نبشتہ کار: نِھال بلوچ
بلوچ یک انچیں نامے کہ آئی وتی ننگ، وتی مَیار ءُ بیر انچو نہ بکش اِتگ۔مرچی کہ وھدے من گِنداں بلوچ ءِ زالبول بیگواہ بیان انت، بلے بلوچ انگت بے سما اِنت۔ بلکیں بلوچ ھما بوتگ اَنت کہ پہ نمیرانی رپتگ اَنت، بلوچ ھما انت کہ جھد ءُ جنگ ءَ اَنت، بلوچ آ نہ اَنت کہ چہ دژمن ءِ ترا ءُ بیمّ ءَ گُنگ ءُ بے توار اَنت، بلکیں بلوچ ھما انت کہ مَیار جل ءُ پہ ننگ ءَ کُربان بوتگ ءُ انگت کُربان بوگ ءِ راہ ءَ رھادگ اَنت۔
مرچیگیں جاورانی رِد ءَ پہ بلوچ پُسّگاں نندگ ءُ چارگ راجدپتر ءِ تاکاں لگوری یے زانگ بیت، اگاں بلوچ ءِ پُسّگ انچو پہ لگوری وتی ننگ ءِ زوال ءُ گْوھارانی گار ءُ بیگواھی ءَ بہ چار اَنت، پہ آیاں باندات نہ بیت۔ پرچا کہ ھمے بے تواری مارا کُلاں چہ اندر ءَ وارت ءُ ھلاس کنت، پمیشکا مارا چہ وتی جند ءِ توار ءَ بیگواہ بوگی نہ اِنت۔
اگاں تو وت ءَ بلوچے گْوش ئے گُڑا ھیا بہ کن ءُ پادا کہ پہ ترا نوں ھچ پشت نہ کپتگ، ءُ ھمے شِگان باندا پہ تئی آیوکیں پدریچ ءَ آسے بیت ءُ آئی ءَ پہ مدامی سوچ اِیت۔ پرچا کہ بلوچ ءِ راجدپتر کربانیانی دپتر انت، اے دپتر ءَ کسے کہ پولنگ کنت آئی ءِ نام پہ وژنامی گِرگ نہ بیت۔
مرچی مئے شُمئے چمانی دیم ءَ بلوچ ءِ شیرزال بیگواہ، بلوچ ءِ ننگ وتی جند ءِ زمین ءِ سر ءَ بیگواہ ءُ بلے بلوچ انگت چہ واب ءَ سما نہ کنت۔ مرچی اے لبز ارس ریچگ ءُ بیگواہ اَنت، روچے من ھم گار ءُ بیگواہ بہ آں۔ دست لرزگ ءُ ھمے جیڑگ ءَ آں کہ چے نبشتہ بہ کناں، ءُ ما وت ءَ بلوچ مہ گْوش اِیں۔ اگاں ما بلوچ بوتین اِیں گڑا ما وتی ماس ءُ گْوھار ، براس ءُ پس، گھیں راج تھنا یلہ نہ کرتگ اَت۔
مرچی نسرینہ، ماجبین، ،پرزانہ، رھیمہ، آزِرا گوں وتی تِپلیں زھگ براھمدگ ءَ، ھانی ءُ ھیرنسا یکیں کھول ءِ پرزند کہ دُروگیں بھتامانی باپُشت ءَ زورگر ءَ آوار جتگ ءُ گوں وت بُرتگ اَنت۔ وھدے تو گلام بہ ئے تئی زالبول ھم آوار جَنگ ءُ زندانی کنگ بہ اَنت، بلے اے ھبر تورناک اِنت کہ تو گُنگ ءُ بے توار بہ بہ ئے ءُ پہ آیانی لجّ ءِ پھازگ ءَ راجی زْرمبش ءِ بھر مہ بہ ئے، بلکیں ترا اے راجی زْرمبش ءِ بھر بوگی ءُ وتی راجی باندات رکّینگی اِنت دانکہ دگہ بلوچ زالبول رستر ءِ زندان ءَ بندیگ مہ بہ اَنت۔ اگاں ما شما ھچ نہ گْوشت ءُ ھاموش بوت اِیں، گُڑا باندا مئے ھمراھی ءَ مئے ڈگار ھم بیگواہ بیت، پد ءَ ما ھچ نہ کُت نہ کن اِیں ءُ وھد مئے مرچیگیں اِنت، اگاں ناں ما پہ مدامی بیگواہ بہ ایں۔
