نبشتہ کار: ڈاکٹر سبیا بلوچ
رجانکار: کوھین بلوچ
گْوستگیں شش ماہ ءَ چہ پاکستانی واکداراں سیاسی ءُ انسانی ھکانی کارکنانی ھلاپ ءَ بے دروریں کمپینے بندات کتگ۔ اے ھبر ایش نہ اِنت کہ اے جھدکاراں چوشیں جرمے کتگ، بلکیں ایش اِنت کہ آیاں جرم ءِ پدّر کنگ ءِ جرات کتگ۔
ما درکانودی زوراکیں بیگواھی، بے اِیمنی، ترس ءُ بیم، لس مھلوک ءِ ھم پت کنگ ءِ ھاتر ءَ بے تواری ءِ ھلاپ ءَ گچینیں رنگے ءَ توار چست کتگ۔ ما اے گپ پدّر کُتگ کہ سانمندیں ھاندان انساپ ءِ شوھاز ءَ سالانی سال چوں زُلم ءُ زوراکیاں اُوپار کن اَنت، آجوئی ءِ درشان یک کْواپگیں گالبندے چوں جوڑ بوتگ، ءُ آمیدگِس، رسانکدر ءُ سرکار ءَ انساپ ءِ اِلم ءِ بُلند کنگ ءِ بدل ءَ زلم ءُ زوراکی ءِ کُمک ءَ راج ءَ را نااُمیت کتگ۔
مئے جُھد مدام پراِیمن بوتگ، بلے چہ ریاست ءِ کوھنیں پندلاں نہ اُوشت اِیت۔ مئے شش ھمکار ڈاکٹر مھرنگ بلوچ، بیبرگ بلوچ، شاہ جی بلوچ، بیبو بلوچ، گلزادی بلوچ ءُ امران بلوچ ءَ پنچ ماہ ءَ گیش اِنت کہ آ در کانودی بندی جاہ ءَ بند اَنت۔ نزر مری بلوچ ءُ نیشنل ڈیموکریٹک پارٹی ءِ پنچ کارکن چوکہ گَنی بلوچ ءَ ھوار دگہ درجناں مردم پہ زور بیگواہ کنگ بوتگ اَنت۔
اے میان ءَ لس مردمانی نگیگیں جاور ھم گیش بوگ ءَ اَنت۔ زورگِریں پوج روچ ء رھمانی لس مھلوک ءِ کُشگ ءُ آوار جنگ ءَ اَنت، ءُ ھانداناں اے دردناکیں ویل ءِ سر ءَ زھرشانی کنگ ءِ ھک ھم دیگ نہ بیت، بلکیں آ بے تواری ءَ رنج ءُ گم ءِ آماچ کنگ ءَ مجبور کنگ بیت۔
اے ھاموشی ءَ را نوں ھلاس بوگی اِنت۔ بلوچستان ءِ مھلوک ءُ ھما جھدکار کہ پہ انسانی ھکانی دیمپانی ءَ ھر چیز ءِ رِسک ءَ زور اَنت، شُمئے یکجھتی ءِ ودار ءَ اَنت۔ پہ آیاں وتی توار ءَ بُرز کن اِت۔ پہ انساپ ءَ وتی توار ءَ بُرز کن اِت۔
