بانک کریمہ: بلوچ سیاسی بندپتر ءِ اولی زالبولیں سیاسی رھشون

نبشتہ کار: بالاچ بلوچ

بلوچ چاگرد ءُ چاگردی راستی:
بلوچ ءَ مُدام وت ءَ سیکولر ءُ جنسی برابری ءِ منوگریں راجے گْوشتگ، بلے اے باوست ھُورتی ءَ گوں چارگ ءُ تپّاسگ بہ بیت داں بے سوبی گندگ ءَ کئیت ءُ چاگردی راستی مارا لبزی راستی ءَ چہ جتائیں دْروشمے ءَ گندگ ءَ کئیت۔ ھمے رِد ءَ بلوچ ءِ سرزبانی لبزانک، گیدی لبزانک یا سرجمیں گوستانک ءُ بندپتر چارگ ءُ تپاسگ بہ بیت گڑا مارا کسانیں ھدّے ءَ داں گندگ ءَ کئیت۔ مھناز ءِ پاکدامنی ءِ کسہ بیت، گُل بی بی ءِ مھمان جلّی ءُ بانڈی ءِ شیرزالی ءُ جنگی توکل بہ بیت، اے کُل وتی جاہ ءَ بجا اَنت۔ اے درست بلوچ ءِ ھما زمانگ ءِ چاگردی راستی اَنت، بلے وھدے ما بلوچ ءِ سیاسی جنز ءُ زرمبشت ءَ چار اِیں داں زالبول ءِ کرد اینکدر نہ اِنت چو کہ ستاھگ ءُ گلاھگ بیت۔ ایشی ءِ مستریں درور بلوچ ءِ گیدی لبزانک ءُ لچہ کاری اَنت ءُ چد ءُ گیش مارا گوست ءِ گھگیری زرمبشتانی تہ ءَ زالبول نہ بوگ ءِ ھساب ءَ گندگ ءَ کاینت۔ پہ درور مھراب ھان ءِ گھگیری بہ بیت یا یوسپ اَزیز مگسی ءِ ماڈرن نیشنلزم ءِ گُمان (تصور) ءُ لیکہ ءِ تہ ءَ ھم زالبول گندگ ءَ نئیت ءُ نئیکہ چوشیں بندپتری ریپرنسے ھست کہ اے بہ ڈسّ اِیت کہ زالبول اے سرجمیں سیاسی ءُ چاگردی چست ءُ ایرانی تہ ءَ گون اِنت یا وھدے اے بنیات (foundation) ایر کنگ بُوتگ گڑا سرجم ءَ مارا زالبول ءِ erasure گندگ ءَ کئیت اِنت ءُ ھچ وڑیں موجودگی نیست کہ اے درور دیگ بہ بیت کہ بلوچ زالبول آ دؤر ءِ سیاسی چست ءُ ایرانی تہ ءَ چی پیم ءَ بوتگ ءُ آئی ءِ سیاسی consent چی داب ءَ جوڑ بوتگ ءُ آئی ءِ سیاسی ردوم ءُ سسّا (شعور) لیول کجام بوتگ ءُ چی داب ءَ چاگردی راستی ءِ تہ ءَ وتی بھرگ ءَ مان کنان بوتگ۔
ھمے داب ءَ رندتری بندپتر چارگ بہ بیت داں کلات اسٹیٹ نیشنل پارٹی ءُ نیشنل ھوامی ءُ بلوچ استمان گل ءَ جنین آدم ءَ را پہ ادارکی ءُ کسانیں ھدے ءَ داں جاہ داتگ، اگاں جنین آدم ءِ زکر کسھے ءِ تہ ءَ ھست اِنت آ ھم تھنا نامے ءُ چد ءُ گیش دگے ھچ دز نہ کپ اِیت، چوش کہ بابو نوروز ھان ءِ وھد ءِ جنگ ءَ اوں انچین شیرزالے ءِ نام گرگ بیت بلے آئی ءِ بابت دو گپ ءَ ابید ھچ گواہ نہ دنت۔
