آ مئے توکل اِنت

نبشتہ کار: ایڈوکیٹ نادیہ بلوچ

رجانکار: بانڑی بلوچ

وھدے کہ ڈاکٹر مھرنگ چہ اسلام آباد لانگ مارچ ءَ واتر گس ءَ اتک گڑا بازیں کچّے ءَ مردم پہ آئی ءِ چارگ ءَ مئے گس ءَ آھگ ءَ اِت اَنت ، چہ آ مردماں سریاب ءِ دو کسانسالیں ورنا آ مدرسہ ءِ نودربر اِت اَنت، سے روچ پد ماں پد ڈاکٹر ءِ چارگ ءَ آھگ ءَ اِت اَنت ، ڈاکٹر گس ءَ ساڑی نہ اَت چارمی روچ ءَ تْرندیں ھورے ءِ وھد ءَ دوئیناں سیکل ءِ سر ءَ چہ سریاب ءَ یک ادارے سپر کرتگ ءُ اتکگ اِت اَنت، آیاں ڈاکٹر مھرنگ دیست ھیران بوت اَنت ءُ گوں یکے دومی ءَ گْوشگ ءَ اِت اَنت مئے دُوا کبول بوت، آیاں گْوشت کہ لانگ مارچ ءِ وھد ءَ آیانی مدرسہ ءِ دُرستیں نودربراں ھرروچ وزیپہ ءُ نماز کرتگ ءُ کُج ءَ ھم زھرشانی یے بوتگ ما بھر زرتگ۔

وھدے ڈاکٹر مھرنگ ءَ گوں گند ءُ نند اِش کرت روگ ءَ اِت اَنت گڑا دروازگ ءِ دپ ءَ اوشتات اَنت ءُ من ءَ گْوشت اِش کہ دگہ وھد ءَ الّم روانک ءُ زھرشانی ءَ بھر زورگ ءِ بابت ءَ ھال بہ دے اِت۔ روگ ءِ وھد ءَ یکے دومی ءَ چارگ ءَ اِت اَنت پد ءَ یکے ءَ چہ وتی کیسگ ءَ 500 کش اِت ءُ من ءَ دیگ ءَ لگت من نہ زرت گڑا گوشگ ءَ لگت اِت ما پہ ڈاکٹر ءَ ھچ آرت نہ کرتگ اے مئے اے ماہ ءِ ھرچ ءِ زر اَنت ، ایشاں تو ڈاکٹر ءَ چہ مئے نیمگ ءَ بہ دے من گْوشت نہ ایشی زرورت نہ اِنت ڈاکٹر ءَ پہ شمئے ھمے مھر باز اَنت گڑا گوشگ ءَ لگت اِت کہ نہ منی گوھار اے مئے واھشت اِنت ، شمئے گس ءَ مھمان باز اِنت ھمے مھمان آں چاہ بہ دے اِت۔

نوں کہ ڈاکٹر زندان ءَ بندیگ اِنت گڑا لھتیں مردماں گوں ڈاکٹر ءَ گوشتگ اَت کہ بلوچ راج short term memory loss ءِ آماچ اِنت۔ بلوچ راج ءَ ترا بیھال کرتگ تو چے گْوش ئے، وھدے کہ تو چہ زندان ءَ در کائے گڑا ھمے وڑ ءَ بلوچ راج ءَ یکجھتی کمیٹی ءِ زرمبشت ءَ ھوار کن ئے، گڑا ڈاکٹر ءَ گوں آیاں گوشتگ اَت بلوچ راج وتی زرمبشت ءُ گوں آئی ءَ ھمگرنچیں ویلاں کدی ھم بیھال نہ کنت، بلوچ یکجھتی کمیٹی ءِ زرمبشت یک انچائیں زرمبشتے نہ اِنت بلکیں راجی زرمبشت ءِ درچ اِنت ءُ بلوچ روچ ء مرچی پہ وتی وتن ءِ رکینگ ءَ شھید بوتگیں مھراب ھان ءِ شھیدی ءَ وتی راجی شھیدانی یات ءَ داریت ، نواب نوروز ھان ءِ گون ءَ پاکستانی ریاست ءِ دروگ بلوچ ءَ مرچی ھم بیھال نہ کرتگ، ءُ پرچا کہ دروگ گوں نواب نوروز ھان ءُ آئی سنگتاں نہ بلکیں سرجمیں بلوچ راج ءَ کنگ بوتگ ءُ اے ویل مئے مچی یاداشتانی بھر اِنت۔

