مھروانیں کامریڈ

نبشتہ کار: دیدگ نور

سلام کامریڈ!

اُمیت کناں کہ تو وش ءُ جوڑ بہ ئے ءُ تئی سنگت ءُ مردم ھم وش ءُ جوڑ اَنت۔

کامریڈ بِہ گندے تو انوں سنگتانی میان ءَ دَست گَٹ بہ بہ ئے، بہ گندے مئے ھیالاں مہ بہ ئے، بلے من زاناں تو اے وھد ءَ وتی گَل ءِ کارانی بابت ءَ جیڑگ ءَ بہ ئے۔ بہ گندے جیڑگ ءَ ئے کہ من اگاں تئی کِرّ ءَ بوتیناں گُڑا تئی کار کمھیں ارزان تِر بوتگ اِت اَنت۔

بلے کامریڈ!

تو زان ئے کہ مروچی ما گُلامی ءِ سانکلاں بندیگ ءُ ھرکس وتی ھساب ءَ وتی جاھانی سر ءَ کار ءَ اَنت، من ھم ھما زلورت ءِ ھساب ءَ وتی جاہ ءَ نِشتگ ءُ تو ھم وتی لوٹانی ھساب ءَ کارانی سر ءَ نِشتگ ءُ دلگوش ئے۔

کامریڈ!

سک باز وھد ءَ پد تئی گوم ءَ ھال بوتگ اَت، گُڑا من سَما کُت کہ تو انگت  مُھکم ءُ وتی کارانی شر کنگ ءِ جُھد کنگ ءَ ئے، تو پیسر ءَ گْوشتگ اَت کہ اے الم شر بہ اَنت ءُ راستی ءِ کار پہ گیگ ءُ گْوم بہ اَنت، بلے کُرباناں وتی ھیال ءَ  بِدار۔ من زاناں تئی توکا سَگ ءُ اوپار، ھاٹیگ ھست اِنت، بلے برے برے گُمان ءَ  چہ مستر روت۔ بہ گندے تئی ھیالانی توکا بئیت کہ گوں من نہ بیت، بلے ھمے ساھت ءَ وتی ھمّت ءَ دور مہ دے ءُ گیشتر مھکم ءُ شوک ببو پرچا کہ شَریں کارے کہ تو کنگ ءَ بہ ئے، گُڑا سک باز جیڑہ ءُ جنجال چوں باتیل ءِ کوہ ءَ تئی دیم ءَ مِک بہ اَنت، بلے ترا اُوشتگی اِنت۔

کامریڈ!

من انوں اوتاک ءِ توکا نشتگ ءُ پرتو اے نِمدی ءَ نویسگ ءَ آں، بلے اُستاد ولا تئی لبز  دیم ءَ پیداک اِنت۔ من بس گْوشگ لوٹاں کہ اُستاد مُھکم ببو، ھرچی کہ جیڑگ ءَ ئے بس پرتو چہ ھاوند ءَ دُوا لوٹاں کہ سوبین بات ئے۔ دائم ءَ وش بات ئے ءُ چہ سَکّیاں گِستا بچکند تئی لُنٹانی سر ءَ تالان بات اَنت۔ نوں من ترا رُکست کناں کہ دیم پہ سپر ءَ درکپگی اِنت، وھد ھم  ھلاس اِنت۔

وش ءُ وشدل بات ئے کامریڈ۔

تئی سنگت دیدگ نور

ساھت: بیگاہ ءِ شش بج

رمس: ھپدہ نومبر دو ھزار بیست ءُ پنچ