کماش جِنّ ءِ ھمراہ اِنت

نبشتہ کار: اُبید اللہ نور

من سک کسان اِت آں، مئے  میتگ ءَ بَلُّکے ھست اَت کہ نامے بی بی مھناز اَت۔ سکیں مھروانیں بلُّکے اَت، من ھمُک شپ ءَ کہ شام کُت مُدام شُتاں بلُّک مھناز ءِ لوگ ءَ کہ بلُّک کِسّہ جنت من گوشدار آں۔ من بلُّک ءِ لوگ ءَ نِشتاں داں دُرستیں گونڈو آتک ءُ سر بوت اَنت، گڑا بلُّک مھناز ءَ کِسّہ بِندات کُت کہ ما دلوارگ مہ بہ اِیں۔ من دانکہ رُست ءُ مزن بوت آں، بلُّک مھناز ءِ کِسّہ ھلاس نہ بوت اَنت بلے بلُّک ءِ یک کِسّھے انگت منی دل ءَ نکش اِنت۔

یک شپے بلُّک ءَ جِنّ ءِ کِسّھے بِندات کُت من ءَ سَکّ تُرسگ ءَ اَت، بلے من پاد نیاتک آں، چی ءَ کہ من ءَ سَکّ وش بوگ ءَ اَت من گوشداران کُت۔ کِسہ چوش اَت کہ یک بازارے اَت ءُ بازار ءَ جِنّے ھست اَت، اے جِِنّ ءَ ھرروچ یک مردمے کُشت۔ بازیں وھدے گْوست گُڑا بازار ءِ مردم شُت اَنت بازار ءِ کماش ءِ کِرّ ءَ کہ اے جِنّ ءِ واستا یک راھے در بہ گیج اِت کہ اے جِنّ ءَ مارا چُکچین کنگ ءَ اِنت۔

گُڑا بازار ءِ کماش شُت مُلّا ءِ کِرّ ءَ کہ وتی بازار ءَ چہ اے اَزاب ءَ بہ رکّین اِیت، اگاں نہ آئی کوم یک یک ءَ کُشگ بیت۔ بلے مُلّا ھرچی کہ دم ءُ تائیت کُت جِنّ مُلّا ءِ گوم ءَ دارگ نہ بوت۔ گُڑا کماش لاچار بوت ءُ شُت دِگہ بلاھیں مُلّاھے ءِ کِرّ ءَ وتی گپ ءُ پریاتے کُت اَنت، بلے کماش پد ءَ بے سوب بیت۔ جِن چہ مُلا ءِ وس ءَ ڈن اِنت، گُڈّی ءَ کماش ءَ یک شپے  وتی کوم یکجاہ کُت ءُ جار جت کہ دِگے راہ نیست بیائے ما شُما اِد ءَ چہ لڈّین ءُ نوکیں بازارے آباد کن اِیں۔ گُڑا یک ورناھے ءَ جُست کُت واجہ ما اگاں رو اِیں دِگہ بازارے آباد کن اِیں، گُڑا تو دلجم ئے کہ جِنّ مارا یلہ کنت؟

کماش  ھیران بوت ءُ گْوشت ئے من دلجم نہ آں، بلکیں مارا یلہ بہ کنت۔ گُڑا ورنا ءَ گْوشت کماش زانگ نہ بیت بلکیں مارا یلہ مہ کنت، چہ بازار ءِ یل کنگ ءَ شرتر اِنت ما تِپاک بہ بہ اِیں ءُ جِنّ ءَ بِہ کُش اِیں۔ کماش ھیران بوت کہ ما جِنّ ءَ چون کُشت کن اِیں؟  ورنا ءَ گْوشت ما وَ چوناھیا مِرگ ءَ اِیں، گڑا دست ء ُ پاد ءِ جَن اِیں وتی جھد ءَ کن اِیں۔

من وت جِن ءَ کُشاں بلے تھنا جنگ کنگ نہ بیت، گُڑا کماش ءَ جُست کُت تو چون جِنّ ءَ کُش ئے؟  ورنا ءَ وتی شور ء ُ سلاہ دات اَنت کہ جِن ءَ ما اے رنگ ءَ کُشت کن اِیں، بلے انچوش کہ تو مئے ھمراہ بہ بہ ئے۔ کمّو دیر ءَ کس ءَ گپ نہ کُت پد ءَ یک ورناھے ءَ گْوشت من تیار آں، من اُوں کایاں گوں اے دوئیں پاد آتک اَنت ورنا ءَ گْوشت واجہ اگاں یکے کار ءَ بِندات بہ کنت دُرست تیار بنت۔ اے شُت اَنت جنگ اِش بِندات کُت، جِنّ کُشگ نہ بوت بلے جِنّ ءَ بازار یلہ کُت ءُ شُت۔ من مرچی زاناں اے منی بازار ءِ کِسّہ اِنت، بلے دِگری بس ایش اِنت کہ بازار ءِ کماش جِنّ ءِ ھمراہ اِنت ءُ چُکاں وران ءُ ورنا جنگ ءَ اَنت۔