نبشتہ کار: بابا جی آر بلوچ
وھدے زمین ءِ ھمک تک ءُ پھنات ءَ چمشانک دئیں گڑا مارا بلوچ ءِ جون ماں کپگ ءَ گندگ ءَ کاینت، آ توری البرز بہ بیت یا کوہ ء سلیمان، مکران بہ بیت یا زِرھند۔
زمین ءِ چوشیں ھالیگیں ٹِکّے دست نئیت کہ آ چہ ھون ءَ میچل نہ اِنت، بلے بلوچ پہ پھر گْوش اِیت کہ من سر دیاں سر داتگ ءُ پہ سر ءِ دیگ ءَ ھمک وھد ساڑی آں۔ بلوچ ھما راج اِنت کہ ھمل ء جیھند ءِ پیم ءَ گوں پرنگی لشکر ءَ جنگ دنت ءُ وتی سر ءَ ببا دنت۔
انچوش بلوچ ھان بہ بیت کہ آ ھم گوں انگریز ءِ لشکر ءَ جنگ دنت ءُ وتی ھیشی سر ءَ پہ بلوچ ءِ رکّینگ ءَ ندْر کنت۔ نواب نوروز ھان ءِ کسّواں بیاریں آ ھم ھمے لجوزیں لشکر ءِ دیم ءَ گوں اسپر ءُ زھم ءَ ماں کوہ ءَ سر کپ اِیت ءُ ھمے گْوانک ءَ جنت کہ بلوچستان بلوچ ءِ زمین اِنت ءُ ما پہ بلوچ ءِ رکّینگ ءَ کوھاں درکپتگ اِیں، آ دُژمنیں پاکستان ءَ انچوش لاچار کنت کہ پاکستان ءَ پہ ھیلہ چہ کوھاں ایر گیتک ءُ دزگیر ئِے کت ءُ تہ ھما وھد ءَ پاکستان ئِے نہ منّ اِت ءُ وتی ھون ئِے پہ گلزمین ماں پیرانسری ریتک اَنت ءُ وت ءَ ابد مان ئِے کت ءُ سنگت ءُ زھگاں پاھو ءِ ساد چک اِت ءُ شھیدی ءِ کدّہ اش نوش کت۔
مروچی اگاں گلزمین ءِ ٹپّانی تاجگ کنگ ءِ کسّھاں بیاریں گڑا بلوچ سرمچنڈ بلوچستان ءِ ھمک تک ءُ پھنات ءَ ساڑی اَنت، ءُ بلوچ ءَ دوھزار ءِ دْھک ءَ بہ گر تہ روچ ء مرچی پہ زمین ءِ رکّینگ ءَ ھزارانی ھساب ءَ وتی سر پہ زمین ءَ ندْر کرتگ اَنت۔ وھدے بلوچ ءِ جنگ ءِ پنچمی باریگ بندات بیت گڑا مامو سدو کہ بلوچستان ءِ کوھلو کاھان ءَ چہ مکران ءَ پند بُر ایت ءُ سیائجی ءَ گوں دُژمن ءَ جنگ دیان ءُ ھیشی سر ءَ پہ سرزمین ندْر کنت ءُ آ نمیران بیت۔
آئی ءَ پد کامریڈیں سنگت شھید یھیا جان، ابدین جان، نورالھک ءُ زبیر جان ءَ ماں دوھزار ءِ دْھک ءَ پہ زمین ءِ سھمبینگ ءَ ماں تربت ءَ وتی سر ءَ ندْر کن اَنت، ءُ شھیدانی دْرچے بندات بیت ءُ مروچی ما ھمے گند اِیں کہ مامو ءِ رندپد سنگتاں گون اِنت ءُ ڈیرہ بگٹی ءِ سنگت ماں دشت ءَ شھید بنت ءُ مکران ءِ ماں ڈیرہ بگٹی ءُ کاھان ءَ۔ بلوچ ءَ ھمک باریگ ءَ وتی جان پہ بلوچستان ءَ ندْر کرتگ ءُ مرچی ما ھمے سرپد بہ اِیں کہ بلوچ سرمچاراں ھچ وڑیں تپاوت نیشتگ ءُ وتی جان ءِ ندْر کنگ ءَ ھمک دمگ ءَ پہ بلوچ ڈیھ ءِ رکّینگ ءَ ساڑی اَنت۔ مروچی اے سما پش نہ کپتگ کہ تو کے ئے، بس اے جنگ بلوچ ئیگ اِنت ءُ بلوچ ھمک جاہ ءَ وتی سر ءَ پہ گلزمین ندْر کنت۔
