نبشتہ کار: ھانی بلوچ
یک راجے ھما وھد ءَ گار بیت وھدیکہ آ راج ءِ نودربر ءُ لس وانِندہ وتی جِند ءِ راجی زبان ءَ مہ وان اَنت، وتی راجی دود ءُ ربیدگاں یل دنت ءُ دِگہ راجے ءِ زبان، دود ءُ ربیدگاں وتی بہ کنت۔ گُڑا آ راج یک انچییں دابے ءَ گار بیت کہ آئی جِند ءَ ھم سما نہ بیت کہ ما گار بوگ ءَ ایں۔ زبان دوستی راجدوستی ءُ آجوئی جنگ ءِ مستریں بھرے پمیشکا بنگلادیش ءِ نودربراں 1952 ءَ بھاشہ آندولن، بزانکہ پہ زبان ءَ زھرشانی کُت ءُ پہ وتی بان ءِ پھرزگ ءَ کُربانی دات۔ پرچا کہ زبان راجاں یکجاہ ءُ یکمُشت کنت۔
زبان راجانی دود ءُ ربیدگ ءِ مستریں بھر ءُ یک راجے ءِ بُندری پجّار اِنت۔ گِند ئے مرچاں بلوچ راج ھم پہ وتی سرڈگار، راجی زبان ءُ راجی ھستی ءِ واستا جنگ ءَ اَنت گُڑا باید اِنت ما ھر بلوچے وت ءَ ماں اِے آجوئی ءِ جنگ ءَ ھوار بہ کن ایں کہ آ توری زبان دوستی ءِ پِڑ بہ بیت یا توری راج ءِ تہ ءَ دژمن ءِ ھلاپ ءَ نپرت ودی کنگ ءِ کار بہ بیت۔ گِند ئے بلوچی وانگ ءُ راست نبیسگ مئے یک راجی زمہ واری یے پمیشکا باید اِنت ما بلوچی وانگ ءُ دربرگ ءِ جُھد ءَ پْروش مہ ور ایں بلکیں سرمچارے ءِ وڑ ءَ راستیں دابے ءَ بلوچی درونتاں وانان ءَ وتی جُھد ءَ برجاہ بہ دار ایں گُڑا ما راجدوستیں بلوچ زانگ بہ ایں۔
ما وتی راج ءِ وانِندھیں بْرات ءُ گْوھاراں سرپدی دیگ لوٹ ایں راجی زبان ءِ وانگ ءُ دربرگ ءِ جُھد ءَ چہ دُرستاں پیسر دلپْروش مہ بَہ اِت ءُ اے وڑیں ھیالاں مہ اڑ اِت کہ من بلوچی راست نبیسگ ءَ سُست آں یا من بلوچی نہ ونتگ پمیشکا انی من وتی راجی زبان ءِ وانگ ءُ دربرگ ءِ جُھد نہ کن آں۔ باید اِنت، ما راج ءِ سرمچارانی وڑ ءَ وتی دل ڈڈ ءُ اے توکل کن ایں کہ من بلوچی دَرونت ءُ راجدوستی نبشتانکاں وانان ءَ وتی راجی زبان ءِ راست نبیسی ءَ ھیل کن آں۔ بِل اِت کہ ھپتگے یا توری ماھے بہ لگ ایت۔ مارا دژمن ءَ اے باوری دیگ لوٹ ایت کہ تو بلوچی ءَ ماں وانگجاھاں وانینگ ءَ نیل ئے کہ بلوچ ءِ تہ ءَ زبان دوستی ءُ راج دوستی مہ بیت بلے ایش انت ما وتی راجی زبان وت وانان ءَ دربرتگ، ما ترا پْروش داتگ، ھزارانی کچ ءَ بلوچی زبان ءِ سرمچار ءُ نبشتہ کار ھست اَنت کہ آ انی آشوبی ءُ راجدوستی نبشتانکاں نبیسّان ءَ تئی ھلاپ ءَ راج ءِ تہ ءَ نپرت ودی کنگ ءَ اَنت۔
بلوچ راج وتی راجی زُبان ءَ وت ونت کنت، سرپد ھم بیت۔ گِند ئے اِے ھم پہ ما گنج اِنت۔ شمارا کَس نہ گْوش ایت کہ شما بلوچی ءِ دْراھیں دَرونتاں ماں یک روچے ءِ تہ ءَ بہ وان اِت یا شُما رَد نبشتہ بہ کن اِت۔ بلوچی مئے وتی جِند ءِ زُبان اِنت، وتی جِند ءِ زُبان پہ راجاں گِران ءُ مُشُکل وَ نہ بیت، تھنا ھر روچ بلوچی ءِ یک درونت ءُ یک زُبان دوستی نبشتانکے بِہ وان اِت پد ءَ شما وت یک ھپتگے ءِ تہ ءَ بلوچی راست نبیسّگ ءَ ھیل کن اِت۔
مُدام ءُ یکشل ءَ شوشل میڈیا ءَ وتی جِند ءِ زُبان ءَ پوسٹ بہ کن اِت، گوں وتی سنگت، دزگْوھار، سْیاد ءُ وارساں بلوچی ءَ کلوہ بہ کن اِت۔ بِل اِت رَد بہ بنت، دیم ءَ درونتاں وانان ءُ وھد ءِ ھمراھی ءَ شما وت بلوچی راست نبیسّگ ءَ زبر بَہ اِت۔ ما یک گپے یات ءُ دلگوش بہ کن ایں ھر وھدیکہ نبشتہ کن ایں۔ آ توری کلوھے بہ بیت، گالرِدے بہ بیت یا نبشتانک ءُ بھرگے(Paragraph) بہ بیت وتی نبشتگیناں یک برے وت بہ وان ایں ءُ راست کنگ ءِ جُھد بہ کن ایں کہ گالردانی تہ ءَ ردی مہ بنت چہ ایشی ءَ مارا بلوچی درونت تازگ بنت ءُ ما وھد ءِ ھمراھی ءَ بلد ھم بَہ ایں۔
ھر روچ یک بلوچی زبان ءِ راجدوستی ءُ زبان دوستی نبشتانکے الم بہ وان اِت کہ شما بلوچی لبزانک ءَ سرپد بہ بَہ اِت۔ وانگ ءِ وھد ءَ دِگرانی رَدیاں پٹ ایں، آیانی رَدیاں یکجاہ کن ایں۔ گُڑا مارا وانینگ ءِ بیسہ(توکل ءُ ھمت) ودی بیت ءُ ما بے تُرس بَہ ایں۔ ھمے داب ءَ وتی جُھد ءَ برجاہ بدار اِت دیم ءَ وھد ءِ ھمراھی ءَ وت زبر بَہ اِت۔ بلوچی گوں انگریزی آباں نبیسّگ ءَ مارا ھچ پائدگ نہ رس ایت بلکیں بلوچی گوں انگریزی آباں نبیسّگ وھد ءِ زوالی اِنت پمیشکا ما گوں شما دزبندی کن ایں کہ بلوچی ءَ گوں انگریزی آباں نبشتہ مہ کن اِت بلکیں مُدام وتی راجی زُبان ءَ گوں بلوچی آباں نبشتہ بِہ کن اِت کہ شُمئے وتی زُبان ءَ آب ھست اَنت۔
سلامت بات اِت، شالا راجی زُبان ءِ جُھدکار ءُ ھزمتکار بِہ بات اِت، بلوچ راج شالا یکمُشت ءُ ھمدست بات، بلوچ ءُ بلوچی شالا دیمروئی بہ کنات۔
