نبشتہ کار: کوھی بلوچ
گُلامیں راج ءَ لوٹ اِیت کہ مُدام زوراک ءِ دیم ءَ چو کوہ ءَ مِک بہ بیت وتی راج ءَ چہ زوراک ءِ زوراکی ءَ چہ بہ رکّین اِیت، چی ءَ کہ ھما راج ءُ راجدپدر مان اِیت کہ آئی ءَ گَھگیری کُتگ ءُ زوراک ایرموش کُتگ۔ گُنگ بوگ ءُ نِدارَگ چارگ تئی راج ءَ، تئی راجدپتر ءَ، تئی گْوست ءَ گار کنت ءُ ترا دائمی گُلام کنگ ءُ گُلامی راجانی نام ءُ نِشان ءَ گار کنت، گُلامی پہ گَھگیری ھلاس بیت پہ نِدارَگ چارگ ءَ اِنّا!
گُڑا ھمے تِپاکی ءُ گَھگیری اِنت کہ منی ءُ تئی راج ءَ رکّین اِیت، اگاں من ءُ تو زوراک ءِ زوراکی چار اِت ءُ وتارا گُنگ ءُ کَر، چم پچیں کور لیک اِت گُڑا اے گُلامی ھمے داب ءَ منی ءُ تئی سالونکیں بچ ءُ بانوریں جنکاں وران کنت ءُ مئے ھستمان ءُ پجّار ءَ گار کنت۔ گُڑا بْیا پہ ھواری اے زوراک ءَ چہ وتی ڈیھ ءَ در کنیں ءُ یک آسودگیں زِندمان ءِ ئے ساھگ ءِ زِندگ بئیں ءُ وتی راج ءُ راجدپتر ءَ پہ مُدامی زندگ کنیں، چی ءَ کہ راج ءُ راجدپتر بنی آدم ءِ زندگ کنوک اِنت۔ اگاں ترا راج ءُ راجدپتر نہ بوت، بِزاں تو ھما رِمیز (زُبیر) گِپتگیں کُنٹے کہ کس پہ تئی سوچگ ءُ ماندارگ ءَ اُوں ساڑی نہ اِنت۔
ما اگاں بہ گْوش اِیں کہ ریاست ءِ اے مرچی نوکیں پندل ءُ زوراکی اَنت گُڑا من ءَ ھما زمین وتیگ نہ کنت کہ من آئی ءِ دلبند ءَ ساہ کشگ ءَ اُوں، ریاست ءِ اے ژانگولیں جونانی سوگات پہ بلوچ راج ءَ دیر اِنت کہ برجاہ داشتگ، بلوچ ءَ بہ کُش ءُ آئی ءِ مال ءُ مڈّیانی لُٹ ءُ پُل ءَ بہ کن ءُ آئی ءَ وتی گُلام بہ کن، بلے ما اے ھبر ءَ دیر ءِ سرپد بہ اِیں کہ ما ھما ساھت ءَ توار چِست کن اِیں کہ من وت اَکسے بہ آں، یا ریاست ءِ تھاریں ءُ بیمناکیں کوٹیانی باھوٹ بہ آں، گُڑا وھد ھمیش اِنت کہ وتی توار ءُ وتی بزگ ءُ لگتمالیں راج ءِ توار بہ بئیں، راج ءُ راج ءِ درداں سرپد بہ بئیں، سکیانی ساھت ءَ آئی ءَ کوپگ بہ دئیں، آئی ءِ درد ءُ رنجاں بہ ماریں ءُ آئی ءَ چہ زوراک ءِ پنجگاں آجو بہ کنیں.
اگاں ما وت ءَ گُنگ لیک اِت گُڑا بانداتیگیں روچ منیگ ءُ تئیگ اِنت، چی ءَ کہ مئے دُژمن یکّین اِنت ءُ ما کُل بلوچ اِیں، گُڑا مرچی وھد ھست پہ وتی راج ءِ پھازگ ءَ، مرچی وھد ھست پہ لگوریں دُژمن ءِ تیرانی دیمپان بوگ ءَ، اگاں ناں گُڑا دُژمن ءِ زُلم ءُ زوراکی، راج ءِ بزّگی، گُلامی ءِ بکشاتگیں درد ءُ رنج ءُ ژانگولیں جون مُدام پہ بلوچ ءَ سوگات کنگ بنت، بلوچ ءِ چُکچینی برجاہ مان اِیت، ھمے ڈول ءَ منی ءُ تئی راج ءِ نام ءُ توار گار بیت ءُ زوراک ءِ زوراکی منی ءُ تئی راج ءَ گُلامی ءِ سانکلاں گوں بندوک کنت۔ مرچی اگاں ما دومی ءِ توار نہ بوت اِیں گُڑا منی ءُ تئی ھمے بے تواری مئے راج ءَ، راجدپتر ءَ، زمین ءَ، زُبان ءَ، دود ءُ رَبیدَگاں گار کنت۔
ریاست ءَ مرچی بلوچ پُسّگ کہ آوار جتگ ءُ زِندانی کُرتگ اَنت، یا بلوچ پُسّگانی ژانگولیں جوناں سوگات کنگ ءَ اِنت، بہ گِندے آ ھمے سرپد بیت کہ بلوچ ءِ زْرمبشت نِزور ءُ ایرموش بیت، یا من بلوچ ءِ چُکچینی ءَ کناں ءُ بلوچ سرڈگار ءَ وتی راج ءَ را سوگات کناں، گُڑا اے آئی ءِ بے سوبی ءِ اولی نِشانی اِنت۔ چی ءَ کہ بلوچ ھما راج اِنت کہ ھِچ وڑیں راجاں آئی ءَ را وتی گُلام جوڑ کُرت نہ کُتگ ءُ بلوچ راج ءَ وتی سر ھِچ وڑیں راجانی دیم ءَ جھل نہ کُتگ ءُ نہ کنت ھم۔ چی ءَ کہ بلوچ راج ءِ پُسّگ زوراک ءِ اے زوراکی ءَ شر سرپد اَنت کہ پہ گار ءُ بیگواہ کنگ ءَ یا تیر سُپتگیں جونانی سوگات کنگ ءَ من وتی سرڈگار ءَ بِھ یل نہ کناں ءُ وتی راج ءَ گُلامی ءَ دیست کُت نہ کناں، ءُ پہ گُلامیں راج ءَ گھگیری کنگ ھژدری اِنت۔ اگاں زوراک وتی زوراکی ءَ برجاہ دارگ لوٹ اِیت گُڑا آ اے ھبر ءَ الم وتی مجگ ءَ بہ نِندارینیت کہ راج پہ گار ءُ بیگواھی ءَ، پہ کُشت ءُ کُشار ءَ ھلاس نہ بنت، ھما راج گار بیت کہ آئی ءَ را گْوست نیست۔ بلوچ ءَ کہ اے جھد ءُ جنگ بندات کتگ پہ وتی رُوژنائیں باندات، جزماں بلوچ آجو بیت ءُ اے توامیں زوراکیانی مُزّ مئے ماتیں گُلزمین ءِ آجوئی بیت۔
