نبشتہ کار: ھانی بلوچ
یک ھما راجی کارستے کہ کارستانی مات گوشگ بیت، چوناھا بلوچ ءِ گور ءَ بازیں کارست ھست بلے ھما اولی کارست کہ درستانی مات گوشگ بوت آ لمہ کریمہ اِنت۔ کریمہ یک ھیالے، یک پگرے ءُ یک آشوبے۔ یک ھمتے۔ یک جرتے۔ یک راجی سسایے۔
ھو کریمہ ھما درست اِنت کہ باز کم مردم اے بوت کن اَنت کریمہ ھما آشوبی ھیال اِنت کہ بلوچ زالبولاں سیاسی رنگے بکشاتگ ءُ کریمہ ءِ نام سیاسی کتاب اِنت۔ کریمہ ءِ گِس سیاسی گِس گوشگ بیت۔ کریمہ ءِ گِس چوناھا سیاسی گس اِنت کہ اود ءَ 40 سال بلوچ راجی جنز ءَ کار کنوک لمہ ءِ ناکو واھد کمبر ودی بوتگ، ھمود ءَ دگہ یک بلوچ جھدکارے کہ نمیران ءُ شھید ڈاکٹر ھالد ودی بوتگ۔
بانک کریمہ ماں دبئی ءَ 1986 ءَ مھراب ھان ءِ گس ءَ ودی بوتگ، کسانیں چہ دبئی ءَ گوازینگ ءَ پد وتی جند ءِ ھنکین تمپ ءَ کیت اِنت۔ بانک چہ وتی بنکی وانگ ماں تمپ ءَ در بارت ءُ بی اے ءِ چکاس ءَ چہ کیچ ءَ پاس کنت۔ بانک پہ دیمی وانگ ءَ شال ءِ روگ ءَ سرگر اِیت بلے بلوچ جنز ءِ نگیگیں جاور ءُ وتی زمہ واریانی ھاتر ءَ نہ روت اِنت۔ بانک چہ سیاسی چست ءُ ایراں وتی گس ءَ دربارت کہ اود ءَ سیاسی ، زانشتی ءُ زلم ءُ زوراکیانی کسھاں چہ وتی ناکو ءِ سیاسی ھمراھاں دربارت ءُ پد ءَ 2006 ءَ وھدیکہ بی ایس او ءِ سے جتائیں بھر ھوار بہ اَنت ءُ بی ایس او مھتدہ ءِ نام ءَ زانگ بہ اَنت گڑا بانک آئی ءِ بنجاھی کمیٹی ءِ باسک گچین کنگ بیت۔
اے ھما وھد بیت کہ بانک چہ تمپ ءَ در کئیت اِنت ءُ سرجمیں بلوچستان ءِ زالبول ءُ زھگانی سیاسی تربیت کنگ ءَ بندات کنت۔ اے ھما وھد بیت کہ دژمن چہ بانک ءِ تِرساں ورگ ءَ لگ ایت ءُ بانک ءِ دیم ءَ اڑاند جوڑ بیت۔ دژمن ءِ ھواری ءَ بازیں مردم ھم بانک ءِ سر ءَ وڑ وڑیں گپ کن اَنت بلے بانک نہ دژمن ءِ دیم ءَ نزور تر اِنت ءُ ناں کہ ھمے مردمانی گپاں چہ دلپروش بیت بلکیں بانک گوں ھمت ءُ ھوسلہ وتی کاراں دیم ءَ جنزین اِیت گوں ھمت ءُ ھوسلہ ءَ وتی کاراں دلجمی ءَ کنت۔ بانک ھما ھمت ءُ ھوسلہ ءِ نام اِنت کہ آئی برورد ءَ مروچی بلوچ زالبول سیاسی پڑ ءَ دیم ءَ اتکگ اَنت۔
بانک ھما امیت اِنت کہ آیاں نہ دیستگیں واب مانا کت اَنت۔ بانک دم نہ برت بانک ءِ پند باز دراج اَت ءُ ھمے ھمت ءُ ھوسلہ ءِ پند ءِ تہ ءَ بانک 2008 ءَ گل ءِ اژدھمی بنجاھی لس مجلس ءَ کستر کمک کماش (junior voice chairman) گچین کنگ بوت ءُ وھد ءِ 2009 ءَ گل ءِ مستر کمک کماش زاکر مجید آوار جنگ بوت گڑا بانک ءَ آ زمہ واری ھم سمبال ات اَنت۔ 2009 ھما زمانگ اِنت کہ پاکستان ءِ استان بلوچ جنز ءَ ھلاس کنگ ءِ درستیں پندلاں سازگ ءَ بوتگ بلے کریمہ ءُ آئی ءِ ھمراہ ءُ سنگتاں پروش دات ئِے نہ کُت۔ کریمہ ءَ ھوار کمبر ، کیوم، رزا ، سنا شھید کت اَنت اِت ءُ بازیں آوار جنگ بوت اَنت کہ انگت زالم ءِ ٹارچر سیل ءَ بند اَنت بلے جنز ءِ ھلاس نہ بوت۔
