راہ ءَ ریتکگیں ھون راجانی کسمت نبشتہ کنگ بیت۔
وِنسٹن چرچل ءَ گْوشتگ اَت کہ
“دیمونی ءَ ابید ھچ راج زندگ بوت نہ کنت،دیمونی ھما بنکی لوٹ اِنت کہ چہ ھمیشے ءَ آجوئی ءِ کلات مِک بیت۔”
میران ءِ کلوہ ھمیش اِنت کہ دیمونی کارے نہ اِنت بلکیں یک لیکھے،کہ راجاں چہ ایردستی ءِ کید ءَ آجو کنت۔
مرچی نمیرانیں کیپٹن میران ءِ نام پہ بلوچ سرڈگار ءِ پُسگاں مادنیں راھے۔ نوں گوں ما ھوار نہ اِنت بلے آئی ءِ دلبڈی،جوانمردی ءُ پہ جُھد ءَ آئی ءِ کِرد ءُ دیمونی مدام گوں ما ھمراہ ءُ ھمکوپگ اَنت۔
آئی ءِ ھون پہ آؤکیں پدریچ ءَ مادنیں کشکے۔
