نبشتہ کار: شمسہ رھیم
دْروت ءُ دْراہ بات اِت مھرواناں!
اُمیت کناں کہ شما درست وش ءُ سلامت اِت ءُ دوا اِنت کہ دائم ءَ وش ھال ءُ سوبمند بات اِت ھستیاں۔
ھمبلاں! شما زان اِت کہ ما چار سال یکجاہ گوازینت ءُ یک منزلے ءَ سر بوت اِیں کہ آئی ءَ (گریجوئیشن) گْوش اَنت۔ اے چاریں سالانی تہ ءَ ما ءُ شما چہ دور ءُ دریں شھرانی اتکگیں مردم ناں، بلکیں یکیں لوگ ءِ چُک ءِ وڑ ءَ ھوار بوت اِیں۔ ما ءُ شما سکّی ءُ وشیّاں ھوار ات اِیں، بہ گند ئے ما یکے دومی ءِ گندگ ءَ سیر نہ کتگ اَت ءُ پیسر ءَ اے چاریں سال آسر بوت اَنت ءُ ما ھرکس گسر بوت ءُ پہ وت رپت اِیں۔
اے چاریں سالانی تہ ءَ مارا سمیر ابدال ءِ وڑیں وانوک ءُ مھروانیں ھمتبک ھما کہ مدام مارا پہ وانگ ءِ واستا سکین ءُ دلبڈی دیان اَت ، آمر بشیر ءِ وڑیں گشندہ کہ مدام مئے تبک (کلاس) گوں وتی وشیں توار ءَ وشنود کتگ اَت۔ ابدل لتیب ءِ وڑیں مسکرا کنوک کہ دائم سمیر ءُ امیت ھان ءِ بڈّ ءَ کپتگ اَت ءُ آیان ءَ کلاگ ئِے بست ، نجیب ءِ وڑیں وانوک کہ دائم گوں وانگی جستاں ھمگرنچ اَت، یوسپ داد ءِ وڑیں پلسپہ دان کہ دائم جست ءِ سر ءَ جست ئِے چست کُت ، موسا ءِ وڑیں ماسوم کہ چاریں سالانی تہ ءَ گوں کس ءَ وش گپّی ئِے نہ ُکُت ، مکسود ءُ اللہ داد ءِ وڑیں شیتان کہ دائم ایشاں یکے دومی ءَ کلاگ بست ءُ مارا کندینت، امیت ھان ءِ وڑیں نرم توار کہ چار سال گوست ھچ کس ءَ شرّی ءِ سر ءَ امیت ھان ءِ توار نہ اِش کتگ اَت ، انس بزگ ءِ وڑیں مھروان کہ ھرکسی دل ءَ آئی ءَ چہ وتی نرم تبی ءَ جاگہ کتگ اَت ، پیر بکش ءُ نزیر ءِ وڑیں ھمدرد کہ مدام گوں من اے دوئیں ھرچ کار ءَ یکجاہ بوتگ اَنت۔
نورا ءُ سدیمہ ءِ وڑیں گشندہ کہ آیاں مئے مئے استاد ءَ گْوشتگ اَت کہ شما بلوچی ءِ شرتریں گشندہ اِت ، اسما بکتاور ءُ زراتوان ءِ وڑیں شرارت کہ اے سئینانی دست ءَ کس نہ بچ اِتگ اَت ایشاں ھرکس کلاگ زرت ءُ مئے جنکانی دیوان وشنود کُت ، مریم ، جوریہ ، شبانہ ءُ ریھانہ اے ھر چاریں مئے کلاس ءِ تھ ءِ بے تواریں جنک اِت اَنت کہ دنیا ھرچ وڑ ءَ بوت اے سرپد نہ اِت اَنت ، گُل اپروز ءُ نازیہ ءَ ھوار اے ھر سئیں دائم یکجاہ ءُ ھوار سرجمیں مزن شھدربرجاہ ءِ گردگ ءِ زمہ واری اے سئینانی سر ءَ اَت، بلے ھر سے گوں وتی ھمتبکانی ھرچ وڑیں سکّی ءُ وشیاں ھوار اِت اَنت۔ بزاں کہ اے چاریں سالانی تہ ءَ مارا چوشیں مھروانیں ھمسپر رس اِتگ اَت بلے مرچی من ءَ انچوش سما بیت کہ من بس وتی چم بند کتگ اَنت، گوں چمّانی پچ کنگ ءَ اے درست چوش برپ ءِ وڑ ءَ آپ بوت اَنت ءُ چہ چمّانی دیم ءَ اندر بوت اَنت ۔
ھمبلاں! بہ گند ئے شما چہ منی دیدگاں اندر اِت، بلے اے گپ ءَ ایمن بہ بہ اِت کہ شما چہ دل ءَ ھچبر نہ رو اِت۔ شمئے مھروانی ، شمئے کرد ءُ شمئے وتیگی مدام منی ھمراہ اَنت۔ کسے ءَ گوشتگ اَت کہ سیادی آ نہ اِنت کہ چہ ھون ءَ جوڑ بیت، بلکیں سیادی ھما اِنت کہ چہ یک دومی ءِ نزیکی ءُ وتیگی ءَ جوڑ بیت۔
گُلیں بیل ءُ ھمسپراں! مرچی من ھمے گْوشتن ءِ بزانت ھم پھم اِت، بہ گند ئے ما ءُ شما ھون ءَ یک مہ بہ اِیں ، مئے ھلک ءُ میتگ جتا جتا اَنت، بلے شمئے مھر انچیں مھر اَنت کہ مردم بہ لوٹ اِیت ھم چہ شما بے ھیال بوت نہ کنت۔ پمیشکا کواس ءُ شھزانتیں سرانی گْوشگ ءِ رِد ءَ چہ ھون ءِ سیادی ءَ ھم ھیالی ءُ لیکّھی سیادی ءِ ارزِشت گیشتِر ءُ مُھکم تِر اِنت۔
منی دیدگیں ھمتبکاں! نوں گوں من چوشیں ھچ گپ نیست کہ پہ شما درشان اِش بہ کناں، بس گُڈّسر ءَ ھمے گْوشاں کہ ھر کجا رو اِت شالا سوبینی شمئے ھمراہ ءُ ھمگام بات۔ زندگی ءِ تہ ءَ ھچبر گم آماچیں روچانی دیمپاں مہ بات اِت، شالا زند ءِ ھر گام ءَ سلامت ءُ سوبین بات اِت۔
بس ھمے گْوشاں کہ پراموش مہ بہ اِت۔۔۔۔۔۔۔۔، شما مدام منی دل ءَ چو بلوکیں چراگ ءَ بَل اِت۔
شُمئے وتی ھمسپر ءُ ھمتبک شمسہ رھیم
