نبشتہ کار: کوھی بلوچ
بلوچ زالبولانی کُربانی یک انچیں کِسّھے کہ ایشی ءِ تہ ءَ ھِمت، جزم ءُ بے مٹّیں جَزبگ ءِ اَکس گندگ بیت۔ بلوچ راج ءِ راجدپتر چہ جُھد، گھگیری ءُ وتی پجّار ءِ پھازگ ءِ کِسّھاں پُر اِنت ءُ اے جُھد ءِ تہ ءَ بلوچ زالبُولانی کرد نہ ایوک ءَ پُرارزشت اِنت، بلکیں کدی پِراموش کنگ نہ بیت۔ آ وتی لوگ، ھاندان ءُ چاگرد ءِ بُنھِشت بوتگ اَنت ءُ ھمے رنگ ءَ آجوئی ءِ جُھد ءِ تہ ءَ ھم پیشگام بوتگ اَنت ءُ وتی جان، واب ءُ آسراتیں زِند ءِ کُربان کنگ ءَ راج ءِ باندات ءِ رُژنا ءَ کنگ کُنٹگیں راہ ءَ روان ءُ جُنزان اَنت۔
بلوچ زالبُولاں ھر دور ءُ زمانگ ءَ وتی ھک ءُ سرڈگار ءِ پھازگ ءَ وتی توار چست کُتگ۔ زُلم ءُ زوراکی ءِ ھلاپ ءَ زھرشانی کنگ بہ بیت، بیگواھیں مردمانی ھاتِر ءَ دگّانی چار راھانی سر ءَ درکپگ بہ بیت یا پہ وتی زھگ ءُ کھول ءِ رکّینگ ءَ ھر نگیگیں جاوراں بھادری ءَ گوں جنگ کنگ بہ بیت، بلوچ زالبولاں وتی توان ءُ بھادری ھمک دیم ءَ پیشداشتگ اَنت۔ ایشانی داتگیں کُربانی ایوک ءَ لوگ ءَ نہ بوتگ، بلکیں سیاسی، چاگردی ءُ جنگ ءِ میدان ءَ ھم بوتگ اَنت۔
چوناھیا بلوچستان ءِ راجدپتر ءِ تہ ءَ بازیں جنین آدم اَنت کہ آیاں وتی سر نَدْر کُتگ یا وتی دوستیں مردمانی جتائی اُوپار کُتگ۔ لھتین ءَ وتی زھگ، برات ءُ لوگواجہ پہ جُھد ءَ ساڑی کُتگ اَنت ءُ لھتین وت ماں جنگ ءِ میدان ءَ اتکگ ءُ دُژمن ءِ دیم ءَ چو مُھریں دیوال ءَ مِک بوتگ ءُ گھگیری کُتگ۔ بلوچ زالبولاں وتی لوگ راجی جُنز ءِ مُھکمیں گَل جوڑ کُتگ اَنت، ھما جاہ ءَ کہ آیاں نہ ایوک ءَ وتی ھاندان درس دستگ اَنت، بلکیں آیوکیں پدریچ گوں وتی دود ءُ ربیدگ، زبان، راجدپتر ءُ راجی پجّار ءَ گوں ھمگرنچ کُتگ اَنت۔
مروچی ھم بلوچ زالبول پہ گار ءُ بیگواھیں مردمانی واستا وتی توار ءَ چِست کنگ ءَ اَنت، زھرشانیانی تہ ءَ بھر زور اَنت ءُ پہ وتی راجی پَجّار ءِ رکینگ ءَ جنگ ءَ اَنت۔ آ ایوک ءَ پہ وتی کھول ءَ یا پہ وتی زات ءَ جنگ ءَ نہ اَنت، بلکیں بلوچ راج ءِ آجوئی ءُ راجی پجّار ءَ جنگ ءَ گوں یک مُھکمیں توارے ءَ وتی کرد ءَ پیلو کنگ ءَ اَنت۔ ایشانی داتگیں کُربانی پہ چار لبز ءِ نِبشتہ کنگ ءَ ساڑاھگ نہ بیت، چی ءَ کہ آ وتی واھِشت، آسراتیں زِند ءُ وتی جان ءَ پہ راج ءُ راجی مول ءُ مراد ءَ کُربان کنگ ءَ اَنت۔
بلوچ زالبولانی اے جُھد بلوچ سرڈگار ءِ آجوئی، راجی پجّار ءَ زِندگ کنگ، وتی شھدیں زُبان ءِ زِندگ کنگ ءُ وتی مال ءُ مڈّیانی رکینگ اِنت۔ آیانی اے داتگیں کُربانی بے سوب نہ بنت، چی ءَ کہ آیانی دلیری ءُ جزم بلوچ راج ءِ باندات ءَ رُژنا کنگ اِنت، گوں گُلامی ءَ مِڑگ ءُ آجوئی ءِ پچگِرگ اِنت۔ اے زالبُول نہ ایوک ءَ بلوچستان ءِ شان ءُ توار اَنت، بلکیں پہ ھما راجاں دَرسگاہ اَنت کہ آ مرچی لوگ ءَ نِشتگ ءُ گوں گُلامی ءَ زِند گوازینتَگ ءَ اَنت یا تُرس ءُ بیمّ ءَ آیانی توار پچ گِپتگ ءُ گُنگ کُتگ اَنت۔
بلے! گُنگ ءُ بے توار بوَگی نہ اِنت، پرچا کہ اے کُنٹگیں چکاریں دگ پہ جُنزگ آسر بیت ناں کہ پہ نِندگ ءُ چارگ۔ پمیشکا مارا وتی باجن ءُ بامردانی رُپتگیں دگ ءَ جُنزگی ءُ چو ھمایانی داب ءَ پہ ھر وڑیں کُربانی ءِ دَیگ ءَ ساجو بوَگی اِنت، جزماں مئے بندیگیں سرڈگار زُوت آجو بیت ءُ اِیمنی چو وشبوھیں گلاب ءَ چاریں آتراپاں آتار بیت۔
