شیرزالیں ڈاکٹر مھرنگ ءُ زندان

نبشتہ کار: پاتما بلوچ

ڈاکٹر مھرنگ بلوچ یک انچیں شیرزالے کہ آ بلوچستان ءِ مھلوک ءِ ھکّ ءِ ھاتر ءَ جھد کنگ ءَ اِنت، چوش کہ مھرنگ بلوچ یک ڈاکٹرے ءَ ابید انسانی ھکانی مُھکمیں جھد کارے ھم۔ ڈاکٹر مھرنگ بلوچ 1993ءَ بلوچستان ءَ ودی بوتگ،

مھرنگ بلوچ وانگ ءَ اَت کہ آئی زندمان ءِ رنگ ءُ دْروشم بدل بوت ءُ 2009 ءَ آئی واجھیں پت آوار جَنَگ ءُ بیگواہ کنگ، چرے بیگواھی ءَ پد 2011 ءَ کُشگ بوت۔ اے واکیہ ءَ پد مھرنگ بلوچ ءِ زند سرجمی ءَ بدل بیت۔ اے واکیہ ءَ ابید ھم مھرنگ پُشت ءَ نہ کنز اِت ءُ آئی ءَ وتی جھد ءُ وانگ برجاہ داشت۔ آئی ءَ وتی پت ءِ واب ءِ سرجم کنگی اَت ءُ دیم ءَ جنزان کنگ ءِ پسلہ کرت۔

ڈاکٹر مھرنگ بلوچ پت ءِ شھیدی ءَ پد وتی وانگ بندات کت ءُ ایم بی بی ایس ءِ ڈگری چہ بولان میڈیکل کالج ءَ گپت۔ مھرنگ بلوچ ءَ پت ءِ شھیدی ءَ پد بلوچستان ءَ مردمانی آوار جَنَگ ءُ کُشگ ءِ ھلاپ ءَ جھد بندات کت ءُ پد ءَ وتی برات ءِ آوار جَنَگ ءَ پد اے جیڑھانی سر ءَ گیشتر توار چست کنگ ءَ اَت۔ مھرنگ بلوچ 2019 ءَ بلوچ یکجھتی کمیٹی ءِ ممبر جوڑ بیت ءُ چیردستیں بلوچ راج ءِ جیڑھانی سر ءَ توار چست کنت۔ ڈاکٹر ماھرنگ بلوچ ءِ دیوان ءُ جلسھانی تہ ءَ لکّانی کچّ ءَ مردم بھر زور اَنت ءُ ڈاکٹر مھرنگ بلوچ مدام سرکار ءُ لشکر ءِ زلم ءُ زوراکیانی ھلاپ ءَ مدام جُھد کنت۔

ڈاکٹر مھرنگ بلوچ ءَ کدی ھم وتی زرمبش ءِ ھاتر ءَ زوراکی ءِ نیمگ ءَ نہ شُتگ، بلکیں مدام مردماں یکجاہ ءُ توار چست کنت۔ مروچی ڈاکٹر مھرنگ بلوچ بلوچستان ءَ یک مزنیں نامے ءُ سرجمیں دنیا ءَ آئی ءِ توار گُوشدارگ بوگ ءَ اِنت۔ ڈاکٹر مھرنگ بلوچ ءِ جھد مروچی ھم برجاہ انت، ءُ بلوچستان ءِ مھلوک ءِ ھکّانی ھاتر ءَ جھد کنگ ءَ اِنت۔ ڈاکٹر مھرنگ بلوچ ءِ جھد مارا ھمے سکین دنت کہ مردمے وتی جزم ءُ ھمت ءَ چِہ مزنیں بدلی آؤرت کت کنت۔ مھرنگ بلوچ ءِ جھد ھما جھد اِنت کہ مارا اے درس دنت کہ یک مردمے گوں وتی جزم ءُ دلیری ءَ مزنیں بدلی یے آرگ ءَ الم سوبین بیت۔

