نبشتہ کار: شے مرید بلوچ
مروچی مئے سرھال ھمے انگریزی سرھال ءِ سر ءَ اِنت، ایشی ءِ مول ءُ مُراد ایش اِنت کہ ” دُژمن مئے اندر ءَ “ چوں زندگ بوت کنت، بِزاں آ کُجام مئے وتی ردیاں کہ چَریشی ءَ دژمن کُمک زور اِیت ءُ مئے سر ءَ وتی زوراکی ءَ برجاہ دار اِیت؟
گوں سُبکّیں گالاں اِیشی ءَ چوش بیان کناں کہ ما چوں یک زورگِریں تاکتے ءَ را اِنڈائریکٹلی کُمک کنگ ءَ اِیں کہ آئی ءَ مئے سر ءَ وتی زوراکی برجم داشتگ؟
چوناھیا اے سرھال انگریزی زبان ءِ تہ ءَ باز نبشتہ کنگ ءُ ڈِسکس کنگ بوتگ ، من اُوں چہ انگریزی ءَ ونتگ نوںکوشست کناں کہ بلوچی ءِ تہ ءَ ھمے سرھال ءِ سر ءَ چیزّے نبشتہ بہ کن آں۔
چوش کہ گُلام ءِ بستار مئے اندر ءَ لھتیں انچیں ساھت کاینت کہ ما آیاں نہ پھم اِیں ءُ سرپد نہ بہ اِیں یا کہ راستی چہ مئے چمّاں گار بیت، ما بس مامانگی (کنفیوژن) ءِ شکار بہ اِیں ءُ وتی ردیاں چہ گیش اَزیت ور اِیں۔
بزاں ما انچوش مانگیش اِیں کہ ما نیک ءُ بَد ءَ سرپد نہ بہ اِیں، گُڑا ھمے ناسرپدی ءِ سبب ءَ زوراک گیش کئیت ءُ مئے اندر ءَ جاہ کنت، ءُ وتی زوراکی ءَ زندگ دار اِیت۔ گوں جُتائیں پِگر ءِ مَردماں مئے اندر ءَ ساڑی بیت، بلے ما آئرا وتی دُژمن لیکّگ ءِ بابت ءَ بھ نہ جیڑ اِتگ۔
نوں ما کا اِیں ءُ ھما دُرستیں پِگر ءِ مردمانی ڈِسکس ءَ کن اِیں کہ آ چوں مئے رَدیانی سبب ءَ ریاستی ٹولی ءِ دْروشم ءَ مئے اندر ءَ کاینت ءُ زورگِر ءِ زوراکی ءَ گیش مھکم کن اَنت۔
کولابوریٹر : Collaborator،
اے ایردستیں چاگِرد ءِ ھما مردم بہ اَنت کہ آ تچک ءَ تچک زورگِر ءِ گوم ءَ کار کن اَنت۔ زورگِر ءِ واستا چاریگی (جاسوسی) کن اَنت، اے مَردم انچیں دابے ءَ تھریکانی اندر ءَ پُتر اَنت ءُ پد ءَ تھریکاں دوکہ دے اَنت ءُ آیانی شوربندیاں نہ منّ اَنت، بلکیں تچک ءَ (ڈائرکٹ) زورگر ءِ پوجیانی ھمراھداری ءَ کن اَنت ءُ آیانی کُمک ءَ مُدام جاڑیگ بہ اَنت۔ اے کولابوریٹر پد ءَ ایردستیں تھریکاں نُکسان دے اَنت، اِے مردم چاگرد ءِ تہ ءَ نشتگ ءُ زورگر ءَ ھر رنگ ءَ کِمک (سپورٹ) کن اَنت، آ توری انٹیلیجنس بہ بیت یا کہ لِجٹِیمیسی ءُ ٹیکٹیکل زلورت بہ بہ اَنت۔
