نبشتہ کار: مھلب ھسین بلوچ
انچوشکہ مرچی ما ءُ شما کل گندگ ءَ ایں ءُ سر پد ایں کہ مرچی بلوچ راج زُلم ءِ آماچ اِنت۔ گلامی ءِ گپچلانی آماچ اِنت، مرچی بلوچ راج زندانیگ اِنت، کید ءُ بندیگ اِنت۔ وھدیکہ یک راجے، یک کومے گلام جوڑ بیت۔ پد ءَ آ وڑ وڑیں آزاری ءِ آماچ بیت، زُلم ءُ جبر ءِ آماچ بیت۔ گْوشتِن شھید چیئرمین گلام مھمد بلوچ ئیگ اِنت کہ آ گْوش اِیت: “زُلم ءُ جبر ، شد ءُ نادْراھی اے دْراہ گلامی ءِ داد اَنت۔“
گِند ئے یک راجے کہ گلام جوڑ بیت گُڑا آئی ءِ دپ ءِ دپار روت، آئی ءِ ازت روت، آئی ءِ وشی ءُ ایمنی رو انت۔ من وت یک بلوچ زاھگے آں ءُ من ءَ وتی سر ءَ ناز اِنت کہ من بلوچے آں ، من وتی مھروانیں راج ءَ اے کلوہ دیگ لوٹ آں کہ منی ءُ شمے کل بلوچ راج ءِ سر ءَ راجی زمہ واری اِنت کہ ما وتی تنگوئیں براسانی ھمکوپگ بِہ بَہ ایں۔ مئے راج ءِ پاسبان، مئے ڈیھ ءِ ورنائیں سرمچار کہ یک جُھدے کنگ ءَ اَنت، راجی آجوئی ءِ واستا گوں بدیں دژمناں جنگے کنگ ءَ اَنت۔ بید اِنت مارا سما بہ بیت کہ آ کئی واستا ءُ کئی ھاتر ءَ کوھاں کپتگ ءُ جنگ کنگ اَنت؟
گِندئے کوہ ءَ نندگ وش نہ اِنت۔ البت آ مئے ھاتر ءَ گوں بدیں دژمناں جنگ ءَ اَنت، وتی اے گلامیں راج ءِ ھاتر ءَ جنگ ءَ اَنت۔ مارا منّگ لوٹ ایت کہ بلوچ سرمچاریں ورناھاں وتی زند ءِ سرجمیں واھشت یل داتگ اَنت، وتی ماس ءُ گْوھار، براس ءُ کماش دراہ وتی ڈیھ ءِ آجوئی ءِ ھاتر ءَ وتی اے گلامیں راج ءِ ھاتر یل داتگ۔
وتی اے وار ءُ بزگیں راج ءَ چہ گلامی ءِ درکنگ ءِ ھاتر ءَ سرمچاراں وتی روڈاں کپتگیں ماس ءُ گْوھارانی ، براسانی درد ماراتگ ءُ پد ءَ اے پاک ءُ نیکیں راہ گچین کتگ ءُ ماں راجی گل مجید برگیڈ ءَ ھوار بوتگ اَنت۔
او منی راج، اے راجی جھد ءَ وتی بہ پھم اِت۔ چہ اے جنگ ءَ مہ تچ اِت، بلکیں اے جنگ ءَ ما کل بلوچ ھواربایں وتی ورنائیں براسانی ھمکوپگ بِہ بَہ ایں۔ گِند ئے گلامیں راج بے جنگءَ آجو نہ بنت!
مرچی دژمن مئے ماس ءُ گْوھارانی ازت ءَ لگتمال کنگ ءَ اَنت مئے ماس، گْوھار ءُ بْراساں ھر روچ بیگواہ کنگ اَنت ، کشگ ءُ دؤر دیگ ءَ اِنت۔ مرگاپ ءِ تبدیں لوراں دریگتیں مرچی ما کل بلوچ یکجاہ ءُ یکمشت بہ بوتین ایں گڑا دژمناں گُھ وارتگ ات کہ مئے ماس ءُ گْوھاراں ءُ مئے تنگوئیں براساں چہ گس ءَ چست ءُ گار ءُ بیگواہ بہ کنت۔
نوں یکجاھی ءِ وھد اِنت ءُ مارا یکجاہ بیگی اِنت۔ شالا بلوچ یکجاہ ءُ یکمُشت بہ بات۔ راج وت ماں وت ھمکوپگ ءُ ھمراہ بہ بات۔ بلوچستان آجو بہ بات۔ شالا انچوش بات۔
