نبشتہ کار: ھنیپ بلوچ
اے جنگ مئے ھستمان ءُ رژنائیں باندات ءِ جنگ اِنت، اے جنگ پہ آوکیں پدریچ ءَ اِیمن ءُ وشھالی ءِ مستاگے۔ مرچی راجی سرمچار ءُ جُھدکار پہ راجی زِندمان ءُ باندات ءَ جُھد ءُ جنگ کنگ ءَ اَنت، دانکہ بلوچ راج ماں اے جلگھیں گیدی ءِ دمکاں گار ءُ گمسار مہ بیت۔ ما یک راجے ءِ بستار ءَ ماں جھان ءَ زندگ بہ بہ اِیں۔ اے پہ بلوچ راج ءِ ھمک پُسگ ءَ ھژدری اِنت کہ آ اے جنگ ءَ ھرچ وڑ ءَ کہ آئی ءِ کُنِش اِنت ھوار بہ بیت ءُ وتی راجی کِرد ءَ پیلو بہ کنت۔ جنگ تباھی یے، بلے جھان ءِ کنڈ کنڈ ءَ کہ مروچی آجو ءُ ایمنیں ڈیھے گِندگ بیت آ ھمے گھگیری، جھد ءُ جنگ ءِ برورد اِنت کہ مرچی یک وژھالیں زندے گْوازینگ ءَ اَنت۔
ھندوستان ءِ بھر ءُ بانگ ءَ پیش 4 اگست 1947 ءِ روچ ءَ ھندوستان ءِ وائسراے لارڈ ماؤنٹ بیٹن گوں مھمد الی جناہ ءُ ھان کلات اھمد یار ھان ءِ ھمراھی ءَ نند اَنت ءُ بلوچستان ءِ آجوئی ءِ مسام ءِ سر ءَ گپ ءُ تران کن اَنت ءُ بلوچستان ءِ آجوئی ءِ کاگدانی سر ءَ دزرند جن اَنت ءُ 11 اگست 1947 ءِ روچ ءَ بلوچستان ءِ آجوئی ءِ روچ منگ بیت۔ ھمے مسام ءِ رد ءَ بلوچستاں اے دمگ ءَ آجو ءُ وتواجھیں ڈیھے ءِ دْروشم ءَ سھرا بیت، آئی ءِ آجوئی ءُ وتواجھی ءَ وتگڑیں پاکستانی ریاست ھم منّ اِیت۔ وھدے کہ اے جار چہ دھلی ءِ ریڈیو ءَ شِنگ ءُ تالان بیت گُڑا ھان اھمد یار ھان 15 اگست 1947 ءَ آدینگ ءِ نماز ءَ پد آجوئی ءِ جار ءَ پِرّینیت ءُ بلوچستان ءِ بیرک ءَ مِک کنت۔
11 اگست 1947 ءَ بلوچ سرڈگار چہ انگریز ءِ سدسالی زیردستی ءَ آجو بیت ءُ جتائیں پجّارے ءِ واھند بیت، پمیشکا اے روچ پہ بلوچ راج ءَ آجوئی ءِ روچ اِنت۔ اے روچ ءَ مئے پیر ءُ کماشاں مسام ءُ سوگند وارتگ کہ وشھالیں بلوچستانے جوڑ کنیں کہ درامدانی زیردستی ءَ آجو بیتگ، بلے اے آجوئی داں دیراں برجاہ نہ بیت ءُ زورگریں پاکستان 27 مارچ 1948 ءَ بلوچستان ءَ توپک ءِ زور ءَ گیپت، چہ ھما روچ ءَ بگر داں مرچی زورگریں پاکستانی لشکر ءِ زوراکی بلوچستان ءِ سر ءَ برجاہ اَنت ءُ بلوچ راج ھم چہ ھما روچ ءَ پہ وتی آجوئی ءَ جُھد کنگ ءَ اِنت۔ اے جُھد ءُ جنگ ءِ میان ءَ بلوچ راج ءَ ھزارانی کَچ ءَ دیمونی داتگ ءُ پہ سرڈگار ءِ موکگ ءُ آجو کنگ ءَ وتی گْرانبھائیں سر ندر کُرتگ ءُ کنگ ءَ اِنت، ھزارانی کَچ ءَ بلوچ پُسگ زورگریں پاکستانی لشکر ءِ آزارجاھاں بندیگ اَنت۔
زورگریں پاکستانی ریاست پہ بلوچ راج ءِ گار ءُ گمسار کنگ ءَ وتی گُڈی زور ءَ جَنگ ءَ اِنت ءُ دومی نیمگ ءَ بلوچ راج اِنت کہ پہ وتی راجی ھستمان ءُ سرڈگار ءِ آجوئی ءَ جُھد ءُ جنگ کنگ ءَ اِنت۔
زُورگِریں پاکستان مرچی بلوچ راج ءِ مال ءُ مڈّیاں لُٹ ءُ پُل کنگ ءُ لِیلام کنگ ءَ اِنت۔ اے مال ءُ مڈیاں ابید ھروچ بلوچ لج ءُ ننگ ءِ لپاشگ ءَ روچے میتگے ءَ لشکرکشی کنگ ءَ اِنت دانکہ بلوچ راج چہ وتی آجوئی ءِ جُھد ءَ دزکش بہ بیت۔بلے مرچی بلوچ راج ءِ باسمائیں پُسگ پہ وتی آجوئی ءَ تَگ ءُ تاچ کنگ ءُ گوں دژمن ءَ دیم پہ دیم اَنت۔ زانوگرانی گْوشگ اِنت کہ یک راجے کہ دیمونی دیگ بہ زانت آ راج ءَ جھان ءِ ھچ زوراک داں دیر ءَ ایردست کُرت نہ کنت ءُ بلوچ راج چہ جھان ءِ ھما گچینی راجاں شُمار بیت کہ بلوچ ءَ ھِچ زوراک ءِ دیم ءَ سرجھل نہ کُرتگ، بلکیں دیمونی داتگ ءُ وتی سرڈگار ءَ کَس پہ واجھی ءُ کماشی نندگ ءَ نیشتگ۔ ما اے گپ ءَ دلجم اِیں کہ داں بلوچستان ءِ آجوئی ءَ بلوچ راج وتی دیمونیانی دْرچ ءَ برجاہ دار ایت ءُ ھونواریں لشکر ءِ دیم پہ دیمی ءَ جنگ کنت ءُ وتی راجی ھستمان ءُ گلزمین ءَ رکین ایت ءُ دژمن ءَ چہ وتی آپریچاں در کنت۔
اے گپ ءَ ما دلجمی ءَ زان اِیں کہ پہ دژمن ءِ اَچ وتی ڈیھ ءُ آپریچاں گلینگ ءَ مارا وتی راجی توان مھکم کنگ ءُ دژمن پروش دیگی اِنت۔ اے نوں سرجمیں بلوچ راج ءِ زمہ واری اِنت کہ اے نازُرکیں وھد ءَ گوں جُھدکار ءُ سرمچارانی ھمراھداری ءَ در بہ کپ ایت ءُ دژمن ءَ چکپررش بہ کنت ءُ وتواجھیں ڈیھے ءِ آجوئی ءِ مُراداں بہ بیت۔