اے پیمیں مردم پد ءَ زورگر ءِ واستا راز چِن ءُ یکجاہ کن اَنت، پد ءَ ورناھانی گار ءُ بیگواھی ءَ بہ گر داں ٹارگِٹڈ آزار دَیگ ءِ وڑیں سِلکاریانی تہ ءَ ھوار بہ اَنت۔ پہ درور مروچی اے تب ءِ مردم بلوچ چاگرد ءِ تہ ءَ ھم گِندگ بہ اَنت کہ آ بلوچ ءِ چُکچینی بہ بیت یا کہ زوراکی، اے دُرستیں کاراں زورگِر ءِ کولابوریٹر کنگ ءَ اَنت. بزاں کہ آئی ایس آئی ، ایم آئی ، ڈیتھ اسکواڈ ءُ دگہ ریاستِ پاکستان ءِ جوڑ کُتگیں ٹولی بہ بہ اَنت اے تئی چاگرد ءِ تہ ءَ اَنچُوش جاہ کن اَنت کہ ترا سما اُوں نہ بیت کہ کُجام مردم ریاست ءِ کولابوریٹرے؟
نارملائزرس : Normalizers
اے ھما مردم بہ اَنت کہ آ ھاس آرٹِسٹ ، سلیبریٹیز ءُ یا کہ پہ آیاں سُبکیں گال ایکٹویِسٹس ءِ نام دیگ بیت۔ اے نارملائزرس ھاس کلچرل فِگَرز گوشگ بہ اَنت کہ آ لھتیں انچیں پروگرام ءُ پروجکٹ دیم ءَ کار اَنت ءُ زورگِری ءَ نارملائز کنگ ءِ کوشست ءَ کن اَنت ، بزاں گھگیری ءَ sanitize ءُ depoliticize کنگ ءِ جُھد ءَ کن اَنت۔ نوں اے ھما مردم بہ اَنت کہ ایردستیں چاگرد ءِ تہ ءَ گوں زورگِر ءَ کار کن اَنت ءُ زورگِری ءَ منّارین اَنت۔
نارملائزرس ایردست ءِ تھریک ءَ اے رنگ ءَ نُکس دنت کہ آ زورگِر ءِ زوراکی ءَ را انچیں دْروشمے ءَ پیش کنت کہ آ زوراکی یے گوشگ مہ بیت، بزاں آ زورگِر ءِ زورگِری ءَ ری برینڈ کنگ ءِ جُھد ءَ کن اَنت۔ آ وتی زورانسری ءَ را یا کہ وتی زوراکی ءَ را اِسٹیبلٹی ءِ نام ءَ دنت ءُ یک سافٹ نیریٹیوے جوانیں کنت دانکہ مھلوک اے رنگیں اَمل ءُ کارپداں نگد ءُ اِیر مہ جن اَنت۔
کُمکّار یا کہ اِنابِلرز : Enablers
اے ھما اَدارہ ءُ میڈیاھاؤسِز ، انپلونسّر یا کہ گل (تنزیم) بہ اَنت کہ آ نارملائزر ءِ درشان (بیانیہ) ءَ دیم ءَ کار اَنت، دیمروئی دے اَنت کہ آ ایردستیں راج مزلوم کوم ءِ راست ءُ گْواچنیں توار اِنت۔ ھمے ادارہ ءُ میڈیا ھاؤسِز ءِ مردم کہ ھستاں بزاں اِنابلرز اے ریاست ءِ درشان (بیانیہ) ءَ انچیں بُرزی یے دے اَنت بزاں دلگوش گور کن اَنت ءُ راستی زائر کنگ ءِ کوشست ءَ کن اَنت، گُڑا اے رنگیں اَمَل ءُ ٹرنِنگ ایردست ءِ لوٹ ءَ نُکس ءُ تاوان دنت۔ بزاں اے پیمیں مردماں پد ءَ ریاست دیم ءَ کار اِیت ءُ رسانکدر ءُ ادارہ ایشاں انچیں دلگوشے (کئوریجے دنت) گْور کنت کہ اے مردم پد ءَ جُھد ءِ مستریں دُژمن زانگ بہ اَنت، بلے ایشاں میڈیا پرنٹ ءَ کار اِیت ءُ ایردستیں راج ءِ مین اِسٹریم ترجمان زائر کنت ءُ پد ءَ ھما کہ گواچنیں توار اِنت آئرا مارجِنلائزڈ کنت۔ گُڑا میانجی ءَ جُھد ءِ مستریں رکاوٹ ھمے رنگیں مردم بہ اَنت کہ آیاں سینیٹائزر ءُ انابلرز گوش اَنت۔
