نبشتہ کار: شھناز بلوچ
بلوچستان ءَ پاکستانی پوج ءُ پاکستانی چیریں ادارھانی کارمندانی زوراکی ءِ دْرچ گوں تْرندی ءَ برجاہ اِنت۔ چوش مدام سرجمیں بلوچستان ءَ بلوچ ورنا زوربیگواھی ءِ نشانگ کنگ بوگ ءَ اَنت ءُ آیانی آزار داتگیں جون چہ ویرانگاں دزکپگ ءَ اَنت۔ ھمے وڑ ءَ چہ پاکستانی ادارھانی نیمگ ءَ بلوچ ورنا، کماش ءُ کسانسالیں زھگاں ھوار نوں بلوچ جنکانی زوریں بیگواھی ءِ دْرچ بندات کنگ بوتگ کہ پاکستانی پوج ءُ چیریں ادارہ بلوچ جنکاں آوار جنگ ءُ بیگواہ کنگ ءَ اَنت۔
چوش کہ پاکستانی چیریں ادارھانی کارمنداں لھتیں ماہ پیش چہ شال ءَ بلوچ نودربریں جنک ماہ جبین چہ درسرکاری نادْراھجاہ ءِ وابجاہ ءَ آوار جتگ ءُ بیگواہ کرتگ اَت کہ آئی زوریں بیگواھی ءَ شش ماہ ءَ گیش اِنت، بلے آئی ھچ ھال نیست۔ چہ ماہ جبین ءَ پد 22 نومبر 2025 چہ ھب دارو ھوٹل ءَ پاکستانی پوج ءَ شپ ءِ ساھت دوازدہ ءَ نسرینہ بلوچ ءِ گس ءَ بیڑ بُرتگ ءُ نسرینہ بلوچ زوراکی ءِ نشانگ کنگ ءَ پد گوں وت بُرتگ ءُ بیگواہ کُرتگ۔ پد ءَ آئی ءِ کھول ءِ مردم پاکستانی پوج ءِ چیریں ادارھانی کارمنداں تُرسینتگ اَنت کہ آئی ءِ مردم پہ نسرینہ بلوچ ءِ آجوئی ءَ توار چِست مہ کن اَنت۔
بلے! من گوں وتی بلوچ راج ءَ دزبندی کناں کہ پہ نسرینہ بلوچ ءِ آجوئی ءَ توار چِست بہ کن اِت، چی ءَ کہ ریاست نہ لوٹ اِیت بلوچ وتی سر ءَ بیوکیں زوراکیانی بِگیری ءَ توار چِست بہ کنت۔ آ لوٹ اِیت کہ بلوچ ءَ تُرس ءِ آماچ بہ کناں ءُ بے توار بہ کن ایں، پرچا کہ آ مئے دژمن اِنت۔ ھمے ھاتر ءَ آ مئے بچّ ءُ جنکاں بیگواہ کنت ءُ آیاں کُش اِیت ءُ چگل دنت۔
انچوش کہ بانک کریمہ ریاست ءِ زوراکی ءِ بگیری ءَ توار چِست کُرت ءُ روانک کش اِت، گھگیری کُرت ئے۔ وھدے کہ ریاست ءَ دیست بانُک کریمہ ءِ توار بلوچستان ءُ چہ بلوچستان ءَ در کُلیں جھان ءَ سر بوَگ ءَ اِنت، گُڑا آئی بانُک ءَ را ماں درملک کینڈا ءَ شھید کرت ءُ چگل دات۔ ریاست ھمے سرپد بوت کہ بانُک ءِ توار کہ دارگ بہ بیت گُڑا سرجمیں بلوچستان بے توار بیت، بلے چوش نہ بوت۔ مرچی ھزاراں جنک بانُک کریمہ ءِ دْروشم ءَ ریاست ءِ زوراکیانی بگیری ءَ چہ وتی لوگاں دراَتکگ اَنت سڑک ءُ پریس کلبانی دیم ءَ اَنت۔
مرچی بانک سمی دین، ڈاکٹر مھرنگ ءُ آدگہ بازیں کامریڈ ھمے جُھد ءَ مھرنگ ءِ ھمراہ اَنت، ھمے جُھد ءَ بازیں شھید کنگ بوتگ، گار ءُ بیگواہ کنگ بوتگ اَنت، بلے بانک ءِ جُھد اَنگت روچ پہ روچ مُھکم بوان اِنت۔ اے ریاست ءَ ھزار رنگیں پندل ساز اِتگ ، ارسی گیس جَنگ، زھرشانیانی سر ءَ بیڑ برگ ءُ مردم لٹ ءُ کُٹ کرتگ اَنت دانکہ آ چہ وتی جُھد ءَ دزکش بہ بنت، آ وتی گار ءُ بیگواھیں مردمانی آجوئی ءَ ھچ توار چِست مہ کن اَنت۔ وھدے ریاست چہ وتی دُراھیں پندلاں بے سوب بوت، گُڑا آئی ڈاکٹر مھرنگ ءَ گوں آئی کامریڈیں ھمبلاں، بزاں کامریڈ بیبو ، گُلزادی، بیبگر ءُ شاجی ءِ ھمراھی ءَ دزگیر کُرت ءُ بُرت وتی زندان ءَ بند کُرت کہ بلوچ راج چہ اے جھد ءَ دزکش بہ بیت، بلے بلوچ راج ءِ راجدپتر ءَ تُرس ءُ دلپْروشی نیست۔
اے بیگواھی ءُ زوراکی چہ ھما روچ ءَ بلوچ ءِ سر ءَ بِندات بیت کہ وھدے پاکستانی رستریں لشکر بلوچستان ءِ سر ءَ اُرش کنت ءُ بلوچ ءِ ڈیھ ءَ دستیگ کنت، ءُ بلوچ ھمے ایردستی ءِ بگیری ءَ گھگیری بندات کنت چہ ھما روچ ءَ بلوچ ءِ بچّ ءُ جنکانی بیگواھی ءُ آیانی ھونانی ریچگ بِندات بیتگ۔ بلوچستان ءَ چوشیں ھند ءُ میتگے نیست کہ پاکستانی پوج ءَ بلوچ جنکانی گُشان ءَ وتی دست سک نہ کرتگ؟ ھمے ریاست ءَ ھزارانی کچّ ءَ بانُکیں گْوھار ءُ سالونکیں براتاں ماتانی دیم ءَ چِست کنت بارت، بیگواہ کنت ءُ پد ءَ کُش اِیت ءُ آیانی جوناں ماں ویرانگ ءُ جنگلاں چگل دنت۔ آئی ءِ کھولاں ھچ وڑیں دلجمی نہ دنت کہ شُمئے مردم مُرتگ اَنت یا کہ زندگ اَنت، پمیشکا مارا وتی توار اِیرموش کنگی نہ اِنت۔ بلکیں نسرینہ بلوچ ءَ ھوار پہ ھر ھما بلوچ پُسّگ ءَ توار چِست کنگی اِنت کہ آ زندان ءِ تھاریں کُوٹی ءَ بلوچ بوَگ ءِ نام ءِ سر ءَ سِزا ءِ دیمپان اِنت، مارا بے توار بوَگی نہ اِنت۔ ھر ھما راج کہ بے توار بوتگ، مرچی آ چہ ھستمان ءِ کالب ءَ در کپتگ ءُ بے نام ءُ نِشان اِنت، پمیشکا مارا بے توار بوَگی نہ اِنت، بے توار بوَگی نہ اِنت۔