ھمے پیم ءَ اگاں دگے جاگھے زالبول ھوار بوتگ اَنت گُڑا تاریخ ءَ آ لپاشتگ اَنت ءُ مردیں آدم مرکزی کردار نامینتگ ءُ دیم ءَ آؤرتگ اَنت۔ اے ھبر راستے کہ بلوچ چاگرد ءِ ھمک چک ءُ چیلانی تہ ءَ زالبول ءِ کردے گندگ بیت ءُ گوست ءِ راستی وتی جاہ ءَ بجا اَنت، ھستین دھر ءِ 1970 ءِ بی بی گاھنوری مری ءِ کرد بہ بیت کہ آ گوں جنگولیں بلوچ مردیناں یک ھمگام اِنت، برے لشکر ءِ راھاں بندگ ءَ اِنت ءُ برے پہ جنگولاں کوہ ءُ گیاباں کمک ءُ ھالرسانی کنگ ءَ اِنت۔ ھمے ڈول ءَ انوگیں وھد ءَ استانی زوراکیانی دیم ءَ اوں مدام اولی سرپ ءَ اوشتوک ھمے زالبول اَنت کہ آ برے دگانی سر ءَ جاک ءُ کوکار کنگ ءَ اَنت ءُ برے گلکاری ءِ پڑ ءَ وتی کرد ءَ پیلو کنگ ءَ اَنت۔ بلے بلوچ ءِ ھزارانی سالی ئیں گوستانک ءِ تہ ءَ زالبول مدام باپُشتی کمک ءِ کرد ءَ ادا کنگ ءَ اِنت۔ پمیشکا آ کدی اوں ترا چہ بانک کریمہ ءَ پیش اولی سرپ ءَ گندگ ءَ نئیت باریں سوب چی بوت کن اَنت اے جتائیں راجمانی پٹ ءُ پولے لوٹ اِیت۔ بانک بلوچ سیاسی، بندپتری ءُ چاگردی ھستانک ءِ اولی زالبول اِنت کہ اُلسی رھشونے ءِ داب ءَ وتی کرد ءَ پیلو کنت۔

کریمہ؛ بلوچ تاریخ ءُ سیاست ءَ نوکیں کلچرے ءِ بنیاد:
بلوچ ءَ اے ھیال وتی تہ ءَ کسانیں کچے ءَ جاہ داتگ ءُ منّ اِتگ کہ زالبول اوں راجی زرمبشت ءِ پڑ ءَ توانائیں کردے ادا کت کن اَنت بلے چہ بانک کریمہ ءَ پیش یا وَ کسے ءَ اے کرد زُرت نہ کتگ یا کہ آ زہنی ھوالہ ءَ بلوچ گل ءُ چاگرد تیار نہ بوتگ اَنت۔ ھمے رنگ ءَ بانک ءِ اوں سیاست ءِ بنداتی وھد تنگ نظری ءِ نگاہ ءَ چارگ بوتگ استان ءِ زر ھریدیں پروپگینڈسٹ ٹولی ءُ مردم وتی جاہ برے مزھبی شکل ءَ ءُ برے روایتانی نام ءَ اے نوکیں ربیت ءِ ھلاپ ءَ اوشتوک بوتگ اَنت بلے بلوچ ءِ جند ءِ سیاسی سرکل اوں پہ وشیں دلے ءِ راستی ءِ منگ ءَ جاڑیگ نہ بوتگ۔ بلے کریمہ ھما یکتائیں کارست اِنت کہ آ ھزاراں سالانی بلوچ سیاسی بندپتر ءِ تنگ نظریں روایتاں پروشیت ءُ زالبول ءَ چہ باپُشتی ءُ گیر موجودگیں کردارے ءَ کش اِیت ءُ آئی ءَ رھشونی ءِ مکام ءَ بکش اِیت۔ بانک ءِ اَملی سیاست ءَ ھوار بوگ وت بلوچ سیاست ءِ تہ ءَ یک نوکین کلچرے ودی کنت، اے برابری ءُ سیاسی ھمکوپگی ءِ کلچر بیت، راجمان ءِ نیم بھرے گون راجی زرمبشت ءَ ھمگرنچ کنگ ءِ کلچر بیت بلے اے داں ھمگرنچی ءُ برابری ءِ مکام ءَ نہ اوشتیت بلکیں چد ءُ گیش دیم ءَ ودّان کنت ءُ بانک بلوچ سیاسی منظرنامہ ءِ توک ءَ یک مدامی کردارے جوڑ بیت، آ زمہ زوراں کنت ءُ دیم ءَ روان کنت۔ کریمہ بلوچ ءِ ھزار سالی ئیں تاریخ ءُ زھنینت ءَ نوکین گوناپے دنت، آ تھنا جھدکارے ءِ نام ءَ زانگ نہ بیت بلکیں کریمہ ءَ اے کوھنیں روایاتانی پروشگ ءِ شرپ ءُ بلوچ جنز ءَ یک نوکیں درونتے گیش کنگ ءِ شرپ گون اِنت۔ پمیشکا باز رند ءَ چوش گْوشگ بیت کہ کریمہ ءِ بلوچ سیاست ءَ ھوار بوگ بلوچ سیاسی منظزنامہ ءِ تہ ءَ یک Paradigm shift ے کاریت کہ بلوچ ءِ سیاسی سائیکی ءَ مٹ کنت اے شفٹ راجی آبادی ءِ یک تکے گون راجی زرمبشت ءَ ھمگرنچ کنت ءُ کریمہ وتی توکل ءُ کردار ءَ گون اے شفٹ ءَ انچو منارینیت کہ مرچی بلوچ سیاسی زرمبشت ءِ میان ءَ یک ابدی راستی یے جوڑ اِنت۔
ما چینچو اوں زبان ءَ تاب بہ دئیں بلے اے راستی ءَ ھچ رنگ ءَ بے کمار کت نہ کن ایں کہ بلوچ کدی اوں زالبول سیاسی رھشون ءِ ءُ سیاسی باسک ءِ چم ءَ نہ چار اتگ اَنت، آ دگے پڑاں منی اے گپ بہ گندئے وت ءَ را منارینت مہ کنت بلے اگاں سیاست ءُ راجی زرمبشت ءِ تک ءَ بہ چار ئے گُڑا اے تچکیں راستی یے ءُ کسے اوں آئی ءَ پروش دات نہ کنت۔ بلوچ ءِ گوستانکی سپر ءَ سک باز جھل ءُ بُرز اتکگ اَنت، ءُ بلوچ مدام جنگ ءَ بوتگ بلے اے جنگاں اگاں زالبول ءِ لیڈینگ رول ءِ گپ بئیت اِنت گُڑا ھچ نیست۔ اگاں اے ھزار سالی ئیں تاریخ کسے ءَ چیلنج کتگ گُڑا آ کریمہ اِنت کہ بانک کریمہ بیت ءُ بانک ءَ چہ لمہ ء وتن جوڑ بیت۔ کریمہ بلوچ جنز ءِ پیشانی ءَ ھما درپشانکیں استال اِنت کہ آ سرجمیں پدریچے ءِ سکین جوڑ بیت، مرچی ھمے پدریچ نہ تھنا جنگ ءِ وارسی ءَ کنگ ءَ اِنت بلکیں ایشی ءِ رھشونی ءَ ھوار سکی ءُ سوریانی سگگ ءَ اوں اولی سرپ ءَ اوشتوک اِنت۔

ھون ءُ ھاک ءِ سیادی ءَ گوں ھمگرنچیں کارست:
کریمہ ءَ سرپد بوگ ءَ پہ ھون ءُ ھاک ءِ سیادی ءِ سرپد بوگی اِنت، چی ءَ کہ آئی ءِ جند ھمے سیادی ءَ گوں آژناگیں کارستے ات کہ مدام ھمے دوئینانی نیام ءَ زندگی کنگ ءَ ات داں نمیران بوت۔ سیاست دراسل وتی بزانت ءَ چہ مکسدے ءِ پابند اِنت ءُ بانک ءِ سیاست ءِ مستریں موٹیویشن ھمے انقلابی مکسد اِنت کہ آئی ءَ را داں گَڈّی ساہ ءَ گون ات ءُ دومی چیز جاور اَنت، جاور ھما بے ریائیں راستی ءِ نام اِنت کہ آ انسانے پروشت ھم کنت ءُ آئی ءَ گیش مھکم اوں کت کنت بانک جاورانی دیم ءَ سرجھل کنوکیں جھدکارے نہ ات بلکیں آئی ءَ مدام وتی مزن پگری ءُ آشوبی جزبگ ءُ کمٹنٹ ءَ گون ھر رنگیں جاور وتی ھساب ءَ رنگ دات اَنت ما اگاں بانک ءِ سیاسی سپر ءَ چار ایں گُڑا مدام ھمے گرانیں جاورانی آماچ اِنت، بلے آ پروش ھچبر نہ وارت، شھید خالد ءِ نمیرانی ءِ جاور بہ بنت یا کہ آئی ءِ گل ءِ سر ءَ کریک ڈاؤن بہ بیت آ یک پیم ءَ اوشتاتگ، اے میان ءَ سک باز دگے مردم بنت کہ آ جاورانی دست ءَ پروش ور اَنت سیاست ءَ چہ یک کر بنت ءُ مرچی آ سیاسی منظرنامہءَ چہ گار اَنت۔ بلے بانک ھون ءُ ھاک ءِ سیادی چہ ھچبر نہ سست۔

کریمہ؛ مسکیں ارواھانی آجوئی ءِ سپر ءِ مساپر:
آجوئی ءِ سپر پہ بانک ءَ وت یک سکینے بوتگ کہ بانک وتی زمین ءِ سر ءَ بوتگ یا کہ درانڈیھ بلے مسکیں ارواھانی آجوئی ءِ سپر ءِ کاروان ءِ بھر بوتگ ءُ جنزاں بوتگ۔ 2008 ءَ وھدے کہ پاکستان گون وتی ترندیں پالیسیاں بلوچ سیاست ءِ سر ءَ کریک ڈاؤن بندات کنت، ءُ بی ایس او ءَ ھوار سرجمیں آجوئی لوٹوکیں سیاسی گلاں انگیر کنت تُرس ءُ بیم ءِ چاگردے جوڑ بیت اے جاورانی بابت ءَ وھدے شھید ڈاکٹر منان ءَ جُست گرگ بیت کہ استان ءَ چو مان بستگ ءُ مردمانی جزبگ جھل کپاں اَنت ھر کس پہ راھے وت ءَ را کشّان اِنت گُڑا ڈاکٹر پسو دنت کہ ”دریا وھدے وتی موج ءَ کئیت گُڑا آ درستیں چل ءُ لیتاراں لپاشیت اے جاور مئے مھکمی ءِ مانزمان اَنت ءُ اے وھد ءَ اگاں کسے اوشتات بزانکہ آ تچکیں آشوبی یے۔“
