تامر: سیمسَر
نبشتہ کار: جھانزیب بلوچ
بلوچی تامر ’’سمسر‘‘ یک جوانیں اِزمے کہ وتی مھکمیں سرپدی ءُ وشیں کسہ ءِ سَوب ءَ آئی ءَ دلگوش گپتگ۔ نورھسن کمال ءِ نبشتہ ءُ بلوچی زبان ءِ نامداریں تامر سازی، زھور پزل ءِ بُتکاری ءَ جوڑ بوتگیں اے تامر انوگیں زمانگ ءَ بلوچی سنیما ءِ تہ ءَ یک مستریں کردے ءِ بستار ءَ دیم ءَ کئیت۔ بلوچی زبان ءِ نامداریں اداکار ھزیز گالب ءِ مستریں کرد ءَ ھوار بوگ ءَ گوں اے تامر ءَ دلگوش ءُ سرپدی دوھیں یکجاہ کنگ بنت کہ اے تامر پہ چاروکاں یک ھاسیں تجربگے جوڑ کنت۔
ھما چیز کہ سیمسر ءَ چہ ایوک ءَ تامرے ءَ گیش کنت آ ایش اِنت کہ آ مرچیگیں بلوچ چاگرد ءِ زند ءِ بابت ءَ چے پیم گپ جنت۔ اے گپ ایوک ءَ مزہ یا ٹائم پاس ءِ بابت ءَ نہ اِنت، بلکیں بلوچ راج ءِ دیم ءَ اتکگیں نوکیں چاگردی جاوراں چہ یک ھاسیں سرپدی یے دیم ءَ کار اِیت۔ کسہ ءِ تہ ءَ دود ءُ ربیدگ ءُ پجّار ءِ سر ءَ اُوشتگ ءِ وھد ءَ گْواچنیں جھد، گْواچنیں مارشت ءُ مرچیگیں دنیا ءَ گوں ھمگرنچ بوگ ءِ چیلنجانی سھرا کنگ بوتگ۔ تامر چاروکاناں چاگرد، آئی ءِ کدر ءُ کیمت، آئی ءِ تہ ءَ بوتگیں بدلیانی بابت ءَ گھتری ءَ گوں جیڑگ ءِ موہ دنت۔
زھور پزل ءِ بُتکاری ستا ءِ لائک اِنت، پرچا کہ آ دو چیزاں سک شریں وڑے ءَ ھمسلون ءُ ھمسنگ کنت۔ کسہ ءِ جزباتی ءُ دودمانی نیمگ، ءُ ھما دلگوش کہ چاروکاں وتی تہ ءَ ھوار کنت۔ تامر کدی ناوش ءُ ناتاھیری یے مارشت ءَ نہ دنت، پرچا کہ کسہ ءِ گْوشگ ھموار، سادگ ءُ گوں گْواچن ءَ نزیک اِنت۔ نورھسن کمال ءِ نبشتانک اے کار ءَ سک مزنیں کردے پیلو کنت، پرچا کہ گپ ءُ تران ءُ ندارگ پہ سرپد بوگ ءَ آسان اَنت بلے پد ءَ ھم بزانت ءِ رد ءَ سک باز زوراک اَنت۔ ھر لیکہ ءِ مارشت، سما ءُ نوکیں چیلنجانی دیم ءِ دارگ ءِ ارزشت ءِ بابت ءَ لھتیں پیگام دنت۔ ھزیز گالب ءِ کارکردگی تامر ءِ یک مھکمیں نشانے۔ بلوچی سینما ءِ مزن نامیں ازمکارانی تہ ءَ یکے بوگ ءِ سَوب ءَ آ وتی کردار ءَ گوں جُھلیں جزبگ ءُ کدرتی اداکاری ءَ زندگی دنت۔ اسکرین ءِ سر ءَ آئی ءِ ھست بوگ ءَ چاروکاں کردار ءِ گوں بندوک بوگ ءِ مارشت بیت ءُ آ ھما مردمانی جھد ءُ کوشست، وشی ءُ اُمیتاں سوبمندیں رنگے ءَ سر کنت کہ آ نمائندگی کنت۔ وتی اِزم ءِ پارست ءَ آ بلوچ کمیونٹی ءِ توار جوڑ بیت۔
تامر سیمسر ھم وش اِنت، پرچا کہ ایشی ءِ تہ ءَ سرپدی گوں دلگوش ءَ ھوار اِنت۔ انچیں ساھت ھست کہ چاروک ءَ مسکرا کن اَنت، ھما ندارگ کہ آھاں جزباتی کن اَنت ءُ ھما جاور ھست اَنت کہ آھاں سنجیدگی ءَ گوں جیڑگ ءَ پرمائیت۔ اے ھمسنگی تامر ءَ ھر وڑیں چاروک ءِ واستا سرپد کنت۔ آ کہ وانگ لوٹ اَنت، آ کہ وش بوگ لوٹ اَنت، ءُ آ کہ بس سنیما ءَ دوست دار اَنت۔
سیمسر ایوک ءَ تامرے نہ اِنت، بلکیں چاگرد ءِ ھاتر ءَ یک ھاسیں پیگامے ھم۔ اے گپ ءَ پدر کنت کہ بلوچی سینما دیمروئی کنگ ءَ اِنت، ءُ اے گپ ءَ پدر کنت کہ اے توان ءَ دار اِیت کہ آ جیڑھاں پدّر بہ کنت، سرپدی پیداک بہ کنت، ءُ انگت وتی چاروکاں وشّی بہ دنت۔ اے گپ سابت کنت کہ تامر یکیں وھد ءَ مزہ ءُ بامرد دوئیں بوت کن اَنت۔ نورھسن کمال ءِ مھکمیں نبشتانک، زھور پزل ءِ نبشتہ کاری ءِ رھشونی ءُ ھزیز گالب ءِ جوانیں اداکاری ءِ سبب ءَ سیمسر بلوچی دود ءُ ربیدگ ءُ ازم ءِ یک سربلندیں سوبمندی یے ءِ بستار ءَ دْرپش اِیت۔
