ڈاکٹر اللہ نزر بلوچ ءِ کلوہ

رجانک بانڑی بلوچ

 میان استمانی ءُ پاکستان ءِ نوک آبادکاری ءِ زوراکیانی آماچیں منی بلوچ راج شمئے جھد ءَ سلام اِنت۔ شھیداں سلام، پہ زرد ءِ توار ءَ اوشتاتگیناں سلام، ھما سیاسی کارکن کہ آ جھد ءَ ھوار بوتگ اَنت ءُ زور بیگواہ کنگ بوتگ اَنت، زندان ءَ بندیگیں انسانی ھکانی کارکناں سلام ءُ پہ بلوچ جھدکاراں شان ءُ شرپ۔

مرچی من وتی یک کلوھے دیگ ءُ تچک ءَ گوشگ لوٹ آں کہ جھان ءِ چونیں توانمندے، چونیں ھم راجے ءَ آجوئی دات نہ کنت ءُ نہ آئی ءَ منّ ایت، داں ھما وھد ءَ کہ آئی نپ بندوک مہ بنت۔

مرچی لکانی کچ ءَ بلوچ پہ وتی سرڈگار ءِ آجوئی ءُ دیمپانی ءَ شھید یا زور بیگواہ کنگ بوتگ اَنت۔ لکانی کچ ءَ درانڈیھ اِنت ءُ لکانی کچ ءَ بلوچستان ءَ بے گس اَنت۔ منی گوشگ ھمیش اِنت کہ مئے دژمن مکار اِنت، آئی ءَ تھنا گوں مئے سرڈگار ءَ مھر اِنت مئے گون ءَ نہ اِنت۔

چوش کہ برتانیہ ءَ یک زمانگے ءَ ھندوستانی ءُ زرباری اپریکی دو ٹانگیں جانور گوشتگ اَت ءُ ھواریں ھندوستان ءِ میان ءَ بنگال ءِ ڈکال ءِ میان ءَ وھدے کہ لکانی کچ ءَ مرتگ اَت گڑا برتانیہ ءِ مزن وزیر چرچل ءَ گوشتگ کہ ایشانی ھچ لوٹ نیست۔

من گوشگ لوٹ آں کہ جھان ءِ ھچ وڑیں توانمندے چونیں ھم راجے ءِ آجوئی، وتواکی یا واکداری ءِ پرواہ نہ اِنت دانکہ آ راج وت وتی سرڈگار ءِ سر ءَ گوں مھکمی ءَ مہ اوشت ایت۔

زوگریں توانمند ءُ مئے سرڈگار ءِ سر ءِ بلوچیں ٹیکدار درس بلوچ ءَ انسان نہ دو پادیں جانور سرپد بہ بنت۔ چی  ءَ کہ انسان گچینیں مھلوک گوشگ بیت۔

مرچی مئے باسمائیں ورنا شھید بوگ ءَ اَنت۔ ھما کہ گندگ ءَ کانود ءِ منوگر اَنت آ انسانی ھکانی گپ ءَ نہ کن اَنت ءُ بس  وتی نپاں چار اَنت۔ ھما توانمند ھمے ٹاپار ءَ جن اَنت کہ آئین ءُ کانود ءِ رد ءَ زور بیگواھیں مردماں آجو کناھیناں آ وت ایشاں زندانی کنگ ءَ اَنت۔بی وائی سی، بی این ایم ءُ بی ایس او ایشی مسال اَنت۔ مارا دگہ ھچ کانود نیست دانکہ ما وت وتی پادانی سر ءَ مہ اوشت ایں۔

چہ درساں پیش من یک ڈاکٹرے ءِ رد ءَ جنینانی بابت ءَ گوشگ لوٹ آں کہ مرد ءُ جنین، جان ءُ زانشت ءِ ھساب ءَ برابر اَنت۔ ھما گوھار ءُ جنک کہ آ پہ آجوئی ءُ انسانی ھکاں بازیں کچے ءَ دیمونی دیگ ءَ اَنت من آیاں سلام پیش کن آں۔

گوں وتی گوھار ءُ جنکاں منی گوشگ ءِ مول ھمیش اِنت کہ شمارا ھم توپک چست کنگ لوٹ ایت، چی ءَ کہ اے دژمن توپک ءِ توار ءَ ابید دگہ ھچ ءَ سرپد نہ بیت۔

