نبشتہ کار: اسد بلوچ
11 اگست بلوچستان ءِ آجوئی ءُ وشھالی ءِ روچ اِنت، ھمے روچ ءَ بلوچستان چہ انگریز ءَ آجوئی گیپت ءُ چہ انگریز ءِ سانکلاں آجو بیت۔
بہ گندے آجوئی لبز ءِ گْوشگ باز ارزان اِنت، بلے آجوئی گِرگ سک باز دیمونی دیگ لوٹ اِیت۔ ھرکس پہ دیمونی دیگ ءَ تیار نہ بیت، گُڑا دیمونی ءِ دیگ ارزان نہ اِنت۔ دیمونی ھما مردم دے اَنت کہ آ وتی راجدپتر ءَ پوہ اَنت، وتی دود ءُ ربیگ ءَ پوہ ءُ سرپد اَنت۔
اگاں راجے ءَ کہ وتی پچّار ءُ وتن ءِ جزبگ بہ بیت، آ زورگِر ءِ ھر چونیں تاکتے بہ بیت آ وتی وتن ءِ واستا جنگ کنت۔ آ وتی توامیں پدریچ ءُ زھگ زھگ ءِ کربان کنگ ءَ جاڑِیگ بیت، پرے واستا کہ وتی آیوکیں پدریچ ءَ یک وشھالیں زندے دات بہ کناں، گڑا آ پدریچ پہ جزم آسودگ ءُ وشھالیں زندے گْوازین اِیت۔
ھما مردم کہ پہ وتی وتن ءِ واستا ھون ریچ اَنت ءُ وتی زاتی ھر واھشتاں یل دے اَنت، پہ وتی گلزمین ءِ آجو کنگ ءَ ھر وڑیں دیمونی دے اَنت آ کدی گار نہ بنت، بلکیں آ مُدام راجدپتر ءِ تاکاں زندگ ءُ ابدمان بنت۔ پمیشکا اے راجدپتر ءُ گْوستانکی راستی یے کہ آ مردم ھر وڑیں کربانی ءِ دیگ ءَ چک ءُ پد نہ بنت، آ کدی ھم نہ مِر اَنت۔ آ مدام زندگ ءُ مردم گْوشگ نہ بنت، بلکیں آ لیکہ ءُ پگر گْوشگ بنت۔
ھمے وڑ ءَ بلوچ راج ءَ ھم وتی وتن ءِ واستا سک باز دیمونی داتگ، 1839 ءَ انگریز بلوچستان ءَ کبزہ کنت بلکیں آ ایوکءَ بلوچستان ءَ نہ، بلکیں دگہ بازیں مُلکاں ایردست کنت۔ بلوچستان ءِ ھکُمران میر مھراب ھان گوں وتی ھمبلاں انگریز ءِ دیم ءَ چوں کوہ ءَ مِک بیت۔ مھراب ھان وتی کمیں پوج ءَ گوں انگریز ءِ لشکر ءَ دیم پہ دیم بیت داں وتی گُڈی ساہ ءَ انگریز ءِ لشکر ءَ گوں جنگ کنت ءُ شھید بیت، بلے پدکِنز نہ بیت۔
بلے! بلوچ راج چہ ھما روچ ءَ انگریز ءِ کبزہ ءِ بگیری ءَ گِھگیری کرتگ ءُ ھر وڑیں کربانی داتگ، گلامی نہ منِّ اِتگ۔ بلوچ راج ءَ سکا باز گھگیری کرتگ ءُ انگریز ءَ کدی بلوچ راج ءِ دیم داشت نہ کُت، پد ءَ انگریز ءَ بلوچستان ٹُکُر، بھر ءُ بانگ کرتگ ءُ بلے بلوچ راج ءَ انگت وتی آجوئی ءِ ھاتر ءَ جنگ کُتگ۔
بازیں وھد ءَ پد 11 اگست 1947 ءَ بلوچ راج وتی آجوئی ءَ چہ انگریز ءَ گیپت، انگریزاں چہ وتی ماتیں زمین ءَ آجو کن اَنت۔ اے وھد ءَ کہ بلوچستان آجو بیت، بلوچستان ءِ ھمکُران میر اھمد یار ھان بیت۔
بلے بدواہ انگت وش نہ اَت کہ بلوچستان آجو ءُ بلوچ راج وتواجھیں ڈیھے ءِ واھُند بہ بیت، پد ءَ پاکستان ءِ وڑیں وتسریں مُلکے مسلمان ءِ نام ءَ جوڑ کنت کہ آ بلوچستان ءَ ارزانی ءَ دین ءُ مزھب نام ءِ سر ءَ کبزہ بہ کنت۔
دیر نہ بیت کہ 27 مارچ 1948 ءَ پاکستان بلوچستان ءَ کبزہ کنت دین ءُ مزھب ءَ نام ءَ دگہ بازیں پندل ساز اِیت ءُ بلوچستان ءَ ایردست کنت۔ بلے بلوچ راج انگت گلامی ءِ ھلاپ ءَ جنگ ءَ اِنت، ھزاراں سرانی دیمونی داتگ ءُ انگت بلوچ راج پہ وتی گُلزمین ءِ آجوئی ءِ ھاتر ءَ پہ دیمونی دیگ ءَ ساجو ءُ جاڑِیگ اِبت۔
شالا بلوچ راج یک وتواجھیں ڈیھے ءِ واھُند بہ بیت
سلامت بات اِت ءُ جھد ءَ بات اِت
