نبشتہ کار۔ رزوان بلوچ
مروچی رسانکدر ءِ دور اِنت ءُ من گُش آں کہ رسانکدر پہ بلوچاں یک جوانیں ٹیکی یے پرچاکہ مئے ماتی زبان بلوچی مارا وانگجاھاں وانینگ نہ بوگ ءَ اِنت ءُ رسانکدر ءِ سبب ءَ ما وتی زبان ءَ شریں وڑے ءَ ونت کُت ءُ دربرت کن اِیں ءُ پد ءَ ما بہ چار اِیں ھمے رسانکدر ءِ برورد ءَ دگہ راج کجا کجا سر اَنت ءُ چینچو دیم ءَ شُتگ اَنت ءُ ما شما انگت نِشتگ اِیں بس یکی دومی ءِ جھل جنَگ ءِ کوشست ءَ کنگ ءَ اِیں چو ھم بلوچ راج ءِ تہ ءَ باز جوانیں زبان دوستیں سنگت ھست کہ زبان ءِ وانینگ ءِ بارہ ءَ شریں وڑے ءَ کار کنگ ءَ اَنت ءُ مرچی ما بہ چار اِیں کہ چینچو وٹسپی دیوان ھست کہ بلوچی وانَگجاہ ءِ دروشم ءَ اَنت کہ اود ءَ سید ءِ سْیاھگ ءِ راست نبیسگ وانینَگ بوگ ءَ اِنت ءُ ھمے دیوانانی تہ ھرّوچ یک بنگپے اِیر کنگ بیت ءُ باید اِنت کہ باسک ھمے بنگپانی سر ءَ ھبر بہ کن اَنت ءُ جست ءُ پرس بہ کن اَنت دیوانانی تہ ءَ زاتی گپ ءُ دگہ گیشیں باوست مہ کن اَنت بس سیاھگ ءِ سر ءَ جھد بہ کن اَنت یکے دومی ءَ سرپدی بہ دے اَنت یک دومی ءِ اُوپار ءَ بہ کن اَنت ءُ پاگواجھانی تہ ءَ پرک ءُ درک میار اَنت پاگواجَہ ھرکسے بہ بیت باید اِنت باسک آئی ءِ اِزت ءَ اِیر بہ کن اَنت اگاں کسے ءَ لبزانکی جستے بیت بہ کنت یاکہ سیاھگ ءِ سر ءَ جستے بیت بہ کنت ئِے اگاں ھرچ باسکے ءَ لبزانکی جست ءُ پرس مہ بیت گُڑا آ باید اِنت ھاموش بہ بیت بس دیوان ءَ بہ نند اِیت ءُ بہ چار اِیت پرچاکہ چہ بے سریں گپ ءُ باوَستاں چہ ھاموش بوگ گِھتر اِنت اگاں کسے اِے دیوانانی تہ ءَ پہ ایمانداری بوان اِیت ءُ سیاھگ ءِ تِچکی ءَ در بہ بارت گُڑا باندا روچ اِے دگہ چینچو باسک وانینت کُت کنت ءُ ما شما باید اِنت وت ءَ راجی زبان ءِ سرمچار جوڑ بہ کن اِین ءُ راجی زبان ءِ ھزمت ءَ بہ کن اِیں، داں کہ باندا روچ وتی زبان ءَ یک شریں آپسرے ءَ سر بہ کن اِت ءُ اِے گپ ءَ مردم ءَ چینچو درد بیت کہ واٹسپ ءِ تہ ءَ دو بلوچ وت ماں وت گپ ءَ بیت اِے ھم اگاں پارسی یا اُردو یا انگریزی ءَ گپ ءَ نبیس اَنت اِے بژن ءِ گپ اِنت بلے چو من گُشت کناں کہ اِے گلامی ءُ اِیردستی ءِ داتگیں داد اَنت ما اگاں وتی زبان ءِ سر ءَ جھد مہ کن اِیں ھجبر چہ اِیردستی ءَ نہ رک اِیں داں کرنانی کرن انچوش دگہ راجانی گلام بہ اِیں
بلے من ءَ اُمیت اِنت کہ چہ منی گپ ءَ کسے دلگران نہ بیت اگاں کسے دلرنج بیت گُڑا من ءَ پھل بہ کنت ءُ من ءَ اُمیت اِنت کہ مئے راج اِے رسانکدری دربرجاھانی تہ ءَ شریں وڑے ءَ جھد کنت ءُ الّم وتی زبان ءَ پہ آپسرے ءَ سر کنت
شالا بلوچ راج زباندوست ءُ زمینندوست بات
ھر بلوچ وتی ماتی زبان ءِ ھزمتکار بات۔