منی گوھار ءَ گوشتگ تو بے گم ببو، بلوچ راجی زرمبشت ءِ گوستانک ھمے گوش ایت کہ چہ نزور بوگ ءَ پد ھم ما پاد کائین ءُ گوں چار مردمانی یکجاھی ءَ پد ءَ وتی مردماں یکجاہ کن ایں ھمائی ءَ کہ تو مچی گوشتگ ئے آ اے دمگ ءِ چہ درستاں زانتکار ءُ زندگیں راجے اِنت کہ آ وتی راجی پجار ءُ شرپ ءِ رکینگ ءَ زانت۔

ھیر زیکیں گپے وھدے کہ آمیدگس ءَ منی گوں دو ورنایاں گند ءُ نند بوت، آیاں چہ من ءَ جست کرت باجی تو ڈاکٹر مھرنگ ءِ گوھار ئے یا نہ ؟ من گشت جی ھان۔
آیاں گوشت کہ باجی ڈاکٹر چون اِنت؟ من گوشت آ وش ءُ شکر اِنت، گڑا گوشت اِش کہ مئے سلام ءَ سرکن ءُ بہ گوش تئی راج تئی جار ءِ ودار ءَ اِنت ، آ مئے توکل انت ، ڈاکٹر ءَ بہ گوش ما باز کوشست کرتگ بلے مارا گوں تو گندوک ءَ نہ اشتگ اش ، ما ءُ مئےکھول اے زرمبشت ءِ سر ءَ کربان ایں۔ آئی ءَ بہ گش ما پتو دگہ ھچ کرت نہ کن ایں مارا ماپ کن تو پما مرچی بند یگ ئے۔

من ریاست ءَ گوشگ لوٹ آں کہ تو ڈاکٹر مھرنگ ءَ گوں آئی ھمراھاں یکجاہ زاندانی کرتگ، بلے آئی توکل ءَ تو کدی ھم پروشت نہ کن ئِے ، تئی دروگیں گپ ءُ پندل سازی بلوچ راج ءِ دیم ءَ ھچ ارزشت نہ دار اَنت۔ اے زرمبشت ءَ بلوچستان ءَ بیوکیں ریاستی زلم ءُ انسانی ھکانی لگتمالی سرجمیں دگنیا ءِ دیم ءَ پاشک کرتگ ءُ تئی مکاریں دروشم پدر بوتگ، من یک روچے ھم ڈاکٹر مھرنگ ، شاہ جی، بیبگر ، گلزادی ءُ بیبو گمی بوگ ءَ نہ دیستگ ، اے ڈیھ ءَ آئینی بدلی ءَ آمیدگسانی وتواکی ھلاس کنگ بوتگ ، مرچی آمید گس ھالی ئیں ماڑی یے اِنت۔ ھما وھد ءَ کہ ما بے اوست اَت ایں آ پُرایمن اَت ، مھرنگ گوش ایت اے لھتیں سیاسی ورکر ءِ ناسرجمیں بلوچستان ءِ کیس اِنت کہ آ ھدہ زندان ءِ تہ ءَ جست ءُ پرس کنگ بنت ، چہ ایشی ما سرجمیں دگنیا ءَ گوشگ لوٹ ایں کہ بلوچ چکچینی ءَ ریاست ءِ درستیں ادارہ ، آمیدگس ، رسانکدر ، پارلیمینٹ ھوار اَنت ءُ اے ڈیھ ءِ نام گپتیں اھوالکار ،سیاستدان ءُ جج یکیں لڑ ءَ اوشتوک انت۔