سپرے گوں مھروانیں ھمبلاں، دیم پہ بے نامیں دیارے ءَ

سیمی بھر:

نبشتہ کار: نوشاد بلوچ

زیارت ءَ مئے گندل ءُ نِپاد ھاوند ءَ برابر کُرتگ اَت، ما وَرگ وارت ءُ کمبل زُرت اَنت یک نیمگے شُت ءُ وپت اِیں۔ سُھب ءَ مھلّہ ما پاد اتک اِیں، چاہ وارت ءُ شُت اِیں پیر ءَ زیارت کُرت ءُ پد ءَ مئے سپر بندات بوت۔ جُنزان اِتیں ما جُنزان اَت وھد، نیمروچ ءَ ما جاگھے داشت ءُ کُرنو جوڑ کُرت ءُ وارت پد ءَ درکپت اِیں۔ سَے بج ءَ کالد جان ءَ وتی پاد زمین ءَ مِک دات اَنت کہ دانکہ چاہ نہ وارتگ دیم ءَ سپر نہ بیت، ھو چاہ مردُم ءِ دم ءَ راست کنت۔ پ ءَ کالد جان ءَ چاہ ءَ ابید نہ بیت ءُ ناں کہ سپر جت کنت۔

مئے چاہ تیار نہ اَت کہ آزمان ءِ دلبند ءَ دژمن ءِ جاسوس جھازے گوں ٹیرّگیں توار ءَ زاھِر بوت، اے کہ گْوست ایشی پُشت ءَ دگہ یکّے ھم گْوست۔ ما سنگتاں شور ءُ سلاہ کنگ ءَ اِت اِیں کسّے گْوشگ ءَ اَت مارا دیستگ ئے، کسّے گْوشگ ءَ اَت انچو وتی ھساب ءَ شُتگ اَنت (اُوھے سرمچاراں چوشیں وھد ءَ مُدام شیوار بہ بیت، اگاں دیستگے یا کہ نہ دیستگے شُما انچو بہ مار اِت کہ دیستگ ئے وتا رکّینگ ءِ جُھد ءَ بہ کن اِت) ھمے گَپّ ءِ تہ ءَ اِتیں کہ ڈرونے ھم زاھِر بوت، گوں زاھِر بوَگ ءَ بمب ءِ جَنَگے بندات کُرت۔

ڈرون ءِ گولہ اَچ ما کمّو یک کِرّ کپت، ما ودار کُرت ءُ اے تیوگیں روچ ھمد ءَ گْوازینت۔ شَپ ءِ دو بج ءَ ایشی گولہ جَنَگ بند کُرت ءُ شُت، گُڑا ما وتارا دگہ نیمگے کشّ اِت ءُ وپت ایں. سُھب ءَ پ ءَ ما وتی راہ گِپت ءُ جُنزان بوت اِیں۔ روان روان ءَ دانکہ نیمروچ ءَ ما وتارا پروم سر کُرت، اِد ءَ یک برے پد ءَ جاسوس ءَ مارا کمّو پیری دات، بلے مارا نہ دیستے ءُ شُت۔ نیمروچ ءَ ما واجہ اوتاک ءَ داشت۔۔۔۔۔۔، ءُ اے اوتاک ءِ باز وشّیں چاگردے اَت۔ سنگت سکّا دیم روشن ءُ مھروان اِت اَنت۔ ما ھمد ءَ مجلس ءُ دیوان بوت اِیں ءُ پد ءَ ورگ وارت، چہ ورگ ءَ پد من ءُ دریا شُتیں جان شُشت ءُ واتر اتکیں۔ سنگتانی مھروانی ءَ اے روچ انچو گْوست ھِچ مالُوم نہ بوت کہ شَپ بوت، سُھراب جان مئے وابجاہ ءُ گندل ٹھینت اَنت ءُ ما وپت ایں۔

دومی نیمروچ ءَ نان ءَ پد ما دراتک اِیں، چار سنگت ھمد ءَ چہ گوم ءَ ھمسپر بوت کہ اِیشانی تہ ءَ کندیل ھمراہ ءُ مئے راہ بلد بوت۔ ما ھمے اوتاک ءَ چہ یک ھرّے ھم زُرت ءُ وتی راشن ھَر ءِ کچو ءَ جت اَنت ءُ جنزان بوت اِیں۔ دو ساھت ءِ کچّ ءَ ما سپر کُرت جاگھے پہ دم ءِ ساسارگ ءَ نشت ایں، سرمچار ھمیش اَنت سپر ءَ بہ بنت مجلس ءُ دیوان اَنت۔ جاگھے پہ دم ءِ ساسارگ ءَ بہ نند انت گُڑا سگریٹ ءُ ناسے کسّے جنت ءُ مجلس ءُ دیوان گرم اِنت، ما مجلس ءُ دیوان اِت اِیں ءُ ھیال نہ کُرتگ اَت کہ مئے ھَر گوں کچو ءُ راشن ءَ ھوار گار اَت۔ ما ھر کہ پولگ بِنا کُت بلے ھِچ پہ ھِچ، پورا گْوش ئے بال کُرتگ اِت ئِے۔ مارا شھید کے ڈی جان ءِ وڑیں پد رند کنوکے ھم ھمراہ نہ اَت، ما دل یکیم کُرت ءُ دست ھالی در اتک اِیں۔

پ ءَ سپر ءُ پند اَت، اے بری پریشانی اَت کہ نوں ھِچ وڑیں آسرا نیست اَت۔ مئے راشن ھرّ ءَ وتی ھرجان ءَ جت اَنت، شپ کہ کپت ما درست شُدیگ اِت اِیں۔ پورا گْوش ئے جان ءِ توان ھلاس بوتگ اَت، بلے ما شور ءُ سلاہ کُرت کہ سپر کنگی اِنت دانکہ جاھے سر بہ بہ ایں۔۔۔۔

روان اِنت۔۔۔