بلوچ گْوریلہ جنگ ءُ کھر ءِ یونٹ

نبشتہ کار: ماہ جبین بلوچ

گوریلہ جنگ ھما دْراجیں جنگاں گْوش اَنت کہ یک نزور ءُ گلامیں راجے پہ وتی راجی آجوئی ءَ کبزہ گیر ءِ ھلاپ ءَ جنگ بہ کنت۔ ماں اِے جنگ ءَ دوئیں پاٹیانی وتی مول ءُ مُراد اَنت انچوش کہ کبزہ گیر سرپد اِنت من یک انچییں راجے ءِ سر ءَ اُرش ءُ کبزہ کنگ ءَ آں کہ منی پوج آئی ءِ کوہ، دمگ، دگ، دود ءُ زبان ءَ سرپد نہ اَنت۔ منی ناشُناسیں لشکر چہ اُرش ءَ پیش لھتیں کاسگچٹ ھم بھا زُور ایت، گوریلہ جنگ ءِ اُرش تْرُند بنت پمیشکا ملیٹری ءُ آیکنومک لاز ءَ ھوار کبزہ ءِ ھرچ ھم سک باز ود اِیت ءُ ھمے ھرچاں برابر کنگ ءَ گلامیں راج ءِ مڈّیاں لُٹ پُل بہ کن، گلامیں راج ءِ سر ءَ زُلم بہ کن کہ آئی ءِ تہ ءَ تُرس ءُ بے وسی بہ بیت، راج ءِ زبان ءَ ھلاس کن کہ آ راجدوستی ءَ مہ مار اِیت۔

دومی نیمگ ءَ چہ دُژمن ءِ زُلم ءُ زوراکیاں راج وتی راجی آجوئی ءَ پاد کئیت ءُ گلامیں راج ءِ گیرت مندیں ورناہ پہ وتی راجی آجوئی ءَ یکجاہ بنت ءُ دژمن ءِ ھلاپ ءَ جنگ کن اَنت کہ ھمے جنگ ءَ راج ءِ دھکان، پوریاگیر، اُستاد، نودربر، ڈاکٹر، انجنئیر ءُ زِند ءِ ھمُک تک ءُ پھنات ءِ مردم ھوار بنت۔ کَسے راج ءِ تہ ءَ گُلامی ءِ ھلاپ ءَ نپرت ودی کنگ ءِ جُھد کنت، کَسے جنگ ءُ کَسے میان اوستمانی گل ءُ ترامگیجانی تہ ءَ وتی آجوئی ءِ واستا توار جِست کنت ءُ کسے زبان دوستی ءُ راجدوستی ءِ سر ءَ نبیس اِیت کہ راج وتی گُلامی ءُ بزگی ءَ بِہ مار اِیت پمیشکا ما گِند ایں بلوچ ھم پہ وتی راجی آجوئی ءَ یکشل ءَ جُھد ءَ اِنت۔

انچوش کہ ما دْراہ سرپد اِیں کہ یک کمزوریں راجے ءِ سر ءَ اُرش کنگ وَ آسان اِنت، بلے پد ءَ کوھانی تہ ءَ گوریلہ جنگ ءِ دیم ءَ اُوشتگ سک گران اِنت۔ اگاں امریکہ ویتنام ءُ اوگانستان ءِ تہ ءَ گوریلہ جنگ ءَ پروش وارت ءُ درکپ ایت، سوت یونین چہ اوگانستان ءَ تکانسر، ژند ءُ پند بیت ءُ درکپ ایت گُڑا پنڈوکیں پاکستان چون چہ 27 مارچ 1948 ءَ بلوچ راج ءِ گوریلہ جنگ ءِ جانی تاوان ءُ جنگی ھرچگاں برداشت کنگ اِنت؟ پرچا کہ دژمن ءَ مئے سر ءَ سردار، میر ءُ نواب داشتگ اَنت، پاکستان ءَ بلوچ راج ءِ زِر، ماھیگ، ٹیل، گیس، تنگو، آسن، انگر ءُ دِگہ ھزارانی کچ ءَ کدرتی مڈیانی پُلگ ءَ جنگ ءِ ھرچگ برابر کُتگ اَنت ءُ انگت ھم چہ بلوچ ءِ مڈیاں برابر کنگ ءَ اِنت۔ بزانکہ بلوچ ءِ دولت ءُ آسراتی بلوچ ءِ کوش ءُ چُکچنی ءَ کارمرز بوگ ءَ اَنت۔

البت مرچاں بلوچ راجی آجوئی ءِ جھد چہ سردار، میر ءُ نوابانی دست ءَ درکپت ءُ لس وانِندھیں بلوچ ءِ دست ءَ شُت ءُ بلوچ وانِندھاں ھم جنگی ردوم ءُ ٹیکنولوجی ءِ رِد ءَ گوریلہ جنگ ءِ تہ ءَ بدلی آؤرتگ اَنت۔ اگاں دُنیا ءِ نوکںترین یا انیگیں وھد ءَ برجاھیں جنگاں ھورت چاری بہ کن ایں گُڑا سرپد بَہ ایں کہ سال پہ سال جنگ ءِ میدان ءَ وڑ وڑیں سِلاہ کارمرز بوگ ءَ اَنت۔ جنگ ءِ نوکتریں سِلاہ جنگی ڈرون اَنت ءُ چہ ھمے ڈرونانی تہ ءَ کَسانیں ڈرون ھم ھست اَنت کہ نزوریں راجانی گوریلہ پورس سک باز آسانیں وڑے ءَ دژمن ءِ بُنجل، ملیٹری انسٹالیشن، کارگِس ءُ کارجاھاں تباہ کنگ ءَ اَنت پمیشکا اِے کَسانیں جنگی ڈرون گوریلہ پورس ءِ واستا سک المی اَنت کہ دژمن بے وس بیت ءُ چہ کبزہ گیری ءَ درکپ ایت۔

ھمے واستا ما گِند ایں کہ بلوچ راجی لشکر بی ایل اے ءَ ھم ڈرون جنگی یونٹ کھر اڈ ءُ ساز کُتگ کہ انی آیوکیں وھد ءَ کبزہ گیریں پوج ءِ بُنجل ءُ بلوچستان ءِ دِگہ لٹ پولی کارجاھاں نشانگ بہ کن ایں کہ اُود ءَ پاکستان زر کمائینگ ءُ وتی کبزہ ءَ مھکم دارگ ءَ اِنت۔

ڈرون ءَ یک مردمے بڈّ ءَ کنت، جنگ ءِ وھد ءَ تیار ءُ سنج کنان ءَ دُژمن ءِ بِلڈینگ، ملٹی بلین ڈالر ءِ انفرسٹریچکر ءُ دگہ جنگی آسراتیاں تباہ کنت۔ چوناھا گوریلہ جنگولاں پہ پاکستان ءِ نشانگ ءُ زدگ کنگ ءَ ھر وڑیں ٹارگٹ ھست اَنت کہ توری بالی پِٹ ءَ اُوشتاتگیں بالیگراب بہ بنت، ملیٹری بیس بہ بنت ءُ یا توری انڈسٹریاں زون بہ بنت کہ اُود ءَ دژمن بلوچ راج ءِ مڈیاں کَشگ ءُ زر کمائینگ ءَ اِنت۔

اِے گرانیں وھد ءِ آجوئی جنگ ءَ بلوچ راج وت ماں وت یکمُشت ءُ تپاک بات۔ بلوچستان شالا آجو بہ بات۔ آزات ھیال ءُ راجمستر بلوچستان شالا دیمروئی بہ کنات۔