مروچی چوشیں ھزاراں مردم ھست اَنت کہ آ بلوچ جُھد ءِ کاؤنٹر کنگ ءِ کوشست ءَ اَنت، آ چیروکائی ءَ کار ءَ اَنت، بلے بایدیں مھلوک ءُ ھاس تھریک اے پیمیں مردماں چہ وت ءَ بہ رکّیت، تچک ءُ رَد ءَ بہ پھم اِیت، چوشیں مردم سوشل میڈیا ءُ دگہ پلاٹفارمزانی تہ ءَ گِندگ بہ اَنت، آ ویلوگرے بوت کنت، ٹِک ٹوکر ءِ رنگ ءَ بوت کنت، بازینیں وتی جند ءَ چینلائز کنگ ءِ کوشست ءَ کنت ءُ وت ءَ دیم ءَ کار اِیت ءُ پد ءَ جُھد ءِ ھِلاپ ءَ کار کنت، بلے مھلوک ایشی ءَ وتی دوست ءُ نیک سرپد بہ اَنت۔
پہ درور بازیں انچیں ریاست ءِ ایجنٹ ھَست اَنت کہ آ اِھوالکاری ءِ نیمون ءَ روت گوں جُھدکاراں گُلگدار کنت ءُ پد ءَ وڑے نا وڑے ءَ رازاں کشّ اِیت ءُ جُھد ءَ نُکس دنت۔ ھاس منی جند ءَ اے چیز مار اِتگ ءُ دیستگ، ایکسپیرینس کُتگ، پہ درور من انچیں ٹک ٹوکر دیستگ اَنت کہ آیاں اولی ءَ بلوچ ءِ توار دیمروئی داتگ، بلے وتی سیتانی ھاتر ءَ کہ ما نامدار بہ بہ اِیں، پد ءَ ھمے کہ نامدار بوتگ اَنت رسانکدر ءَ گُڑا گُڈی ءَ اتکگ ءُ ریاست ءِ ایجنٹے ءِ رنگ ءَ کار اِش کُتگ۔ پد ءَ اے یک سکیں پشومان ئیں ھبرے کہ تھریک ءُ مھلوک ءَ پد ءَ ھمے رنگیں مردم رسانکدر ءَ گیش پروموٹ کُتگ اَنت، بزاں اے مردم یک انچیں رنگے ءَ کاینت کہ ترا سما نہ بیت۔ تو تھنا آئی ءِ زائری کِرداں گِندے وتی دوستے لیک ئے، بلے پُشت ءَ اے دگہ نیّتے ءَ گوں تو ھمگْرنچ بیت۔
بُروکرز : Brokers
اے نوں انچیں مردم بہ انت مھلوک ءِ اندر ءَ ، اے ھاس این جی اوز ، ءُ ڈونر نیٹ ورکنگ ءِ مردم بہ اَنت کہ ایشانی دست ءَ چاگردی مالیات (سماجی فنڈز) ءُ دگہ چاگردی کاراں ھوار بہ اَنت۔ اے پد ءَ گیش سیفٹی ءِ منّوک بہ اَنت، بزاں اے امن ءُ اِیمنی لوٹ اَنت۔ اے نہ لوٹاں کہ جنگ ءُ چوپ بہ بیت، تھریک بہ بیت، اے پِگر ءِ مردم ریاست ءِ ڈی پولیٹِسائیزڈ ایکٹرزاں گیش پروموٹ کن اَنت۔ بزاں اے نہ لوٹ اَنت کہ گھگیری بہ بیت یا کہ راجی جنگ بہ بیت، اے بس گوں ھمے سسٹم ءَ گام جَنگ ءُ دیم ءَ روگ لوٹ اَنت۔ اے راجی جُھد ءَ نہ منّ اَنت ءُ گھگیری تھریک ءِ ھلاپ بہ اَنت۔
