نبشتہ کار: مھرُل مھر
دْروت ءُ دْرھبات!
راج ءِ رھشونیں ورنایاں امیت کناں کہ ھر کج ءَ اِت وش ءُ وشھال ءُ مھکم اِت، گوں ھاوند ءَ دُوا اِنت کہ دائم وشھال بات اِت۔ شُمئے ھرچ کدم پہ شما سوبینی ءِ چیدگ بات ءُ شالا گرمیں گواتے شُمئے دیم ءَ مہ لگّات۔
ھستی ئیں راھبراں!
مرچی دل ءَ گْوشت کہ پہ شما نمدی یے نبشتہ بہ کن، اے گپ ءَ من زاناں کہ گوں من ھچ چوشیں گال نیست کہ شُمئے وڑیں جنگجوانی ستا ءَ بہ کناں یا کہ شمارا شُمئے جھد ءُ مھکمی ءِ مراد باتی ءَ بہ دے آں، بلے پہ شما چیزے الم گوں وتی نزوریں گالاں نبیس آں۔
مھکمیں ورنایاں!
اے گپ ءَ ما ءُ شما درست سرپد اِیں کہ دژمن ءَ ھپتاد سال اِنت کہ مئے زمین وتی لگتمال کتگ ءُ بیست سال اِنت کہ مئے راج ءِ سر ءَ زورگِری کنگ ءَ اِنت۔ دژمن وتی تاکت ءَ کسانیں زھگ، ماسومیں جنین آدم ءُ پیریں کماشانی سر ءَ چکاسّگ ءَ اِنت۔ وھد ءِ ھمراھی ءَ دژمن سک زورگِر بوتگ، بلے ھردیں کہ ما زیک ءُ مرچیگیں گپ ءَ بہ کن اِیں گڑا دژمن ءِ نزوری ءُ بے سوبی ءِ درشان کنگ ءَ منی گور ءَ ھچ گال نیست کہ بہ گْوش آں۔
نتُرسیں پُلّاں!
شما دژمن انچوش نزور کتگ کہ آ کوچگ ءُ جنگل ناں بلکیں شھرانی تہ ءَ ھم بے واب اِنت، ھردیں کہ آ مگسکے ءِ بانزُلانی توار ءَ اِش کنت چہ ترس ءَ وتی کوٹی ءَ در اتک نہ کنت کہ بہ گندے ھمے شیریں سرمچار اَنت پہ منی جَنَگ ءَ اتکگ اَنت۔ من ھردیں کہ اے دژمن ءَ روڑ ءُ دگانی سر ءَ گند آں گڑا کندگ ھم کئیت ءُ اے لگوریں دژمن ءِ سر ءَ بزگ ھم کنت کہ آ روڈانی سر ءَ گردگ ءَ اِنت، بلے آئی دل وتی جاگہ ءَ پاد ھم ھمراہ نہ اَنت۔آ یکوئی ھمے گُمان ءِ تہ ءَ اِنت کہ کدی تیرے آس بہ وارت ءُ منی سینگ ءَ بہ لگ اِیت۔
آجوئی ءِ سوگاتاں!
من ھردیں کہ شُمئے بابت ءَ جیڑاں گڑا دل دْریکگے جنت ءُ چم ارسیگ بنت کہ شُمئے وڑیں ورنا دگہ راجانی تہ ءَ وتی آمید گس ءَ نشتگ اَنت، وتی لوگ ءَ ھما اے سی کہ شرتر اِنت ھمائی ءِ چیر ءَ نشتگ اَنت، ھما ورگ کہ وشتر اِنت دیم ءَ اِنت اِش، ھما آسراتی کہ شرتر اَنت گوں ھمایاں زند گوازینگ ءَ اَنت، بلے شما کھریں زمستان ءُ نہ سگوکیں گرماگ ءِ سر ءَ پہ تُن ءُ شُد پہ بزگی ءُ لاچاری ، پہ دْرانڈیھی زند گوازینگ ءَ اِت پہ راج ءَ چنچو ازاب اِت۔ بلے پد ءَ دل ھمے گپ ءَ سک وش بیت کہ منی راج ءِ تہ ءَ کہ چوشیں جنگجو ءُ ننگ پھاز ھست بہ گندے دگہ راجانی تہ ءَ مہ بیت۔ ھرکس ءَ پہ وت زندگی یے گچین کتگ ءُ پہ وت یک مکسدے جوڑ کتگ، بلے شمئے مکسد بس دو اَنت۔ آجوئی یا نمیرانی ءُ شھیدی۔ برے برے من ءَ وتی بلوچ بوگ ءِ سر ءَ ناز بیت کہ من بلوچے آن ءُ شُمئے وڑیں براتانی گْوھار آں۔ چہ شُما دلیری ءُ شیرزالی ءِ درونت رس اِیت، بلے باجو بوگ ءِ ھچ ھیال مجگ ءَ نئیت۔
یاگی ئیں بیلاں!
منی وڑیں نا بزانت ھرچ وڑ شمئے ستا ءَ بہ کنت کم اِنت، پرچا کہ من یک بند ھیالیں مردمے آں۔ بلے گُڈّسر ءَ بس ھمے گْوشگ لوٹاں کہ ھدا شُمئے پُشت ءُ پناہ بات، شالا ھچ وڑیں گمانی آماچ مہ بات اِت۔ شُمئے آجوئی ءِ لوٹ زوت سرجم بات ءُ پہ راج ءَ شوکیں آجوئی ءِ سوگات بات اِت، شُمئے تنگوئیں سر سلامت بات اَنت۔ یک رُژنائیں بانداتے ءِ واھُند بات اِت۔