مرچی مئے سرڈگار میان استمانی توانمندانی گون ءَ بھا بوگ ءَ اِنت۔ اے پہ پاکستان ءِ جنرل آسم منیر ءُ پارلیمنٹ ءَ نشتگیں بلوچستان سرکار ءَ رزوائی یے کہ بلوچستان ءِ مڈیاں گوں امریکہ ءَ سودا جنگ ءَ اَنت۔ درس بے توار اَنت ءُ کس بلوچستان ءِ کیس ءِ دیم ءَ آرگ ءِ ھمت ءَ نہ کنت۔ چہ میان استمانی توانمنداں ھچ اوست دارگ نہ بیت کہ آ تھنا وتی نپاں چار اَنت۔ وھدے کہ آیاں نپ گوں بلوچستان ءِ آجوئی ءَ ھمگرنچ بہ بنت گڑا آ مئے پلہ مرزی کن اَنت۔ دانکہ بلوچ چہ وتی زور ءَ وتی ھکانی لوٹ ءَ مہ کنت نہ کسے آئی ءَ آجوئی دات کنت ءُ نہ آئی ءَ آجوئی دار ایت۔

من وتی گوھار ءُ جنکاں پد ءَ گوش آں کہ شما بلوچ راج ءِ پنجاہ درسد اِنت۔ شمارا ھم توپک چست کنگی اِنت۔ کُرد ءِ مسلمانیں جنک ھم توپک چست کن اَنت، آدگہ مسلمانیں جنین پائٹر جیٹ ءِ پائلٹ بنت۔ یاد بہ کن اِت کہ پنچ سد سال ساری مئے بانڑی، گل بی بی ءُ آدگہ پجار نہ بوتگیں سروک جنگ ءِ پڑ ءَ مِڑ اِتگ اَنت۔

مرچی ھم ما گوں لس بلوچاں ھمے لوٹ ءَ کن ایں کہ چونیں ھم بلوچ جھدکارے، آ گوھارے، براسے، ناکویے، کماش یا ورنایے شمئے کِر ءَ کیت آئی کمک ءَ بہ کن اِت۔ مرچی مئے بازیں مردم مئے میان ءَ ساڑی نہ اَنت، آیانی تہ ءَ وانندگ، آلم ءُ یونیورسٹی گریجویشن کرتگیں ھم ھوار اَنت۔

مئے کچ ءُ ھساب ءِ رد ءَ زور بیگواھیں زندانی ئیں مردمانی کچ پنجاہ ھزار ءِ نزیک ءَ بیت۔ ما شھید بوتگینانی کچ ءَ ھساب کنگ ءَ ایں۔ من اے گپ ءَ گوشت نہ کن آں کہ جنگ ءَ مڑوکیں درسیں بلوچ جھدکار جھگیری ءَ کنگ ءَ اَنت۔ بلے یک سنگتے ءِ بستار  ءَ من ھمے گوشت کن آں کہ اے جنگ تھنا چہ سلاہ ءَ کٹگ نہ بیت آ گوں زانشت ءُ ٹیکنالوجی ءَ کٹگ بیت۔ اے ٹیکنالوجی ءِ زمانگ اِنت ایشی کا بہ گر اِت۔ من گوں درسیں بی ایل ایپ ءِ ایریا کمانڈ، کیمپ کمانڈ ءُ ٹیکٹیکل کامبیٹ ءِ یونٹ ءُ بی آر اے ایس ءِ ھمبلانی گون ءَ لوٹ کن آں کہ آ سرجم ءَ یک پوجے ءِ وڑ ءَ بہ اوشت اَنت۔

ھندوستان ءِ آجوئی تھنا چہ گاندھی ءِ پر ایمنی ءِ سوب ءَ گرگ نہ بوتگ۔ برتانیہ چہ دومی مزنیں جنگ ءَ تاوان ورگ ءَ پد چہ ھندوستان ءَ درکپتگ۔ مئے دژمن بے زانت، بے دود ءُ بے سما اِنت، آ چہ میان استمانی کانود ءَ نابلد اِنت ءُ گوں برتانیہ ءِ ایردستی ءَ ھمگرنچ اِنت۔ انچوش کہ آئی گوں انگریز ءَ کرتگ، ھما وڑ ءَ گوں بلوچ ءَ کنگ ءَ اِنت۔ من یک برے پد ءَ میان استمانی توانمند، بزاں پھازداریں کونسل ءِ کارکن ءُ وتی ھمبل ءُ درسیں راج  ءَ گوش آں کہ بلوچستان جنگ آماچ اِنت۔ اے سرڈگار ءَ کسی کار ءُ بار پھریز نہ اِنت، آ امریکہ بہ بیت یا برتانیہ۔

