نبشتہ کار: بانڑی بلوچ
ما منّ اِیں بلوچ یک گُلامیں راجے پمیشکا بلوچی ماں وانگجاھاں وانینگ نہ بیت بلے باید اِنت ما بلوچ وانِندہ سرپد بِہ بَہ ایں کہ مرچی ما چہ وتی موبائلاں ھم وتی راجی زبان ءَ وت دربُرت کن ایں بلے بَے ایش اِنت کہ ما وت ءَ گوں پھر ءُ ناز ءَ زبان دوست ءُ راجدوست بہ گْوش ایں، تھنا دو روچ ءَ بلوچی دَرونتاں وان ایں، بلوچی وانگ ءُ دربرگ ءِ جُھد بہ کن ایں کہ مرچاں بلوچی زبان ءِ شریں دربری(کورس) ھست اَنت۔
چوناھا ما بلوچ وت ءَ زُبان دوست ءُ راجدوست گْوش ایں۔ مارا اِے سما ھم ھست کہ بلوچی مئے راجی زُبان اِنت، زُبان ءِ وانگ ءُ نبیسگ راج ءِ تہ ءَ زبان دوستی ودی کنت ءُ زبان دوستی راجدوستی ءُ آجوئی جُھد ءِ مستریں بھر اِنت۔ بلے ما وتی راجی زبان ءِ دَرونتاں نہ وان ایں، زبان ءِ وانگ ءُ دربرگ ءِ جُھد نہ کن ایں بلکیں مُدام ماں پیسبوک ءُ دِگہ شوشل میڈیا ءَ رَد نبیس ایں۔
باید اِنت ما یک برے بلوچی دَرونتاں بہ وان ایں ءُ راست نبیسگ ءِ جُھد بہ کن ایں کہ مئے راستیں نبشتھاں بلوچی ءَ دیمروی بِہ رس ایت۔ بلوچ وانِندھے مئے نبشتھاں بہ وان ایت، چیزے ھیل کنت ءُ آئی ءِ بلوچی ھم چیزے راست بہ بیت۔ اگاں ما رَد نبشتہ بہ کن ایں گُڑا دژمن ھم مئے سر ءَ کند ایت ءُ گْوش ایت وتی جِند ءِ زبان ءَ راست نبشتہ کُت نہ کنت، وت ءَ راجدوستے گْوش ایت ءُ آجوئی لوٹ ایت۔ وتی راجی زبان ءِ وانگ ءِ دربرگ ءِ جُھد نہ کنت وت ءَ آجوئی جُنز ءِ جھدکارے لیک ایت۔
بلے بژن اِنت کہ ما تُرس ءِ آماچ ایں کہ بلوچی وانگ ءُ دربرگ گِران اِنت یا گْوش ئے کہ ما وتی راجی زبان ءِ سے ئیں درونتاں نہ وان ایں۔ اگاں ما ھر روچ تھنا سے دمان ءَ ھم بہ وان ایں ءُ پد ءَ بزان ایں کہ نبشتہ چے گْوش اَنت؟ گُڑا سے روچ ءِ تہ ءَ وتی راجی زبان ءِ راست نبیسگ ءَ زبر بَہ ایں۔
ما گوں راج ءِ وانِندھاں دزبندی کن ایں کہ وتی موبائلاں بلوچی کتاب بہ پھم اِت، ھر روچ تھنا پنچ دمان ءَ بلوچی دَرونتاں بہ وان اِت۔ بے تُرس بَہ اِت، گوں بلوچی اُستاد ءُ جُھدکاراں ھمراھداری بہ کن اِت، آ ناں تھنا شمارا راجی زبان ءَ شریں وڑے ءَ وانین اَنت بلکیں شُمارا بے کَساس سرپدی، دلبڈی ءُ بلوچی وانینگ ءِ توکل دے اَنت۔
شالا بلوچ بات اِت۔ بلوچ راج وت ماں وت یکمُشت ءُ تپاک بات۔ بلوچ ءُ بلوچی دیمروئی بہ کنات۔