اے بروکرز ھما مردم بہ اَنت کہ آیانی مدام کوسشت ھمے بیت کہ ما گھگیری ءَ فَلٹر بہ کن اِیں، آ ریاست ءِ ھمُک زوراکی ءَ چیر دیگ ءِ جُھد ءَ کن اَنت، بزاں اے تھریک ءَ دنیا ءِ دیم ءَ کسانیں جیڑھے پیش کن اَنت۔ پہ درور مروچی بلوچ جُھد ءَ را ریاستی درشان (بیانیہ) یک تولی یے ءِ نارازی یے پیش کنت یا کہ ھندوستان ءِ ناشرکار گْوش اِیت دنیا ءِ دیم ءَ۔ اے جُھد ءِ لوٹاں نزور کنت ءُ ریڈیکل توار ءَ ایرجن اَنت۔
پَرفورمّیٹیو ایلیز ; Performative Allies
اے نوں ھما مردم یا کہ سیاسی گل (تنزیم) بہ اَنت کہ آ سر زائر ءَ تئی ھمراہ اَنت، بلے گْواچنیں اَمَلانی تہ ءَ گوں نہ اَنت۔ اے مردم تھنا زبانی تئی مردم اَنت، سوشل میڈیا ءَ پہ تو گپ ھم جن اَنت، وڑے ناں وڑے ءَ پیش ھم دار اَنت کہ ما راجدوست ایں ءُ پہ راج ءَ کار ءَ ایں، بلے راستی ایش اِنت کہ اے پِگر ءِ مردم راستی ءِ جاہ ءُ تچکی ءَ گون نہ اَنت۔ آ وتی مکسد ءِ ھاتر ءَ مھلوک ءُ تھریک ءَ ھمگرنچ بہ اَنت، بلے اَمَلی دْروشم ءَ گار اَنت۔ پہ درور مروچی بلوچ ءِ یک جنگے بوَگ ءَ اِنت، اے جُھد ءَ را بس لبزانی تہ ءَ کید کن اَنت ءُ لبزانی دْروشم ءَ رسانکدر ءَ پیش دار اَنت کہ ما بلوچ ءِ دردوار اِیں، بلے اَمَلی دْروشم ءَ کس زائر نہ بیت۔ دُرست تچ اَنت ءُ کس پہ راستی جُھد ءِ کُمک ءَ نہ کنت۔ دگہ درورے ایش اِنت کہ بلوچ سیاسی گَل کہ وھدے زھرشانی کن اَنت یا کہ کیمپئین جوڑ کن اَنت، گُڑا ایشانی ھمراھداری ءَ اے مردم نہ کن اَنت ءُ ناں کہ سیاسی گلاں مالی ءُ ایدگہ رنگ ءَ کُمک کن اَنت، بس تھنا دو پوسٹ رسانکدر ءَ شِنگ کن ءُ وت ءَ راجدوستی ءِ چیدگے جوڑ بہ کن۔ اے رنگیں مردم ءُ ٹولی تھریک ءَ ھمے نُکس دے اَنت کہ تھریک ھمے سرپد نہ بیت کہ اے مئے مردم اَنت یا کہ زوراک ءِ؟ پہ درور بلوچ جُھد ءِ تہ ءَ چوشیں بازیں مردم بوتگ اَنت کہ آیاں جُھد ءَ را مالی ءُ مردمی کُمک کُتگ، بلے اے کُمک ءِ پُشت ءَ یک دگہ ھم مکسدے بوتگ کہ آیاں ھمے کُمک ءِ پُشت ءَ بازیں سنگتے دُژمن ءِ دست ءَ جنائنتگ ءُ کوشارینتگ۔ اے گپانی مول ءُ مُراد ھمیش اِنت کہ جُھد کار سالیڈیرٹی مامانگ (کنفیوژن) ءِ شکار بہ اَنت، دوست ءُ دُژمن ءِ نہ پھم اَنت۔
موہ (موقع) پرست ; 0pportunists