کریمہ ھمے تچکیں آشوبیاں لڑ ءِ برز ءَ اوشتوکیں رھشونے کہ مدام زمہ زورگ ءَ پہ جاڑی اِنت، 2009 ءَ وھدے زاکر مجید بیگواہ کنگ بیت آئی ءِ اُگدھی زمہ واریاں وتی کوپگاں زوریت ءُ بی ایس او ءَ اوشتگ نئیل ایت، ھمے ڈول ءَ 2012 ءِ کونسل سیشن ءَ اولی رند ءَ بی ایس او وتی رھشوناں گوں راستیں ناماں مھلوک ءِ دیم ءَ نیاریت بلے ھمے وھد ءَ اوں بانک یکیں مردم بیت کہ آ سرپیس ءَ آیگ ءِ زمہ زوریت ءُ گل ءِ ترجمانی ءَ کنت، 2014 ءَ وھدے کماش زاھد بیگواہ کنگ بیت گُڑا گیش مردمانی منگ ھمیش بیت کہ نوں بی ایس او دیم ءَ شُت نہ کنت بلے بانک بیت کہ اے ترندیں جاورانی دیم ءَ چو کوہ ءَ میلانک بیت۔ یک نیمگے ریاستی زوراکی سنگتانی گار ءُ بیگواھی ءُ جنگ ءُ کُشگ ءُ دومی نیمگ ءَ تنظیمی زمہ واریانی بار ءُ سیمی نیمگ ءَ بلوچ ءِ جند ءِ میان ءِ تضاد بی ایس او ءِ سر ءَ جتگیں بھتان ءُ نکتہ چینی ءِ چاگرد کہ سوشل میڈیا ءَ بلوچ وت ماں وت جیگ ءُ گور اَت اَنت۔ سیاسی تضاد ءُ بے سر ءُ پادیں تنقید وتی جاہ ءَ اے وھد ءَ زاتی کردار اوں بکشگ نہ بوگ ءَ اَت اَنت بلے مجال اِنت کہ اشاں چہ یک چیزے اوں بانک ءَ نزور کت بکنت۔ بی ایس او 2012 ءِ سیشن ءَ وھدے آ کمک کماش بیت اے وھد ءَ اے چک ءُ چیل ءُ وش نَیتکی ءُ آئی ءِ گل ءِ ھلاپیں کیمپین وتی زوراں بنت، استانی کریک ڈاؤن اوں انچش برجاہ بیت زمین روچ پہ روچ پہ سیاست ءَ تنگ تران بیت ھمے میان ءَ پدا گل ءِ بنجائی کارگُشاد (رضا جھانگیر) شھید کنگ بیت، بلے کریمہ اَت کہ پرے شھر ءُ پرا شھر اَت، مردماں مُچ کنگ ءَ اَت بلوچ ءِ آجوئی ءِ کلوہ ءَ لوگ لوگ ءَ سر کنگ ءَ ات۔ دوزواہ ءُ مردماں آئی ءَ را گُشت کہ نوں تو وت ءَ پھریز اے استان ترا گیش اوپار کت نہ کنت بلے کریمہ ءِ منگ ھمیش اَت کہ ھُشک ءُ ھالیگ ءُ بے اَملیں زند ءِ رکینگ ءَ اوں ھچ بزانت نیست اگان من ءَ ارزشتے ھست گُڑا آ منی آشوبی کردار اِنت، دراسل بانک ءَ آشوبی سیاست ءِ کردار انچوش وتی زند ءِ بھر کُتگ اَت کہ آ چریشی ءَ ڈن زند ءِ جند ءَ دیست کنگ ءَ نہ اَت۔

کریمہ؛ جاورانی لیبی ئیں رھشون:
جاور گیش ترسناک بواں ات اَنت، کریمہ ءِ مسکیں ارواھانی آجوئی ءِ سپر ءَ گون ھمسپری اوں گیش مھکم بوان ات، پیسر ءَ آئی ءَ را اُگدھی ھساب ءَ سروکے ھست اَت بلے زاھد ءِ بیگواھی ءَ پد سرجمیں ڈُبہ آئی ءِ کوپگاں کاینت، من بانک ءِ سرجمیں زند ءَ نہ تھنا پہ بلوچ زالبول بلکیں ھمک سیاسی جھدکار ءِ ھاتر ءَ یک آئیڈیلیں کردارے سرپد باں بلے بانک ءَ اگاں کسے شری ءَ زانگ لوٹ ایت کسے آئی ءِ سیاسی کمٹمنٹ ءُ پھتگی ءَ پھمگ لوٹ ایت گُڑا