ھما مردم کہ وت ءَ بلوچانی دوزواہ گوش ایت آ یک نمونگے، ھمے گوش ایت کہ یک پروپیسرے گپتگ ءُ جست ءُ پرس کرتگ۔ کئے بزانت اے توار آئی جند ءِ توار اِنت یا دگرے۔ آ گوش ایت کہ ما ترا نوکری داتگ ءُ تئی لوگبانک ءَ نوکری داتگ ءُ پد ءَ ھم تئی سر ءَ راجدْروھی ءِ بھتام ھست۔

برتانیہ ءَ ھندوستانی ھم ریلوے ءُ آدگہ بھرگانی نوکری داتگ اَنت بلے آیان ءَ چمدار کرتگ۔

من درسیں جھان ءُ میان استمانی توانمنداں گوشگ لوٹ آں کہ ایسٹ تیمور ءِ آبادی 1.4 ملین بوتگ آئی آجوئی گپتگ۔ وھدے کہ آ ھلاس کنگ نہ بوتگ اَنت گڑا بلوچستان ھم ھلاس کنگ نہ بیت۔  تو لکانی کچ ءَ مردم کشت کن ئے بلے بلوچ ءِ پدریچ ءَ ھلاس کرت نہ کن  ئِے ءُ گھگیری برجاہ بیت۔ 

من پد ءَ وتی گوھاراں گوشگ لوٹ آں کہ توپک چست بہ کن اِت ءُ گوں وتی براتاں ھمگام بہ بہ اِت۔ من چہ وتی جنک ءُ گوھاراں ھمے لوٹ ءَ کن آں کہ نوک آبادکار توانمند ءُ میان استمانی ریاستی بگیری ءَ توپک چست بہ کن اِت دانکہ ما وتی آجوئی ءَ گپت بہ کن این ءُ زوراکیں ریاست ءِ سانکلاں پہ مدامی بہ پروش ایں۔

ھما گوھار کہ پنجاپ ءَ نشتگ اَنت ءُ ھما براس کہ اود ءَ کج ءَ اَنت، من گوں آیاں لوٹ آں کہ آجوئی جنگ ءَ ھوار بہ بنت۔ شمئے ھاک بلوچستان اِنت۔ ما وتی سرڈگار ءِ سوگند وارتگ۔ ھمے سرڈگار ءَ مئے پت ءُ پیرُکاں پنچ سد سال بادشاھی کرتگ ءُ گوں جھان ءِ سرکارانی بگیری ءَ مڑ اتگ ما ھمایانی پشپد اِیں۔ ما وتی راج، دود ءُ ربیدگ ءُ گوستانک ءِ سر ءَ پھر بند ایں۔

دگہ یک بلوچے ءِ درور ءَ دیگ لوٹ آں کہ نواب ھبیب اللہ نوشیروانی ءَ آجوئی ءِ جنگول نوار مینگل انگریز ءِ دست ءَ داتگ۔نورا مینگل ءَ گوشتگ کہ بے شرمیں سردار اے زمہ واری مرچی منی سر ءَ اِنت باندا شمئے درسانی سر ءَ بیت۔ نورا مینگل مرچی نیست بلے آئی وارس ھست اَنت۔

انچوش کہ نواب اکبر ھان 2004 ءَ گوشتگ اَت کہ من مِر آں بلے دژمن ءِ دیم ءَ سر جھل نہ باں۔ آئی مردم تھنا آئی کھول نہ اِنت بلکیں آ یک راجی جھدکارے بیتگ۔