اے ھما کار ءُ باری مردم بہ اَنت کہ وتی بِزنس ءِ دیمروئی ءِ ھاتر ءَ یا کہ وتی سیت ءُ نپّانی دزگِرگ ءِ واستا گوں تھریک ءَ نَزیک بہ اَنت، بلے اے مردم مرچینڈائزر، سیاسی کنسِلٹینٹ، آرگنائزر ءُ کاروباری مردم اَنت کہ پہ وتی نَپ ءُ سیتانی ھاتر ءَ گوں جُھد ءَ ھمگْرنچ بہ اَنت۔ پہ درور مروچی بلوچ ءِ سیاسی تھریک بی وائی سی ءِ سرپیس ماس پولٹِیکس اَنچُوش ٹرینڈنگ ءَ بوت کہ بلوچ چاگرد ءِ ھمُک تبک ءَ گوں تھریک ءَ نَزیکی کُت، آئی ءِ تہ ءَ ریاست ءِ مردماں ءَ ھوار موہ پرستیں بلوچاں ھم، بازینے ءَ وتی کاروبار ءِ دیمروئی ءِ ھاتر ءَ وتی بَساناں پہ یک ءُ دو روچ ءِ واستا دات۔ بازیں ویلوگرے ءَ وتی رسانکدر ءِ چینل ءُ دگہ کارانی پروموشن ءِ ھاتر ءَ گوں تھریک ءَ نَزیکی کُت، بازیں مردم انچیں بوتگ اَنت کہ آیاں ڈاکٹر مھرنگ ءَ گوں اکس کَش اِتگ ءُ وت ءَ راجدوستے لیک اِتگ، بلے مروچی کہ ڈاکٹر مھرنگ پاکستانی ٹارچرسیلانی تہ ءَ بند اِنت گُڑا ھمے مردم مروچی گار اَنت۔ چہ جُھد ءَ گِستا گوں وتی کاروبار ءَ گسی اَنت، مروچی ھمے بس والا اگاں یک نودربرے ءِ کِرّ ءَ چہ پنچ سدی یے کم بہ بیت آئرا کراچی تہ تُربت یا کہ تُربت تہ کراچی ،( یاکہ دگہ جاہ ءَ )، بسانی تہ ءَ نِندگ ءَ نیل اَنت۔ تھنا بَس والا نہ، بلکیں دُرستیں موہ چار کہ آیاں پہ وتی مکسد ءِ گِرگ ءِ ھاتر ءَ گوں تھریک ءَ ھمگْرنچی کُتگ۔ اے راست ءُ تچکیں مَردم نہ اَنت، اے گُڈّسر ءَ تھریک ءَ نُکس دے اَنت ءُ تھریک ءِ نام ءِ سر ءَ کاروبار کن اَنت۔ اے ھما پِگر ءِ مردماں کہ وھدے تھریک مُھکم بیت گُڑا گوں جُھد ءَ نزیکی کن اَنت، اگاں تھریک کمو نِزور بہ بیت یا کہ ریاست کاؤنٹر پالیسی ءَ تْرند بہ کنت گُڑا اے زوت تچ اَنت ءُ گار بہ اَنت، ءُ پد ءَ پہ چم جھلی ریاست ءِ ھمراھی ءَ کن اَنت۔ ابید چہ کاروباری مردماں ایشانی اندر ءَ لھتیں سیاسی مردم ھم بہ اَنت کہ آ مھلوک ءِ جُھد ءَ را Commodify کنگ ءِ کوشست ءَ کن اَنت، بزاں تھریک ءَ را یک بِرانڈے ءُ پروڈکٹے پیش کن اَنت۔ آ مھلوک ءِ ھیال ءُ دلگوش ءَ مٹ کن اَنت ءُ وتی نیمگ ءَ ترّین اَنت۔ یک نبشتہ کارے ایشاں اے رنگ ءَ پیش کنت کہ، “They are the people or groups who work on skewing priorities , commodifying resistance or draning resources” .