ھاس ھمے جاور ءَ دیم ءَ بہ کنت ءُ کریمہ ءَ بہ شوھاز اِیت کہ آ چون وتی سنگتانی توکل جوڑ بیت ءُ چون بی ایس او ءَ اے کھریں نوبتاں رکینیت، چون پیسلہ سازی کنت، چوناھیا مئے کر ءَ ابرمی راستی ءِ ھساب ءَ اے پھمگ بیت کہ زالبول سکی سگ اِت نہ کنت یا آ ترندیں جاوراں ھبکہ بیت، وتی نزیکیں سنگت ءُ مردمانی روگ ءَ پروشیت، جزباتی بیت۔ بلے بانک ءَ کہ اے شاھیم ءَ تور کن ئے گُڑا اے راستی مانا مٹ بیت آشوبی سنگتی ءُ مھر ءَ بانک وتی توکل کنت، پہ سنگتاں گمیگ بیت بلے چد ءُ گیش اگاں آئی ءَ چیزے ءِ پگر بیت گُڑا آ تھریک ءُ زمہ واریانی بیت پمیشکا جاور ھمینچو ترند بواں بنت آ ھمینچو گیش گون ترندی ءَ اوشتان کنت۔ آ زاھد ءِ بیگواھی ءَ پد پُشت نہ کنز ایت نہ کہ ھبکہ بیت بلکیں آئی ءِ زمہ واریاں زوریت، بی ایس او ءَ جنزینگ ءَ ھوار آ دگہ سنگتانی رکینگ ءِزمہ ءَ زور ایت، سرپیس ءَ استان بی ایس او نام ءِ گوشدارگ اوں اوپار کت کنگ ءَ نہ اِنت بلے بانک دیم ءَ کئیت کیمپ جنت زھرشانی کنت دگنیا ءِ آ دگے گل ءُ اداراھاں گوما ھال اھواَل کنت میڈیا ءِ دیم ءَ استانی زوراکیاں ایرجنت دُگنیا ءُ جھان ءَ گوں ھمتران بیت۔ پد ءَ اے وھد ءَ ھاس بانک ءِ پیسلہ سازی ءِ بودشت ءُ راھوتکاری مردماں مُچ کنگ، بی ایس او ءَ دارگ سنگتانی رکینگ باریں دگہ چینچو زمہ واری اَنت کہ آئی ءَ وتی کوپگاں زُرتگ اَنت۔ ھمے جاور اِے نشونءَ دیَنت کہ بانک ءِ تہ ءَ لیڈرشپ ءِ ھست ءُ بُودیں کرد مان بوتگ، راستیں وھد ءَ راستیں پیسلہ لیڈر ءِ سنچ ءُ زانت ءِ مانزمان اِنت، اِے نگیگیں جاوراں گَل، سنگت ءُ سرجمیں جاورانی گِر ءُ دار ءُ ھچ چوشیں پیسلھے نہ کنت کہ چرائی ءَ گَل، جُنز یا سنگت تاوان بار بہ بنت۔ ھمے آئیءِ لیڈرشپ بودناکیانی مانزمان اِنت۔

بلوچ ءِ سد سالی سیاسی بندپتر ءِ اولی زالبولیں سروک:
بلے جاور انگت ھما اَنت، مردم گمان کنگ ءَ اَت اَنت کہ نون بی ایس او ھسابی روچانی مھمان اِنت ءُ پد ءَ ھمے نااُمیتی ءِ میان ءَ جار شنگ بیت کہ بلوچ سیاسی تاریخ ءَ تہ ءَ اولی رند اِنت کہ یک جنین آدمے ءَ سیاسی گلے ءِ کماشی زُرتگ، بانک ءِ اے زمہ ءِ زورگ وت بلوچ ءَ پہ سکینے جوڑ بیت ءُ راستی ءَ بلوچ ءِ بزانت ءِ یک منانکے ءِ سرجم بوگ ءِ بشارتے بیت بی ایس او ءِ زندگ مانگ ءُ دیمروئی نوکیں اُمیتے جوڑ بیت۔ اے امیت ءِ مھکم کنوک بانک ءِ رھشونی اَت، من برے برے سما کناں کہ اے گْرانیں ساھتاں اگاں بانک مہ اوشتاتیں گُڑا بوت کنت کہ مرچی بلوچ چہ نودبر ءُ ورنا سیاست ءُ مھکمیں سیاسی گلے ءَ چہ زبھر بوتگ اَت۔ کریمہ جاوراں گون دیم پہ دیم بیوکیں کارستے اَت۔ آ اے راستی ءَ وتی زبان ءَ درشان کنت کہ پہ ایردستیں راجاں جاور کدی سازگار نہ بنت بلکیں آیان ءَ ھمک جاور وتی دست ءَ کنگی اِنت ءُ مانا دیگی اِنت۔
بانک ھوامی رھشونے ءِ نگاہ ءَ
بانک ءَ بہ گندئے باز وھد ءَ بلوچ ءُ دری راجانی مھلوک تھنا نودربر گلے ءِ رھشون ءِ چم ءَ چار اَنت بلے بانک ءَ تھنا بودربر سیاست ءِ کالب ءَ چارگ آئی ءِ کرد ءَ گون ناانساپی یے، اے راستے کہ بانک ءِ گیشتر وھد ءُ کار نودربر سیاست ءِ دائرہ کار ءِ توک ءَ بوتگ اَنت ءُ ھما گل ءِ کہ ترجمانی بانک ءَ کتگ آ نودربر سیاست ءِ جھگیری کنوکیں گلے بلے بانک ءِ سیاسی ھیلکاری ءُ گل کاری ءِ کار تھنا گون نودربر تک ءَ بندوک نہ بوتگ اَنت ءُ بانک ءَ تھنا آئی ءِ تنظیمی زمہ واری ءِ بنیاد ءَ نودربر سیاسی رھشونے گْوشگ اوں آئی کرد ءِ یک مزنیں پھناتے ڈالچار کنت۔ بانک ءَ اُلسی سیاست ءِ تہ ءَ اوں رھشونی بستارے داشتگ، ما اے بیھال مہ بہ ایں کہ بانک بی ایس او ءِ زمہ واری ءَ ھوار بی این ایف ءِ اوں سروک بوتگ ءُ بی این ایف ءِ گیشتریں کار ءُ پروگرام لس مھلوکی سیاست ءَ گوں بندوک بوتگ اَنت۔ پد ءَ بانک ءِ سیاست ءُ گلکاری ءُ آئی ءِ سیاسی دورھاں چار ئے گُڑا بانک چہ کیمپس ءُ مزنیں شھراں چہ گیش مدام کوہ ءُ کوچگ ھلک ءُ میتگاں سیاست کنگ ءَ بوتگ ءُ آ وتی کارانی توک ءَ وت گیش اِتگ بزان وتی تنظیمی زمہ واریانی بنیاد ءَ تنظیمی زون ءُ سنگت ءُ آدگہ کار ءُ جیڑھے وھد داتگ اَنت بلے اے گپ من پہ ستک گْوشت کناں کہ ھمے جاگھاں بانک ءَ مھلوک ءِ توک ءَ گل کاری دیوان ءُ پروگرام جلسہ ءُ سیمنار کتگ اَنت اِد ءَ لس مھلوک ءَ بانک تھنا جنز ءِ رھشونے ءِ ھساب ءَ چار اِتگ آیاں بانک ءِ تنظیمی زمہ واریاں سرپدی نہ داشتگ بس بانک ءِ مھکمیں سیاسی کردار ءَ گون ھمگرنچ بوتگ اَنت۔ آئی ءَ چہ ھیلکاری گرگ ءَ بوتگ اَنت، بلے گیشتر وھد ءَ کہ بانک ءِ سر ءَ گپ بیت گُڑا آ سک کسانیں دائرھے ءِ تہ ءَ محدود کنگ بیت۔ پمیشکا من سرپد باں کہ بانک ءِ سر ءَ گپ جنگ یا نبشتہ کنگ ءِ وھد ءَ تھنا نودربر گلے ءِ بندوکی ءُ راھشونی ءِ بنیاد ءَ بانک اِنچو محدود کنگ مہ بیت بلکیں ھما وھد ءِ سیاسی جاور ءُ مھلوک یا جنز ءِ سیاسی یاداشتانی تہ ءَ بانک ءِ کرد چارگ بہ بیت کہ آ وھد ءَ آئی ءِ سیاسی ھیلکاری دیوان ءُ گپ ءُ باوست ءُ کار کنگ ءِ مرکز کجام بوتگ اَنت یا آیا آ وھد ءَ تھنا نودربر ءُ ورنا ھما کہ بی ایس او ءِ باسک بوتگ اَنت بانک ءِ سیاسی ھیلکاری تھنا ھمایاں گون بندوک بوتگ یا تھنا ھمایاں بانک وتی رھشون لیک اِتگ یا کہ لس بلوچ ءَ اُوں بانک رھشونے ءِ بستار ءَ چار اِتگ ءُ من سدک آں کہ جواب ھمیش بیت کہ لس بلوچ ءَ اوں بانک وتی رھشون گْوشتگ، اے رھشون گْوشگ یا منگ وتسریں ھیالے نہ اِنت بلکیں اے بانک ءِ سیاسی کرد ءِ ھژدری ئیں بھرے کہ گیشتر وھداں چیر ترّینگ بیت۔
آسر:
کریمہ تچکیں اَمل ءَ گون بندوکیں جھدکارے بوتگ ءُ اے گپ ءَ آئی ءِ پدکرد گیشینیت ءُ آئیءَ را تھنا نودربر سیاست ءِ چشمک ءَ چارگ آئی ءِ کرد ءُ اَمل ءَ گوں نا انساپی یے۔ آئی ءِ زند ءَ ھرکس ءَ آ جتائیں رنگے ءَ چار اِت بلے بانک ءِ کرد درستانی وتسریں گپاّنی پسو اِنت۔ بانک ءِ جند ءَ وھدے ھمے جُست کنگ بیت کہ تو زالبولے ءِ بستار ءَ چون اے گرانیں ساھتاں گلے ءِ رھشونی کتگ کنگ ءَ ئے، گُڑا بانک پسو دنت کہ ”جھد ءِ توک ءَ زالبول ءُ مرد ءِ تپاوت نیست، ءُ گل ءِ رھشون ءِ بستار ءَ من کدی نہ اوں نہ مار اتگ کہ زالبول بوگ ءِ سوب ءَ من آ دگہ سنگتاں چہ جتا آں“
اے ھبر بانک ءِ ھمے دانکاں چہ وت پدر بیت کہ بانک ءَ مدام وت ءَ را جنسی تپاوت ءَ چہ یک کر تھنا سیاسی مردمے ءِ بستار ءَ چار اتگ ءُ دیم ءَ روان بوتگ پمیشکا اگاں ما اوں بانک ءَ زالبولے ءَ چہ گیش اگاں سیاسی رھشونے ءَ چم ءَ بہ چار ایں ءُ آئیءِ کرد ءُ رھشونی ءِ سر ءَ پٹ ءُ پول بہ کن ایں گُڑا ما کریمہ ءِ بانک کریمہ بوگ ءُ داں لمہ ء وتن ءَ سر بوگ ءِ سپر ءَ سرپد بوت کن اِیں۔