ڈیھ ءِ مریدیں میرل

سی ءُ سَیمی بھر:

نبشتہ کار: ھلیل بلوچ

دو ھزار چاردہ (2014) ءِ چاگردی رسانکدر ءِ تہ ءَ بدمزگی ءِ ھار ءَ پد بلوچ راج وتی جاگہ، بازیں راجی جھدکار ءُ سرمچنڈانی دِل ءِ تہ ءَ نااُمیتی ءَ روتگ جتگ اَت۔ میرل مُدام گْوشتگ اَت کہ ”لگور بوتگیں دْرائیں سنگت بے زانت ءُ سسّا نہ بوتگ اَنت، بلکیں وھد ءُ ھالاتانی تہ ءَ تپاوت کُرت اِش نہ کُرتگ ءُ نااُمیت بوتگ اَنت۔“

ھَو! میرل جان ءَ ھما موہ رس اِتگ اَت کہ آئی ءِ دل ءِ واھشت بوتگ، تِپاکی، ھَو تپاکی! پہ رُژنائیں باندات ءَ۔ پہ راجی تِپاکی ءِ ھاتر ءَ جُنز ءِ ھمراھانی تِپاک بوَگ الّم اَت۔ راجی پرزندانی یکجاہ بوَگ الّم اَت دانکہ رُژنائیں باندات ءِ اُمیت زندگ بہ مان اِیت، ءُ میرل جان پہ ھمے اُمیت ءِ زندگ دارگ ءَ وتی کِرد ءَ پیلو کنگ ءَ اَت۔

ما ءُ اُستاد مُرید زی پہ شورّ ءِ نیمگ ءَ درکپت اِیں، شش ساھت ءِ پند ءَ پد ما شورّ ءَ اسماھیل ءِ ٹِکانہ ءَ رس اِت اِیں بلے اُود ءَ ھِچّ نیست اَت۔ ھمے وڑ ءَ ما تیوگیں شَپ جتائیں جتائیں ٹِکانہ چاپہ جت اَنت، بلے ریاستی کُشندہ ٹولی ءَ وتی بُنجل ھالی کُرتگ اِت اَنت۔ شپ ما گْوازینت سُھب ءِ سر ءَ چہ دُور ءَ تیر ءُ تْراکانی توار گُوشاں کَپت، اُستاد مُرید ءَ من ءَ ءُ زوھیب ءَ کوہ ءِ ٹُلّ ءَ دیم دات کہ سنگتانی ھال ءَ بہ گِر اِت۔ ما شُت اِیں بُرز ءَ پِدائی بلال واکی ٹاکی ءَ لائن ءَ اَت، ھالے دات کہ ”ما گوربرات ءِ پُشت ءِ کوھاں کُشندہ ٹولی ءِ کارمند انگیر داتگ اَنت، جنگ چلگ (برجاہ) ءَ اِنت۔“

ما ھمود ءَ کوہ ءِ ٹُلّ ءِ سر ءَ نشت اِیں ءُ واکی ٹاکی سرچ ءِ سر ءَ جت چاراں کُشندہ ٹولی ءِ کارمند گوں وت ءَ گپّ ءَ اَنت کہ سکّ ناگیگ اَنت، اِنگو آنگو توار جَنَگ ءَ اَنت پہ کُمکّ ءِ واستا۔ ھمے وھد ءَ میرل جان ھم واکی ٹاکی ءَ لائن ءَ اتک ءُ گْوشگ ءَ لگ اِت “ھلو ھلو! شکری ھلو!”

من زُوت زُوت جواب دات “ھان سُلیمان ھال کن۔”

میرل ءَ گْوشت “لجے توک ءِ تہ ءَ راہ ءَ بند کن اِت، اے جِستگ اَنت بلکیں ھمانگو بیا اَنت۔”

ما ھَو کُت ءُ درکپت اِیں، لجّے توک ءِ دو سئے جاگہ ءَ ما سنگر گِپت ءُ ودار کُت، بلے ھِچ پہ ھِچ۔ تیوگیں روچ ھمد ءَ گْوست، مئے توشگ ھم ھلاس بوتگ اِت اَنت۔ شَپ ما پہ گُژن گْوازینت، سُھب ءِ سر ءَ مھلّہ ما درکپت اِیں پہ اوتاک ءِ نیمگ ءَ۔ میرل جان ءُ آدگہ سنگت ھم اوتاک ءَ اتکگ اِت اَنت۔

چاگِردی رسانکدر ءَ پروپیگنڈہ ءُ بھتاماں پَد اے اولی بَر اَت کہ بی ایل اے ءُ بی ایل ایپ ءِ اوتاکانی دْرستیں سنگت یکّیں پرزونگ ءِ سر ءَ نشتگ ءُ نان ورگ ءَ اِت اَنت۔ ھما وھد ءَ اے وت ماں وتی کسملیکی ءُ مانمیاتکی ءِ تہ ءَ ھواریں گَپّے اَت، بلے میرل جان ءَ گیگ ءُ گْوم کُرتگ اَت۔ ھما سنگت کہ ھَواری ءَ گَشت ءَ نیاتک اَنت، ھما سنگت گوں بی ایل اے ءِ سنگتاں یکّیں کاسگ ءِ تہ ءَ نان ورگ ءَ اِت اَنت۔

روان اِنت۔۔۔۔۔۔