پِرکہ وارانہ پِگریں مردم ءُ پجار ءِ پُروشوکیں مردم:
Sectarianizers and Identity Splitters:
اے ھما مردم بہ اَنت کہ چاگرد ءِ تہ ءَ پِرکہ واری ءِ لیکہ ءَ دیمروئی دے اَنت یا کہ زبان ءُ ٹکّ ءِ بُنیات ءَ ناٹھی ودی کن اَنت۔ ایشانی کار مھلوک ءِ میان ءَ بے باوری ودی کنگ ءُ یکمُشتی ءَ پُروش دیگ۔ مھلوک ءَ مزھب، ٹکّ ءُ بولک ءِ بُنیات ءَ بھر ءُ بانگ کنگ کہ چریشی راجی یکمُشتی پْروش بہ وارت۔ اے ھما مردم بہ اَنت کہ زورگِر ءِ ڈیوژن پالیسی ءَ کارمرز کن اَنت ءُ ایردستیں راج ءِ یکمُشتیں تھریک ءَ مائکرو بولک ءِ تہ ءَ مٹ کنگ ءِ کوشست ءَ کن اَنت، گُڑا اے پِگر ءِ مردم پہ تھریک ءَ سک ھترناک ءُ تاوان بار جوڑ بہ اَنت۔ ایشانی کار ھمے بیت کہ وڑے ناں وڑے ءَ تھریک ءِ یکمُشتی پْروشگی اِنت، پہ درور اے پیمیں مردم مروچی بلوچ تھریک ءِ ھلاپ ءَ باز چاڑکّہ (ایکٹیو) اَنت۔ مرچی سرپراز بُگٹی ءُ بُگٹی سردار کہ سرکار ءِ کاسگ چَٹّ اَنت، اے وڑیں مردمانی کار ھمیش اِنت کہ بلوچ تھریک ءَ یک نارزا ٹولی یے ءِ نام دیگ یا کہ بلوچ ءَ را براھوئی ءُ بلوچ ءِ نام ءِ سر ءَ بھر ءُ بانگ کنگ کہ براھوئی یک راجے ءُ براھوئی راج چہ بلوچ راج ءَ جُتا اِنت، گُڑا اے رنگیں شوربندی بلوچ ءِ یکمُشتیں توار ءَ پْروش دنت۔ پمیشکا بلوچ راج ءُ تھریک اے پِگر ءِ مردماں کاؤنٹر بہ کنت ءُ اے پیمیں مردماں جُھد ءِ سروک کنگ پہ تھریک ءَ مزنیں نُکس ءُ تاوانے۔
مروچی سرپراز بنگُلزی وت یک پدّریں درورے۔
ٹرولز ، دروگیں تاوان ءُ ردیں مالومات شِنگ کنوک: Trolls,Astroturfers and Info -Saboteurs :
اے ھما مردماں کہ آ سوشل میڈیا ءَ ڈیس اِنفارمیشن ءُ فیک پروپیگنڈہ ءِ کاراں کن اَنت۔ ایشانی کار سوشل میڈیا ءِ تہ ءَ ریاستی درشان (بیانیہ) ءَ مُھکم کنگ۔ پہ میڈیا ءِ کارانی دیم ءَ برگ ءَ ریاست ءِ نیمگ ءَ ایشاں زَر ءُ لالچ دیگ بیت، اے مردم پہ ریاست ءَ میڈیا وارپیئر ءِ جنگول زانگ بہ اَنت کہ آ ریاست ءِ جوڑ کُتگیں نیٹورکساں اوپریٹ کن اَنت ءُ پہ زورگِر ءَ ڈس انفارمیشن کنٹینٹ جوڑ کن اَنت۔ چہ اے کار ءَ ریاست ءِ پروپیگنڈہ مھکم کنگ بیت۔ اے مردمانی کار ھمے بیت کہ میڈیا ءِ وسیلگ ءَ یا کہ دگہ ڈیجیٹل پلاٹپارمزانی وسیلگ ءَ ریاستی درشان (بیانیہ) مھکم کنگ ءُ ایردستیں راج ءِ راستیں توار ءَ ایرجَنگ ءُ آئی ءَ کاؤنٹر کنگ اِنت۔ اے سوشل میڈیا ءَ ابید ھم تھریکاں نُکسان دے اَنت، اے مردم تھریک ءِ اندر ءَ کسانیں نِزوری یے بہ گند اَنت گُڑا ایشی ءَ اَنچُوش دیمروئی دے اَنت ءُ سوشل میڈیا ءَ پروپیگیشن ءَ گوں مُھکَمی ءَ کن اَنت دانکہ مھلوک چہ تھریک ءَ بے اُمیت ءُ دلپروش بہ بیت۔ مامانگ (کنفیوژن) ءِ آماچ بہ بیت، چہ اے رنگیں اَمَلاں راج ڈی موبلائزیشن ءِ نیمگ ءَ روت۔
پہ درور مروچی ریاست ء پاکستان بلوچ تھریک ءِ ھلاپ ءَ ھر وڑیں پروپیگنڈہ دیم ءَ آرگ ءَ اِنت ءُ رسانکدر ءِ وسیلگ ءَ ڈِس انِفارمیشن شِنگ کنگ ءَ اِنت دانکہ وتی رد بیانی ءَ گیش پروموٹ بہ کنت۔ آ پروپیگنڈہ کنت کہ بلوچستان ءِ سرزمین ءِ سر ءَ چوشیں ھچ تھریک ءُ جنگ نیست، بلکیں اے لھتیں ھندوستان ءِ ناشرکاراں کہ پاکستان ءَ پْروشگ لوٹ اَنت، بلے ایشی ءِ تہ ءَ ھچ راستی نیست۔ اے یک گْوستانکی دُروگے، بلوچ ءَ را ھپتاد سال ءَ گیش اِنت کہ وتی آجوئی ءِ جنگ ءَ اِنت، بلے اے ریاست میڈیا ءِ وسیلگ ءَ وتی درشان (بیانیہ) اَنچُوش مھکم کُتگ کہ ایردست وتی توار ءَ ھم دنیا ءِ دیم ءَ بُرت کنگ ءَ نہ اِنت۔ اے زورگِر وتی بلیک پروپیگنڈہ ءِ کُمک ءَ وتی درشان (بیانیہ) ءَ دنیا ءِ دیم ءَ گیش منّارینگ ءَ اِنت۔ نوں اے کار ءِ کاؤنٹر کنگ ءِ واستا مارا ٹیکنالوجیکلی مُکھم بوَگی اِنت، مارا وتی مھلوک مجگی ءُ سسّائی دْروشم ءَ مھکم کنگی اِنت، سمائی رِد ءَ ھم مارا مُکھم بوَگ لوٹ اِیت۔ دگہ یک گپّے مارا سرپد بوَگی اِنت کہ وتی اندر ءِ دُژمن ءَ پجّا بیاری ، باز براں مئے وتی مھلوک ءِ تہ ءَ انچیں مردم ھست کہ وت ءَ سر زائر ءَ راجی مردم لیک اَنت، بلے ھمے مردم ھاس ریاست ءِ انفارمنٹاں ءُ ڈس انفارمیشن شِنگ کنوک اَنت، بلے اے وڑیں مردماں ما پجّا نیار اِیں ءُ رسانکدر ءِ وڑیں جاہ ءَ اِیشاں گیش دلگوش (کئوریج) دے اِیں۔ اے پیمیں مردماں ھما وھد ءَ زانیں دانکہ مئے تھریک ءِ اندر ءَ ٹیکنالوجیکل کپیسِٹی مھکم بہ بیت، پرچا کہ ایشی ءِ وسیلگ ءَ تو دُژمن ءِ چیریں کار ءُ کِرداں سرپد بہ ئے۔
کو- آپٹرز : Co-opters