وھدے 2011 ءَ گل وتی بنجاھی مجلس ءَ اڈ دات نہ کن اَنت، گڑا آرگنائزنگ باڈی ءِ اڈ دنت ءُ بانک گل ءِ آرگنائزر گچین کنگ بیت۔ 2012 ءَ گل ءِ نوزدھمی بنجاھی مجلس ءَ بانک گل ءِ مستر کمک کماش گچین کنگ بوت ءُ مارچ 2014 ءَ وھد ءِ گل ءِ کماش زاید بلوچ بیگواہ کنگ بوت گڑا بانک کماش ءِ کاراں دیم ءَ جنزین ایت۔ اے ھما وھد بیت کہ بنجاھی ، ھنکینی ءُ بنزھی درستیں سنگتانی شھید کنگ ءُ گار ءُ بیگواہ کنگ برجاہ بیت بلے چہ دژمن ءَ نہ ترسگ ءُ گل ءِ کاراں گوں مھکمی ءَ جنزینگ ءِ سبب ءَ بانک پہ بی ایس او آزاد ءِ سنگتاں یک جنزگے اَت۔
2015 ءَ بانک کریمہ وتی دہ سال ءِ سپر ءَ پد گل ءِ بیستمی بنجاھی لس مجلس ءَ بی ایس او ءِ پنجاہ سالی ئیں بندپتر ءَ اولی زالبول کماش گچین کنگ بوت۔ بانک کریمہ ھما کارست اِنت ناں کہ تھنا یک سیاسی مردمے بوتگ بلکیں آ چاگردی پیسلہ سازے ھم بوتگ۔
بانک کریمہ ءِ گندگ ءُ آئی ءِ کھساں گوش دارگ ءَ پد بلوچ زالبولاں سیاسی ءُ وانگی میدان ءَ بھر زرت ءُ بانک کریمہ ءَ وتی لس مھلوک ءَ جلسہ ءُ جلوسانی دروشم ءَ تربیت دات ءُ زانت ءُ زانشت ءِ نیمگ ءَ برت اَنت۔ 2015 ءِ گڈسر ءَ بانک کریمہ گل ءِ پیسلہ ءِ رِد ءَ کینیڈا ءَ روت ءُ وتی سیاسی چست ءُ ایراں برجاہ دار اِیت ءُ بلوچ راجی جنز ءَ راہ پدر کنت ءُ زالم ءِ زلم ءُ زوراکیاں ھوار بلوچ زمین ءِ بندپتر ءَ زندگ دار اِیت ءُ آجوئی ءِ گپ ءَ کنت۔ 2018 ءَ گل ءِ بیست ءُ یکمی لس مجلس ءَ بانک کریمہ چہ بی ایس او آزاد ءِ باریگ بیت بلے چہ جنز ءَ نہ سیدی ءُ 2020 ءَ بی این ایم ءِ تہ ءَ بھر زور اِیت۔
20 دسمبر ءَ اے ناوشیں ھال کئیت کہ بانک چہ کینیڈا ءِ شھر ٹورنٹو ءَ بیگواہ اِنت ءُ 21 دسمبر ءَ بانک ءِ جون چہ ٹورنٹو ءِ زروانے ءَ دست کپ اِیت چار ءُ پجار ءَ پد 24 ءُ 25 جنوری ءِ میانی شپ ءَ بانک ءِ کنٹ ما کراچی ءِ بالی پٹ ءَ سر بیت۔
بانک کریمہ ءِ شھید بوگ پہ بلوچ راج ءَ یک سکیں دردناکیں ھملے اَت۔ بانک ءِ شھادت بلوچ ڈیھ ءُ مھلوک ءِ جوزگاں جسکین ایت۔ 25 جنوری 2021 ءَ کراچی ءِ بالی پٹ ءَ بگر دانکہ ڈی بلوچ کیچ ءَ بلوچ زھگ، زالبول ، پیر ءُ ورنا گوں پلاں بانک ءِ راہ چار بوتگ اَنت۔ بانک کریمہ ھما روچ ءَ کہ بلوچ جنز ءَ ھوار بوتگ ھما روچ ءَ بگر دانکہ روچ مروچی بلوچ جنز ءِ نہ اوشتوکیں کارست ءِ منگ بیت اَنت۔ بانکءَ چہ اولی روچ ءَ داں گڈی روچ ءَ گوں دل ءَ وتی گل ءِ کار جنز اِتگ اَنت۔ بانک روچ مروچی ھمک جھدکارے ءِ رنگ ءَ زندگ اِنت ءُ داں ابد زندگ بیت بانک ءَ آجوئی و نہ دیست بلے آجوئی بانک ءَ الم گند اِیت بانک امیت ءُ ھوسلہ اِنت زندگ اِنت ءُ زندگ بات۔
شھید لمہ کریمہ جھد ءِ چراگ
