نبشتہ کار۔ ڈاکٹر لاشاری
من ءَ یات اِنت کہ 2014 ءَ سنگت نوک ھمے جنز ءِ تہ ءَ گامزن اَت ءُ آشوب زاھد جان ءِ رگ ءُ بنداں مھکم کنان اَت۔ اے ھمے وھد اَت کہ بی آر اے ءِ گَل ءِ سنگت یکشل ءَ برجاہ اَت، اے دمگانی تہ ءَ بازینے ھمے گل ءَ گوں بندوک اَت بلے وھد ءِ گامانی رپک ءَ اندر ءِ مارشت آئی ءَ ھمے سکین ءُ جزبگ ءَ دیگ ءَ اَت کہ اے مئے زمین اِنت۔ اے زمین چہ گلامی ءِ مُھر بندیں کڑیاں چہ آجو کنگی اِنت۔ سنگت زاھد یک نتُرسیں سنگتے اَت، آئی ءِ وھد ءِ سنگت ءُ ھمکاریں لھتیں سنگت ھُدامُرزی بوت، بزاں لگور بوت انت ءُ شنگ ءُ شانگ بوت اَنت۔ ھرکس ھمے سما کنگ ءَ اَت کہ زاھد ھم لگور بیت، بلے چوش نہ اَت۔
پرچا کہ زمین وتی پُسگ ءَ پہ شانے دلبند ءَ وتی تہ ءَ جاہ دنت، سنگت زاھد ءِ برات وھدے کہ بیگواہ کنگ بوت گُڑا ھمے ریاستی چاریگ ءُ دلاراں آئی ءِ کھول ءِ مردم بیھار دات انت کہ اگاں شما زاھد ءَ نیار اِت گُڑا ایشی ءِ برات یل کنگ نہ بیت، بلے زاھد ءَ وتی شھیدانی ریتکگیں ھون لگت نہ دات اَنت ءُ زمین ءَ گوں دگا نہ کُت۔
سنگت زاھد یک ایماندارے اَت، ھرچ جنگ ءُ سنگرانی سرپ ءِ اوشتاتگیں یک تمردیں باسکے اَت۔ چہ سنگت زاھد ءِ بیمّ ءَ دمگ ءِ ھما چاریگ ءُ کاسگ چٹ ھم لرزگ ءَ اِت اَنت کہ اے مارا نہ بکش ایت، زاھد ءِ تہ ءَ ھما بیم ھست اَت کہ زاھد یک جنگجوے اَت گوریلھے اَت، ھرچ تک ءُ پھناتاں سوھو اَت۔ سنگت زاھد 2014 ءَ ماں سیائجی ءِ پرگاں یلہ اَت سلاہ بندیں گل ءَ گوں ھمگرنچ اَت آئی ءِ ھمک کدم ءُ پادانی سپر اے گواھی ءَ دے اَنت کہ سنگت زاھد ءَ وتی سر دات ءُ زمین نہ دات۔
من ءَ یات اِنت کہ ھمے وھد ءَ لھتیں سنگت سیائجی ءَ روگ ءَ اِت اَنت ٹرینگ ءَ گُڑا ھمے سنگتانی تہ ءَ یکے زاھد اَت کہ جوش ءُ گنوک اَت پہ زمین ءَ۔ جھدکاریں ھمبل زمین زادگ ھجبر نہ مر اَنت ءُ گار ءُ بیگواہ نہ بنت، اے جنگ ءِ تہ ءَ سرانی دیگ ءُ کُربان بوگ آجوئی ءِ باندات اِنت، بلے درد بیت کہ سنگتے ءِ جوڑ کنگ ءُ مجگی ءُ پگری سسّا ءُ زھنی جزبگ آئی ءِ تہ ءَ جوڑینگ سک گْران اِنت۔ بلے اے جنگ ءِ تہ ءَ ھزاری کچ ءَ تاسُپیں سر ندریگ بوتگ اَنت پہ ھاتر ءَ ڈیھ ءُ وتی ننگ ءُ لجّ ءِ ھاتر ءَ۔ اے ھمے راجدپتر ءُ گوستانک اِنت کہ شھیداں نمیران کنت ءُ لگور ءُ چانوگ واراں لانت ءِ نام ءَ دنت۔
کسے کہ راجی کرد ءَ پیلو کنت ءُ جنز ءِ تہ ءَ وتی گرانھادیں ھوناں ریچ اِیت آ ھجبر نہ مر اِیت گار ءُ بیگواہ نہ بیت، بلکیں اے ھون کہ مرچی زمین ءِ سر ءَ کپگ ءَ اَنت اے ھون وتی پسو ءِ باندات ءَ یک بھارے کار اَنت ءُ تھاریں شپ ءَ چراگے کن اَنت۔ سنگت شھید زاھد مرچی نمیران اِنت، ھر دلانی تہ ءَ ھوار انت یکجاہ اِنت۔ راجدپتر سنگت زاھد ءَ ھجبر نہ شموش اِیت ءُ گارے نہ کنت، اے دیمونی باندات ءِ آجوئی اِنت۔
شالا بلوچ زندگ بات ءُ بلوچستان آجو بات