اے ھما مردم بہ اَنت کہ ایشاں گوں جُھد ءَ پہ راستی ھچ کار نیست، اے بس پہ وتی مکسد ءِ ھاتر ءَ نزیکی کن اَنت گوں جُھد ءَ ، بلے راستی ایش اِنت کہ اے مردم چہ گْواچنی ءَ دور اَنت۔ اے وتی پدریچ (نسل) پرستی ءَ رد کارمرز کن اَنت ءُ تھریک ءَ نزور کن اَنت۔ پہ درور مروچی ما چار اِیں کہ زالبول ءِ ننگ ءُ گیرت ءِ پھازگ بلوچ دود ءِ بھرے، بلوچ چہ وتی پُشپَداں چِہ گیرتمندیں راجے زانگ بیت، بلے اے کو -آپٹرز بلوچ ءِ دوداں رد کارمرز کنان ءُ گیرت ءِ نام ءِ سر ءَ جن اَنت ءُ کُش اَنت۔ چوش کہ ھمے سال ءَ زہری ءِ ھند ءَ بوتگیں واکیہ وت یک مزنیں درورے کہ زالبولے گوں وتی دوستیگیں مرد ءَ آروس کنت، پد ءَ آ گیرت ءِ نام ءِ سر ءَ جَنگ ءُ کُشگ بیت۔ ایشی ءَ ابید کو-آپٹرز راجی گھگیری ءَ را زورگِر ءِ لبزاں گوں بیان کنت، بزاں جُھد ء آزاتی ءَ را ”ڈائیلوگ“ ءِ دْروشم ءَ ، ءُ آشوب ءَ را یک سافٹ پالیسی یے ءِ رِد ءَ مٹ کنت۔ اے پِگر ءِ مردم راجی جُھد ءَ را ڈائیلوگ ءِ وسیلگ ءَ توجیل کنگ ءِ کوشست ءَ کن اَنت، آ دنیا ءُ مھلوک ءَ را اے باور کنائین اَنت کہ اے جیڑہ گوں ایگریمنٹ ءُ منّگ نامگ ءِ وسیلگ ءَ سوبین بوت کنت۔
نوں گپ ایش اِنت کہ ھر ھما دژمن ءِ پندل کہ مئے اندر ءَ ھست اَنت مارا آ سرجم ءَ ولگوج کنگی اَنت، مارا اے اندیمیں اَمَل سرپد بوَگی اَنت کہ آ کُجام مئے ردیاں کہ دژمن مئے اندر ءَ چِہ ولگوج بوگ ءَ نہ اِنت؟ مارا چہ وتی بے سمائی اَمَلاں پھریزگ لوٹ اِیت کہ چرائی ءَ ما نُکس ورگ ءَ اِیں؟ بُرز ءِ دُرستیں زورگر ءِ چھرگ اِنت کہ دژمن ھمے شوربندیاں کارمرز کنت ءُ مئے اندر ءَ جاہ کنت، ما پد ءَ نازانتی وتی رازاں دُژمن ءِ گْور ءَ شِنگ کن اِیں یا کہ پہ نازانتی زورگِر ءِ مردماں کُمک کن اِیں ءُ دیم ءَ کاریں، بلے ھما کہ تچک ءُ راستیں مَردماں یا کہ بلوچ ءِ گْواچِنیں توار اَنت ما آیاں دیم ءَ آرگ ءِ بدل ءَ آیاں ایرجن اِیں، گُڑا ما ھمد ءَ چہ نِزور بہ اِیں ءُ زورگِر ءَ پہ نازانتی کُمک کن اِیں۔ اگاں اے ردیاں ما وتی پوہ بہ بہ اِیں ءُ بہ زان اِیں گُڑا زورگِر ءِ زورگِری مئے اندر ءَ زوت مِر اِیت ءُ پہ مُجّتی ھتم بیت۔ پرچا کہ سیلف ڈائریکٹ وار ءِ تہ ءَ ھم ھمے نبشتہ اِنت کہ ”تو جنگ ءَ ھما وھد ءَ باج برے ، دانکہ تو وتا ءُ وتی دژمن ءَ شَریں وڑ ءَ بہ زان ئے۔ اگاں تو وتی اندر ءِ نِزوری نہ زانتاں ءُ دُژمن ءِ چالاکی، گُڑا تو جنگ ءَ بے سوب بہ ئے ءُ دژمن ترا پہ مُدامی ایردست کنت۔ تو ایردستی ءِ سانکلاں بھ دراَتک نہ کن ئے۔“
