سیمی ءُ گُڈّی بھر:
نبشتہ کار: نودان بلوچ
ریکوڈک: ریکوڈک ماں چاگی ءِ ھند ءَ مڈّیانی گْئے شت کن ئے امبارے، بلے چاگی ءِ لس مھلوک ءُ بلئے چ راج چہ وتی زمین ءِ مڈّیاں بے بھر انت۔
چاگی ءِ ھند ریکوڈک ءَ ابید رود ءَ ھم دگہ بازیں گْواجنے ھست کہ ریکوڈک ءِ 12.3 ملین ٹن کاپر ءُ٬20.9 ملین ءِ سُھر ھست۔ چہ بلوچستان ءِ ھمے مڈّیاں پاکستان پہ وتی پائدگ ءِ ھاتر ءَ دگے مُلکانی کِرّ ءَ سودا جَنگ ءَ اِنت دانکہ لاھور، اسلام آباد ءُ پنجاب گیش دیمروئی بہ کن اَنت ءُ پدمنتگیں بلوچستان گیش بدھالی ءِ ارجاں بہ بیت۔
انچوش کہ ابدلکدوس بیزنجو ءِ مھتری ءِ وھد ءَ 2022 ءَ کینیڈا ءِ کمپنی بیرگولڈ ءِ کارمستِر مسٹر مارک برسٹو ءِ ھواری ءَ ریکوڈک ءِ مڈّیانی سودا جَنگ بوتگ، اے سودا ءِ پُژدر ءَ پیمان ءُ کؤلبند ھم کنگ بوتگ۔ ھمے کؤلبند ءِ سر ءَ بلوچستان ءِ نامگپتیں سروزیر کدوس ءُ آئی ٹولی ءَ دزنشان جتگ۔
اے درگت ءَ ابدلکدوس ءُ مسٹر مارک برسٹو گپّ ءُ تْران کہ کن اَنت، گُڑا ابدلکدوس وتی چرپیں دپار ءِ گیش کنگ ءِ واستا ءُ واجھانی وش کنگ ءِ ھاتِر ءَ آرمی چیپ ءِ منّت ءَ گیپت ءُ ریکوڈک ءِ سودا ءَ بلوچستان ءِ دیمروئی ءُ بلوچ کوم ءِ وشھالی کرار دنت ءُ گوش اِیت کہ ساری ءَ، بزاں 2011ءَ گوں بیرگولڈ ءَ ریکوڈک ءِ 10 سال ءِ بےسوبیں سودا ءِ سبب ءَ مارا ءُ مئے کوم ءَ باز تاوان بوتگ، اے بری مارا اُمیت اِنت کہ بلوچستان ءَ دیمروئی کئیت ءُ اِیدگہ مُلکاں گوں برابری کنت۔
14 اگست ءَ 2022 ءَ بلوچستان ءِ مھتر ابدلکودس ءُ گولڈ کارپوریشن ءِ کارمستر یا مالک ءِ گون ءَ گند ءُ نند ءَ پد ریکوڈک ءِ سر ءَ کار بندات کنگ ءِ جار ءَ جن اَنت۔ ریکوڈک ءِ سودا اے واستا گوں کینیڈا ءِ کمپنی بیرگولڈ ءَ دوبر کنگ بیت کہ اولی رند ءَ 2011 ءَ ریکوڈک ءُ کاپر ءُ گولڈ مائنز پراجیکٹس ھوار کن بوتگ اِت اَنت، بلے پاکستان ءَ ایشانی مائئنگ، ماھینو ءِ دیگ ءَ رازی نہ بوتگ ات ءُ انکار کُتگ اَت۔ گُڑا ھمے کمپنی ءِ نیمگ ءَ چہ اے جیڑہ میان اُستمانی آمیدگس ءَ بُرگ بوتگ اَت،گُڑا آمیدگس ءَ ھمے کیس ءِ پُژدر ءَ پاکستان بے سوب بیت۔ گُڑا انٹرنیشنل کورٹ آپ آربیٹریشن پاکستان ءَ کساس 6.4 ارب ڈالر میار باری جنت ءُ ھمے وڑ ءَ لند کورٹ آپ آربیٹریشن ھم پاکستان ءِ ھلاپ ءَ 4.5 ارب ڈالر ءِ میار بار بزاں جرمانہ کنت۔
زانوگرانی گوشگ اِنت اگاں پاکستان دومی بَر ءَ اِے کمپنی ءِ گون ءَ ریکوڈک ءِ سودا ءَ رزامند مہ بوتیں گُڑا پاکستان ءَ 11 ارب ڈالر جرمانہ پُر کنگی اَت، اگاں ایشی ءِ پُر کت مہ کُتین اَنت گُڑا پاکستان دگہ ملکے ءَ دست ءَ کتگ اَت۔ آ دگے ھما ملک بیتگ کہ چہ آئی ءِ کِر ءَ پاکستان ءَ گیش وام زُرتگ بوتگ۔ چہ ایشی ءَ پیسر امران ھان بازیں چست ءُ ایرے کُت ءُ بلوچستان ءِ مڈّیانی سودا جتگ داں پاکستان چرے جیڑہ در بئیت۔
پاکستان ءَ پہ وتی سیت ءُ نپّانی واستا چین ءَ ھوار بلوچستان ءِ بازیں مڈی ءِ سودا جتگ۔ مرچی اگاں بلوچستان دگنیا ءِ نکشہ ءِ سر ءَ یک آزات مُلکے ءِ دْروشمے ءَ بہ بوتیں دگے دگنیا سیر ءُ ازگار تِرّیں مُلکانی تہ ءَ شُمار اَت ءُ بلوچ مھلوک ازگاریں زندے گوازینگ ءَ اَت۔ بلے بژن کہ بلوچ ءِ پُر گنجین سرزمین پاکستان ءَ ایردست کُتگ ءُ آئی ءِ پرزند مروچی نیزگاری ءُ شُدّ لاپیں زندے ءِ گوازینگ ءَ لاچار اَنت۔
ھلاس۔۔۔