من پد ءَ وتی جھدکاراں گوشگ لوٹ آں کہ پوج ءِ وڑ ءَ بہ اوشت اِت ءُ گوں بلوچ راج ءَ لوٹ کن آں کہ آیانی کمک ءَ بہ کن اِت۔ کسے ءِ گس ءَ توپک ھست یا آرت ھست آ کمک بہ کن اَنت۔ چی ءَ کہ گوستانک زوراک ءُ نزور ءَ دوئیناں پاشک کنت۔ ما درساں وتی زند گوازینتگ، مرچی مہ مراں یا باندا چی ءَ کہ جھدکار ءَ مرگ مدام ھمراہ اِنت۔

کج ءَ ھم چونیں بلوچے پہ وتی ڈیھ ءَ درانٖڈیھ اِنت گپ کنت۔ اگاں آ بانک کریمہ بہ بیت، ساجد بلوچ بہ بیت یا زبیر پاکستان ریاست آئی ءَ کش ایت۔ یا پد ءَ کماشیں استاد واھد کمبر کہ جھد ءِ سروک ءُ مئے استاد اِنت، آئی اُمر ھپتاد سال ءَ گیش اِنت مرچی ھم گوں نادراھی جاوراں ریاستی زنداناں بندیگ اِنت۔

ما ھمے کول ءَ کن ایں کہ آئی دیمونی زوال نہ بنت ءُ آئی جاہ ھورک نہ بیت۔ آ چہ بلوچ راج ءِ کمک ءُ ھم سنتی ءَ واتر کیت۔

من گوں وتی گوھار ءُ جنکاں بزاں گوں نوکیں پدریچ ءَ دلگوش ءَ گور کن آں کہ ھما کہ سکا وانندگ ءُ زانتکار اَنت، آ مھرنگ بہ بیت یا سمی کہ آ پر ایمنیں جھد کنگ ءَ اَنت۔ چہ ھمے ریاست ءِ کشندہ ٹولی ءِ پارست ءَ اُرش ءَ یک سنگتے ءِ سر ءَ اُرش ءَ آ مھزور بوتگ۔ بلے مرچی ھما ریاست چہ ھمے مھزوریں مردم ءَ ترسگ ءَ اِنت۔ چی ءَ کہ آئی پشت ءَ یک راجے اوشتاتگ۔

من وتی گوھاراں گوشگ لوٹ آں کہ توپک چست بہ کن ات ءُ وتی براتانی ھمراہ بہ بہ اِت ءُ پہ آجوئی ءَ جنگ بہ کن اِت۔ مئے پدریچ داں زندگی شمئے ھمراہ بیت ءُ داں مرگ ءَ شمئے ھمگام بیت۔

من میان استمانی توانمنداں یک برے پد ءَ کڈن کن آں  کہ بلوچستان یا مڈیانی نام ءَ مہ گر اِت اے شھیدانی سرڈگار اِنت۔ مئے دژمن یک روبایے آئی ءَ ھچ باندات نیست، آ چہ وتی دروگاں وتی باندات ءَ زندگ دارگ لوٹ ایت۔

یک روچے من ءَ سنگتے ءَ جست کرت کہ انسان یک سلاھے یا توپک، ایشی پشت ءِ نندوکیں مردم؟ من ھچ نہ گوشت۔ بلوچ وت یک سلاھے، آئی سسا، جان ءُ توکل ھم مزنیں سلاہ اَنت۔ مئے ڈاکٹر، انجینئر ءُ وکیل اے مہ جیڑ اَنت کہ آ تھنا بیوروکریٹ اَنت۔ راستی ھمیش اِنت کہ آ پنجاپ زورگر ءِ مشنیری ءِ بھر اَنت۔ آیاں چہ وتی کد ءِ نزانگ ءَ گوستانک کدی نہ بکش ایت۔ جھان بس زور ءِ شرپ ءَ کنت ءُ مارا ھما توانمندی گرگ لوٹ ایت۔

من پد ءَ گوش آں کہ پنجاپ ءَ پیسر ءَ فزیولوجیکل ءِ پارست ءَ پروش وارتگ ءُ مارا آ سرجم ءَ پروش دیگی اِنت۔ انشا اللہ آئی پوج پد کنز ایت ءُ آئی کارمند ھم روگ ءَ اَنت، آئی پروش نزیک اِنت۔ وھدے کہ آ مار اَنت کہ بلوچ راج وتی آجوئی ءَ گیت گڑا آ مئے پلہ مرزی  ءَ کن اَنت۔ 

