نبشتہ کار: بابا جی آر بلوچ
ڈیھانی کسہ ساچگ ءِ نام مولمانی یاتگاری اِنت، ھمک مولم ءِ وتی زیبداری یے ءُ ماں ڈیھاں چاڑے ءِ مانزمان اِنت۔ گوش اَنت بلوچ ءِ سرڈگار چہ ھمک پیمیں ھار ءُ ھیروپانی پاس ءَ گْوستگ ءُ لگتمال کنگ بیتگ، ڈیھ ءِ زیبداریں درچکاں وتی رنگ مٹّ کرتگ ءُ زرد چک جوڑ بیتگ اَنت۔ چمیشاں ھم من وتی ڈیھ ءِ بے چاڑی ءَ گند آں تکانسر ءُ مونجا باں، زمین ءِ ھمک پھنات چہ درچکانی تاکچنڈ ءِ تاکاں سُھر چک اَنت۔ نہ زاناں اے سُھری ءَ بلوچ ءِ زندمان ءَ چنچو بدلی آؤرتگ، بس ھمے سما کناں ڈیھ ءِ ھمک کنڈ چو شاپتگیں درچکانی تاکاں سھر چو شیک جمبرانی پیمیں رولہ رنگ ءَ اَنت ءُ زمین ھم سھر تر اِتگ۔ ھمک پھنات ءَ ترا گیرانی یک جھانے پہ سازگ ءَ دست کپ اِیت، ھمے سسّا ءُ ترانگانی تہ ءَ اِت آن ءُ من ءَ زمین ءَ پہ دیمونی داتگیں بچانی یک جلکشوکیں جلشکے ماں دیداں آتک ءُ من گوں زمین ءِ سازگ ءُ رنگ دیگ ءَ ملمہ بیت آن ءُ ھیالانی ترانگ ءَ گوں بچانی نازینگ ءَ نشت ءُ نبشتہ کنگ بندات کت۔
زمین ءِ ھمک کش ءُ گور ھون چکار اِنت۔
بلوچ ءَ وتی زگریں ھوناں گوں زمین ڈولدار کتگ۔
کش ءُ گْور ءَ ھچ چوشیں پَٹے نہ بچ اِتگ اَت کہ من اُود ءَ شھیدانی گیراں گوں بے وسی ءَ یات مہ کن آں۔
بس زمین ءِ ساچک ءِ ھیال ءَ اِت آن ءُ جھد کنگ ءَ اِت آں کہ ھمک شھیدانی ترانگ ءَ بہ باں کہ اے ماہ بزاں نومبر شھیدانی یاتگیری ءِ ماہ اِنت ءُ ھمے ماہ ءِ تہ ءَ بزاں نومبر ءَ ما مدام شھیداں نازین اِیں، بلے ھما شھید کہ پہ زمین کربان بیتگ اَنت ءُ توری آیانی کنٹ دز کپتگ یا کہ ناں۔۔۔۔۔۔
بس گیر آرگی اَنت ءُ آ نازینگی اَنت کہ آیاں پہ زمین وت ءَ کربان کرتگ، زمین چہ شھیدانی ھوناں ڈولدار بیتگ ءُ زمین ءِ ھر جاہ ھمے گْواھی ءَ دنت کہ بلوچ زمین پھاز اَنت وتی سر ءُ ساھانی دیگ ءَ چک ءُ پد نہ بنت۔ زمین زادگ بس یکشل ءَ نْدر بیان اَنت ءُ نوکیں کسھاں ساچان ءُ دیم ءَ جنزان اَنت۔ آیانی رندگیرانی بس ھمے گْوشگ اِنت کہ ما پہ زمین نْدر بیگ ءَ ساجو اِیں توری ھزاراں سر پہ زمین نْدر بیگ ءَ بہ لوٹ ایت، ما ھما وھد ءَ تا سراں دیاں بہ ایں تا مئے ڈیھ ڈولدار نہ بیت۔ ھستیناں گوں شھیداں ھمے کول کتگ کہ ما بہ ایں نہ بہ ایں پہ زمین ءِ ڈولداری ءَ چک ءُ پد نہ بہ ایں، شمئے رندگیر ایں ءُ شمئے رستگیں کشک ءَ ما جھلاد این ءُ پیداگ اِیں۔۔۔۔۔۔
آجوئی تا گڈی منزل ءَ۔۔۔
