ما پرچا دُور اِیں؟
نبشتہ کار: مھر اَلی مھر
من گوں آئی ءَ دیوان، گپّ ءُ تْران کنگ ءَ اِت آں، آ من ءَ چارگ ءُ من آئی ءَ چارگ ءَ اِت آں۔ ھمے مْیان ءَ من ءَ گْوشت ئے کہ برو پلاں جاہ ءَ، گُڑا من گْوشت کہ تو بیا گوں من ءَ تھنا وش نہ بیت نہ رو آں۔ ھمے گپّ ءِ پسّو ءَ من ءَ گْوشت ئے ”زان ءَ اُود ءَ دوزہ اِنت کہ تو نہ رو ئے“
من کند اِت ءُ گْوشت کہ دوزہ نہ اِنت، بلے تو گوں مہ بہ ئے بے تئیگ ءَ جنت ءَ ھم منی گُزارن نہ بیت۔ گوں ھمے گپ ءَ من ءَ سُبک سُبک ءَ شھماتے جت ءُ گْوشت ئے ”اے وڑیں گپ ءَ مہ جن، من زاناں کہ تو من ءَ انچو دوست نہ دار ئے۔“
آئی ءِ ھمے گپّ ءِ اِش کنگ ءَ پد گْوش ئے زان ءَ منی دُگنیا تھار بوت۔ پد ءَ من گْوشت کہ نیست چوشیں ساھتے کہ تو من ءَ یات میا ئے، گریوگ ءَ لگ اِت ءُ گون من ءَ گْورامباز بوت۔ گوں اے گْورامباز ءَ منی دل ھم آپ بوت ءُ من گریت ءُ پاد اتک آں۔ منی دستے گپت کہ مرو، انچو مئے گپ ءُ تْران بوان اَت کہ ناگت ءَ گوں من ءَ وتی سانگ ءِ گپے جت کہ ”من بـے وساں، منی سانگ بوتگ۔“
گوں اے گپّ ءَ گْوشے زان ءَ آزمان جھل ءَ اتک ءُ چاریں نیمگاں تاموری ءَ مانشانت۔
مزنیں مدتے ءَ پد من گوں آئی ءِ لوگواجہ ءَ مِلگّ ءِ بھانگ کُت ءُ آئی ءِ لوگ ءَ شُتاں کہ دمانے چم کپ اَنت ئِے۔ لوگ ءَ شُتاں تہ چاراں کہ لوگ ءَ دگہ کس نیست، ایوک ءُ تھنا نشتگ۔ ساھتے ءِ بے تواری ءَ پد آئی ءَ درّائینت ءُ گْوشت ”بہ نند چاہ بور۔“
من آئی ءِ گُبّانی سر ءَ دست ایر کت ءُ وتی گور ءَ آؤرت چاراں کہ ارسے رِچگ ءَ اَنت، من ءَ گْوش ئے ”برو کہ مردم وش نہ بنت، تو اگاں لوگ ءَ نند ئے من ڈَنّ ءَ در کا آں۔“
من کند اِت ءُ واتر وتی لوگ ءَ شُت آں، شپ ءَ وپتاں بلے واب نیاتک۔ من نوں گوں آئی ءِ یاتاں ننداں وتی وھد ءَ تیلانک دے آں۔ برے کندان ءُ برے گریواں، ھمے وڑ ءَ دانکہ شپ روچ بیت۔
من زاناں کہ تئی ھم ھال ھمے پیم ءَ اِنت، بـے منیگ ءَ ترا ھم واب نئیت ءُ تو اُوں گریوے ءُ من ءَ یات کن ئے۔ گوں ارسیگیں چماں بچکندگے جت ءُ گْوشت ئے ”منی جان! من ھمے واستا ترا گْوشاں کہ لوگ ءَ میا، من گْوشاں ترا اگاں کسے گپّے بہ گْوش اِیت من ءَ دوست نہ بیت۔“
بلے! من نہ زاناں کہ ما دوئیں چہ یکے دومی ءَ پرچا دُور اِیں؟ من اُود ءَ شت نہ کنان ءُ آ منی گور ءَ اتک نہ کنت۔ مئے میتگ ھم یکین اِنت، مئے لوگ ھم اِنچو دور نہ اَنت، بلے ما کہ یکے دومی ءَ برے برے ڈیک ور اِیں چہ دُور ءَ گند ءُ گدار بیت، مِلّگ نہ بیت۔۔۔۔۔