آسم منیر ھمے ٹاپار ءَ جنت کہ پاکستان ءُ سھودی ارب اسلام ءِ نام ءِ سر ءَ برجاہ اَنت۔ اے یک تچکیں دروگے۔ گڑا آدگہ ارب ڈیھ، اوگانستان، ایران ءُ شست ءَ گیش اسلامی ڈیھانی واھند چے اَنت؟

تئی پاکستان ءَ دگہ اسلامی ھاسیت نیست۔ تو دروگ بند ئے، رستری کن ئے، میان استمانی کانودانی بگیری ءَ کن  ئِے ءُ زبان ءَ ور  ئِے۔ ما چہ نواب نوروز ھان ءَ دربرتگ  کہ آ چہ کوہ ءَ پہ کرآن ءِ نام ءَ دلجم بوتگ ءُ چہ ریاستی کارمند دودا ھان ءِ پارست ءَ ایر کپتگ ءُ رند ءَ شھید کنگ بوتگ۔

پمیشکا گوں میان استمانی توانمنداں لوٹ کن آں کہ گوں آئی ھمگام مہ بنت مرچی سرجمیں بلوچ راج پاد آتکگ۔ کسے گوش ایت کہ دو درسد ءُ کسے گوش ایت کہ سے درسد، بلے سے درسد مئے ھمراہ بہ بیت آ دو لک بنت ءُ اگاں سے درسد بہ بنت سے لک، یک کروڑے بنت۔

گڑا شما گوں اے سے لک باسکی سلاہ بندیں توانمند ءَ چوں مڑ اِت کن اِت؟ آ گوں سنگ، سلاہ ءُ ھرچی کہ دست ءَ بہ کپ ایت ارش کن اَنت۔ مرچی اے یک پرزے جوڑ بیت۔

من گوں اکوام متھدہ ءَ لوٹ کن آں کہ تو وتی ھستی ھلاس کرتگ۔ تو لیگ آپ نیشنز جوڑ بوگ ءَ  ئِے ءُ وتی واک ءَ کار بہ گر۔

من گوں آجوئی لوٹوکیں جھدکاراں لوٹ کن آں کہ شما یک پوجے جوڑ بہ بہ اِت۔ ما گوں یک انچیں دردے ءَ گوزگ ءَ ایں کہ مرگ مئے ھمراہ اِنت۔ اگاں بمب ارش ءِ دروشم ءَ بیت یا تیرے بہ بیت۔ کج ءَ کہ ھست اِت۔ سویڈن، کینڈا، لندن، بلوچستان یا دبئی ما ھچ جاہ ءَ پھریز نہ ایں۔ ما سرپد ایں کہ پاکستانی چیریں ادارہ انچو کابل نہ اِنت بلے آئی ءَ میان استمانی توانمندانی کمک گون اِنت۔ پمیشکا من وتی آبادی ءِ نیم بھر گوں بلوچ گوھار ءُ جنکاں ھمے لوٹ کن آں کہ آ یک سرجمیں پوجے ءِ وڑ ءَ بہ اوشت اَنت۔ شما شوربندی، جنگی ھیلکاری ءُ اسٹریجک بودناکی ءَ سرپد اِت۔ مرچی بلوچستان ءِ ارزشت گوں آئی لشکری، دیمپانی، مادن ءُ مڈیاں بندوک اِنت۔

مرچی من پشتون، سندھی، گلگت بلتستان ءُ پاکستان ءِ زورگپتیں کشمیریاں گوشگ لوٹ آں بیا اِت ءُ آجوئی جھد ءَ ھوار بہ بہ اِت۔ بلوچ راج گوں شما اوشتاتگ۔

من بلوچ راج، بلوچ آجوئی لوٹوک، زور بیگواھیں مردم، سیاسی بندیگ ءُ بلوچ گوھارانی دیمونیاں سلام کن آں۔ من شھید شاری بلوچ ءُ آدگہ بلوچ شھیدیں گوھاراں سلام کن آن ءُ شمارا درستاں جھد ءَ ھوار بوگ ءِ لوٹ ءَ کن آں کہ اے پیسلہ کنگ ءِ وھد اِنت۔

بلوچ راج زندگ بات، بلوچ آجوئی ءِ جھد زندگ بات ءُ ھدا بہ کنت بلوچستان پہ مدامی سرسبز ءُ وشھال بات۔