آئی وتی پت ءِ بیگواھی ءَ پد وتی ھکّانی ھاتر ءَ توار چست کنگ بندات کتگ ءُ بلوچستان ءَ بیگواھی ءُ زوراکیانی ھلاپ ءَ جنزان کت۔ مھرنگ بلوچ ءَ وتی برات ءِ بیگواھی ءَ پد ھم اُوپار نہ کت ءُ وتی زرمبش مھکم کرت۔ مرچی مھرنگ بلوچ بی وائی سی ءِ لیڈر اِنت ءُ بلوچستان ءِ مھلوک ءِ ھک ءِ جھد ءَ اِنت، آئی ءَ را جھد کنگ ءِ ھاتر ءَ بازیں داد دیگ ھم بیتگ۔ چوش کہ مھرنگ بلوچ ءَ اے گپ سابت کتگ کہ زالبول ھم چاگرد ءِ تہ ءَ یک ھاسیں کردے پیلو کت کنت ءُ وتی ھکانی جھد ءَ ھم کت کنت۔ آئی بھادری ءُ دلیری پہ ھرکس ءَ رُژن ءِ چراگ اِنت، ءُ مارا ھمے سکین ءَ دنت کہ ما وتی مول ءُ مراد ءِ سرجم کنگ ءِ ھاتر ءَ ھرچ وڑیں مشکل ءِ دیمپان بوت کن اِیں۔

ما ڈاکٹر مھرنگ بلوچ ءِ بھادری ءُ دلیری ءَ سلام پیش کن اِیں، آ پہ بلوچستان ءِ راج ءَ یک راستیں توار ءُ ما آئی ءِ جھد ءِ ھمراہ ءُ اُوشتاتگ اِیں۔ مھرنگ بلوچ مروچی بیگواہ انت، مھرنگ بلوچ ریاست ءِ کارمنداں چہ کوئٹہ ءَ آوار جتگ کہ اُود ءَ بلوچ راج ءِ ھاتر ءَ زَھرشانی کنگ ءَ اَت، آ کوئٹہ ءِ ھدہ جیل ءَ بند اِنت، مھرنگ بلوچ زوراکی ءِ ھلاپ ءَ توار چست کنگ ءَ اَت، گڑا آ زَھرشانی ءِ مْیان ءَ گوں وتی دزگْوھاراں ھوار چِست ءُ بیگواہ کنگ بیت۔ مھرنگ بلوچ یک بلوچ کارکنے کہ آ بلوچستان ءَ بیگواھیں مردمانی جیڑہ ءِ سر ءَ توار چست کنگ ءَ بیتگ، آ باز کیسانی تہ ءَ پاکستانی واکداراں دزگیر کتگ ءُ بند کتگ۔ آئی دزگیری ءَ پد بلوچستان باز براں زَھرشانی ھم بیتگ، انسانی ھکانی ادارھاں ھم آئی ءِ یلہ کنگ ءِ لوٹ کرتگ۔

مھرنگ بلوچ ءَ یک پیگام ءُ کلوھے داتگ کہ وتی راج ءَ گْوشگ ءَ اِنت وتی جھد مھکم بہ کن اِت۔ مھرنگ بلوچ پہ بلوچ راج ءِ ھاتر ءَ مروچی بیگواہ اِنت ءُ زندان ءَ بندیگ اِنت، مارا ھمے جھد کنگ لوٹ ایت ءُ وتی رَھشونانی ھاتر ءَ توار چست بہ کنیں ءُ سرجمیں راج ءَ یک توار جوڑ بہ کنیں۔ پرچا کہ آ پہ بلوچ راج ءِ راجی باندات ھاتر ءَ جھد کتگ ءُ مرچی زندانی اَنت، بائد ما ھم جھد بہ کن اِیں ءُ وتی راج ءِ باندات ءِ ھاتر ءَ توار چست بہ کن اِیں کہ اے مئے راجی زمہ واری اِنت، ءُ راجی زمہ واری ءِ پیلو کنگ ھر بلوچ پُسّگ ءِ پرز اِنت۔