شھید لپٹینٹ جمال پنّام ء ناکو ابراھیم

نبشتہ کار: ڈاڈا ملنگو

من نہ زاناں چہ کُج ءَ وتی گپّ ءَ بِنا بہ کن آں، نہ منی ند ءَ انچو زور ءُ ھاٹیگ مان کہ شھید جمال جان ءِ کرد ءَ پہ تاکے سیاہ کُت بہ کنت، ناں کہ جمال ءِ کرد منی نِزوریں لبزانی مُھتاج اِنت۔

جمال ھما وھد ءَ جُھد ءَ ھوار بوتگ کہ مئے ھلک ءَ نوک جھد ءُ جنگ بیان اِت اَنت، ھمے مْیان ءَ گومازی ءَ مزنیں مراگِشے BNM کنگ ءَ اَت، گڑا پوچ ءَ ھم گومازی ءَ آھگ ءِ جھد ءُ کُوشست کُتک دانکہ مراگش برجم دارگ مہ بیت، بلے مراگش پہ جوانی آسر ءُ سوبین بوت۔ اے مراگش ءِ سوبین کنگ ءَ لس مردماں ھوار سرمچاراں ھم مزنیں کردے پیلو کت، سرمچاراں گومازی ءِ سرجمیں راہ ءُ در بند کُت اَنت ءُ اِستان ءِ لشکر پدکنزگ ءَ لاچار کُت۔ شھید جمال ھم اے جنگ ءَ ھوار ات ءُ پوچ بے سوب ءُ پہ پدکنزگ ءَ لاچار کُت، BNM ءِ مراگش سوبیں کنگ ءَ وتی بھرے مان کُت۔

شھید جمال جان سکیں مِھروان، دوست داروک ءُ مسکرا بازیں سنگے اَت، آئی ءَ سنگت سک مھر داتگ اَنت آئی ءَ انچو سنگت دوست بوتگ اَنت کہ مردم وتی برات ءَ چوں دوست دار اِیت۔ ھمے رنگ ءَ آئی ءَ انچوش وتی جُھد ھم دوست بیتگ، شھید ءَ وتی کار گوں اِیمانداری ءُ رازداری ءَ سرجم کُتگ انت۔ آ سکیں جپاکش ءُ ھنرمندیں جنگ ءِ راہ بنداں پوہ ءُ جنگولیں سرمچارے اَت۔
ناکو ابراھیم اے جھد ءَ پہ شوک ھوار نہ کپتگ، شھید ءَ اے راہ ءِ دیم ءَ آیوکیں جیڑہ ءُ جنجالاں شریں رنگے ءَ پوہ بیتگ، کربانی چی ئِے ءُ اے راہ من ءَ چونیں کربانی دیگ کپ اِیت۔ شر سرپد اَت کہ اے راہ ءَ کُجام جیڑہ ءُ جَنجال دیم ءَ کاینت، آئی ءَ وت ءَ پیسر ءَ سسّائی ءُ مجگی دْروشم ءَ ساجو ءُ جاڑِیگ کُتَگ اَت ءُ اے راہ ءَ در کپتگ ات۔ پمیشکا ھر کس کہ اے راہ ءَ در کپ اِیت گُڑا وت ءَ پیسر ءَ چہ سرجم بہ کنت، چوش مہ بیت کہ باندا لگور ءِ نام آئی بالاد ءَ بہ لِچ اِیت۔

شھید ناکو ابراھیم 10 نومبر 2024 ءَ دشت کھڈان ءِ جنگ ءَ شھید بوتگ، آ دشت کھڈان جنگ ءَ کربان یونٹ ءِ سنگتانی کمان کنان ءُ جنگ دیان ءَ شھید بیت، شھید ءَ گوں وتی ھوناں دشت ءِ مھلبیں پُلک گیشتِر زیبناک ءُ وشبو کُت اَنت۔ جمال ءَ گوں شھیدانی ھوناں بے وپائی نہ کُت، بلکیں وت ءَ گوں شھیداں ھور کُت۔ اے گپّ پدّر کُت کہ بلوچ راج وتی آجوئی ءِ واستا دژمن ءِ دیم ءَ چو کوہ ء البُرز ءَ مِکّ بیت۔ شھید اُوں سنگر ءَ نشتگیں ھمبلانی رھشونی ءَ کنت تاں آجوئی ءَ، منی ایمان اِنت مئے شھیدانی ھون آجوئی ءِ مانزمان اَنت۔
گُڈّی ءَ مھلبیں دْورت بلوچستان ءِ شھیداں۔