نبشتہ کار: زُھرہ دشتی
گُوستگیں کرناں بلوچ زالبول ءَ ھِچ شرپ ءُ ارزِشت نہ بوتگ، بس چار کُنڈیں دیوالے ءِ تہ ءَ بندیگ بوتگ ءُ وتی زھگ ءُ لوگواجہ ءِ پاسپان ءُ سمبالگ ءِ زمہ واری پیلو کُتگ۔ زالبول ءِ واستا وانگ ءُ زانگ، ڈنّ ءُ دراں دِگہ کار کنگ، شائری ءُ نبشتہ کاری کنگ یک سکیں مزنیں تژنے بوتگ۔ گُلام ءُ نِزوریں مردُمانی کِر ءَ ءُ لھتے چاگِرد ءِ مردُم انگت ھم اے بے مانائیں کِرد ءَ پیلو کنگ ءَ اَنت، بلکیں مئے وتی چم دیستیں کش ءُ کِر ءُ بہ گندے مئے گِسانی تہ ءَ ھم لھتیں مردُم ءِ (mind) سسا پہ زالبول ءِ شوک ءُ زیبداریں کِرد ءَ یک بے مُلّیں چیزے پھم اِیت، بلے چہ کرناں بلوچ شیرزالاں وتی کِرد باز جُوانیں دابے ءَ پیلو کُتگ۔
انچو کِہ میر چاکر ءِ گْوھار بانُک بانڑی بوتگ، شیرزالیں گُل بی بی بوتگ، یاسمین وتی سینگ ءَ تیراں اوپار کنت ءُ نوکتریں کرن ءَ ماھیں بانُل کریمہ وت یک بے دروریں ماتے پہ بلوچ راج ءِ ھما پُسّگاں کہ سوشل میڈیا ءِ تہ ءَ نِند اَنت ءُ بلوچ زالبولاں زاہ ءُ بد کن اَنت۔
لُمہ ءَ وتی سرجمیں زِند نَدْر کُتگ پہ بلوچ راج ءِ زالبولاں، اَئی ءَ زوراکیں وھد ءِ بستگیں زالبول ءِ پادانی زمزیل سِستگ اَنت ءُ وتارا تژنانی دیمپانی کُتگ۔ ھمے وھد ءُ جپاھانی برورد ءَ بلوچ زالبول ءَ را یک مزنیں نام ءُ ارزشتے بکشاتگ، تھنا پہ زالبولانی ھکّ ءِ بابت ءَ ناں، بلکیں لُمہ ءَ وتی گُلامیں راج ءُ بزّگیں سرزمین ءِ واستا بے کساس جُھد کُتگ ءُ مرچی لُمہ ءِ جُھدانی برورد اِنت کہ ھزاراں بلوچ زالبول جنگ ءِ پِڑ ءَ وتی براتانی ھم کوپگ اَنت۔
انچو کہ گودی شارُل باروداں وتی جان ءُ سینگ ءَ بند اِیت ءُ پِدائی اُرش کنت، ھمے رنگ ءَ پدائی سُمیہ، ماھلو گوں وتی براتاں ھم کوپگ بیت ءُ جنگ ءَ بِنا کنت ءُ دِگے بازیں کچ ءَ زالبول ھوار اَنت۔ وانگ بیت یا جُھد ءُ جنگ بیت یا دلیری بیت یا شائری ءُ نبشتہ کاری بیت ءُ دِگے بازیں انچیں کِرداں زالبولاں دیمروئی کُتگ یک زمانگے بوتگ کہ جنگ ءِ وھد ءَ سنگراں چہ لھتیں لگور باجو بوتگ اَنت، گُڑا آیاں ھمے تژن جنگ بوتگ کِہ چوڑیک ءَ دست ءَ کن ءُ گُشان ءَ سر کن لوگ ءِ کُنڈ ءَ نِند تو زیبدارے، بلے مرچی آ چوڑیک بمب ءُ بارودانی دْروشم ءَ مٹ بوتگ اَنت۔
مرچی آ چوڑیک دست ءَ کنوکیں ھمُک شیرزال جنگ ءِ پِڑ ءَ نَدْر بوگ ءَ اِنت، مرچی ھما گُشان بلوچستان ءِ بیرک بیتگ ءُ مانپوشگ بیتگ۔ کُل بلوچ راج ءُ انوگیں کرن ءِ ورنا اگاں زالبول ءَ شرپ بکشات نہ کن اَنت، اَئی ءَ بد مہ گْوش اَنت۔ چی ءَ کِہ زالبول ءِ ننگ ءُ لجّ ءِ پھازگ ءُ رکینگ ءَ ھزاراں سالونکیں سر رپتگ، پمیشکا زالبول نِٚزور نہ اِنت ءُ مرچی بلوچ راج ءِ شیرزالانی کسّہ ءَ نکش اَنت۔ راجدپتر ءِ تاکانی تہ ءَ کہ آیاں وتی وتن ءِ پھازگ ءَ کھریں زمانگ ءِ شر ءُ ھرابیں تژن ءُ تیھار اُوپار کُتگ اَنت۔
