نِبشتہ کار: کوھی بلوچ
دْروت اُستاد! من ھِچ گْوشت نہ کناں کہ تو چے ڈول ءَ ئے، ءُ کُجام اَزیتاں گوں دُچار ئے، نہ زاناں ترا نادْراھی ءَ چون کُتگ، بلے من زاناں تو نہ پْرشتگ ئے، وتی سر لگوریں دُژمن ءِ دیم ءَ جھل نہ کُتگ ءُ اَنچُوش کہ پیسر ءَ مُھکم بوتگ ئے انگت چو بلوچستان ءِ کوھانی داب ءَ مُھکم ئے ءُ پہ گُلامیں راج ءِ گُلامی ءَ جنگ ءَ ئے۔
اُستاد!
اے ساھت ءَ بے توار ءُ ملوریں شپے، گیمرتگیں کوہ اَنت، لھتیں بے بْرمشیں اِستال اَنت، دوازدَہ شپی ئیں ماھے ءُ من کوھے ءِ دامن ءَ گوں سِنگے ءَ تِکہ داتگ ءُ آزمان ءَ چارگ ءَ آں، یک ءُ دو ساھت ءَ پیسر مُرگ دیم پہ وتی کدوھاں جُنزان اِتاں، روچ ءِ ایر بُکگ ءَ پیسر جمبری شینکاں آزمان ڈولدار کُتگ اَت، کورانی آپ گوں ڈل ءُ ڈوکاں ھبر کنگ ءَ اِتاں، اے دمان ءَ منی چم گوں تئی اَکس ءَ اَنت کہ تئی ماھیں جنک مھلب ءِ دست ءَ اِنت ءُ زوراک ءِ دیم ءَ چو بولان ءِ کوہ مِکّ اِنت ءُ تئی آجوئی ءِ لوٹ ءَ کنگ ءَ اِنت۔
اُستاد!
من اگاں چو مُرگانی پَیم ءَ بال کنگ بہ زانتیں یا من ءَ بانزُل پِر بوت اِیں گُڑا من الم ترا چہ لگوریں دُژمن ءَ آجو کُتگ اَت ءُ تئی دیوان ءَ نِشتگ اِت آں، بلے ھُدا ءَ بنی آدم ءَ را بانزُل پِر نہ کُت۔ اگاں من ءَ ھُدا ءَ اے سابت ءَ مُرگے بہ کُتیں گُڑا من پہ بال اَتکاں ءُ ھما کوٹی ءَ کہ تو بندیگ اِت ئے ھما تھاریں کوٹی ءِ دَروازَگ پْروشتَگ اَت ءُ ترا آجو کُتگ اَت، وتی بانزُل ترا داتگ اِتاں ءُ پد ءَ تو اے کوہ ءُ کوھانی چارگ ءَ بہ اَتکین اِت ئے۔ چی ءَ کہ اے کوہ شُمئے ڈولیں رَھشونانی برورد ءَ مرچی ڈولدار اَنت، اے کوہ تئی ڈولیں رھشون ءَ پہ ھید سبزینتگ اَنت ءُ اے کوھانی زیبائی شُمئے چھرگ ءَ جن اَنت۔
مِھروانیں اُستاد!
من زاناں کہ اے نِمدی ترا سر نہ بیت، چی ءَ کہ تو یک انچیں زوراکے ءِ ئے دست ءَ بَندیگے کہ آ تئی گار ءُ بیگواھی ءَ مَنَّگ ءَ اُوں نہ اِنت گُڑا اے نِمدی ءَ ترا کُج ءَ سر کنت۔ بلے! بلوچ راج تئی ھمت ءُ داتگیں کُربانیاں بِھ نہ شموش ایت، تئی جُھد ءُ تئی داتگیں کُربانی مئے دلانی تہ ءَ یک زُژنائیں چِراگے کہ آئی ءِ زُژن مرچی سرجمیں بلوچستان ءَ گوں وتی رُژنائی ءَ رُژنا کنگ ءَ اِنت۔ تئی ھمے داتگیں کُربانی ءُ جُھد مارا گیش مُھکم کنت ءُ آجوئی ءِ جنگ پہ پند بُرگ ءَ ھمت ءُ جزبگ بکشائیت۔
رھدربریں اُستاد!
من زاناں کہ تو اے گْرانیں ساھتانی تہ ءَ گْوزگ ءَ ئے، پہ بلوچ راج ءَ اَزیت سگگ ءَ ئے، پہ گُلامیں راج ءَ زِندان ءِ تھاریں کوٹی ءَ نِشتگ ءُ جیڑگ ءَ ئے کہ باریں منی راج گوں چونیں ازیتاں گْوزگ ءَ اِنت یا منی راج چون اِنت، من پہ جزم گْوش آں کہ تئی توار، مول ءُ مراد ءَ ریاست بِھ ایرموش ءُ ھلاس کُت نہ کنت۔ تئی ھما دیستگیں واب کہ گُلامیں راج ءَ بوتگ، آئی ءَ زوراک بِھ گار کُت نہ کنت۔ چی ءَ کہ تئی ھیال ءُ لیکہ مئے میان ءَ زندگ اَنت، تئی داتگیں کُربانی بلوچ راج ءَ مُدام مُھکم ءُ تمرد کن اَنت ءُ دُژمن ءَ پہ تچگ ءَ لاچار کنت۔ گوں پاکیں ھاوُند ءَ دُوا اِنت کہ زوتاں چہ زوت آجو بہ بات ئے۔
اَچ سُرمگیں بلوچستان ءِ تْرشتیں کوہ ءُ تلاراں تئی کاروان ءِ سپاھی
کوھی بلوچ
