نبشتہ کار: جھانزیب بلوچ
دْروات شینُل!
چہ دْروت ءَ پد من نہ زاناں کہ چہ کُج ءَ بندات بہ کن آں، بلے منی دل بس یک راستی یے زانت کہ من ءَ گوں تو مھر اِنت۔ اے گال کسان گندگ بنت، بس لھتیں آب یکجاہ کنگ بہ بنت، بلے منی جند ءِ سرجمیں وزن ءَ زرت کن اَنت۔ منی شپاں، منی واباں، منی ترساں ءُ ھما درستیں بے تواری ءَ کہ من بازیں وھدے ءَ وتی اندر ءَ داشتگ ءُ سر ءَ زُرتگ اَنت۔
شینُل! اے مھر ءِ بندات چہ یک پیشبندی یے ءَ نہ بوتگ، اے انچوش بوت کہ سُھب ءِ رُژنائی یک تھاریں کوٹی یے ءَ پُتِر اِیت۔ نرم نرم ءَ، کم کم ءَ ءُ یکیں وھد ءَ۔ من نہ زانتگ اَت کہ کسے ءِ نام ءِ توار منی بے تاھیریں دل ءَ تاھیر ءُ ایمنی یے آرگ ءَ اِنت، داں من تئی نام ءِ توار ءَ زمزمہ کُت۔ من نہ زانتگ اَت کہ یک مردمے ءِ ھست بوگ یاتانی تہ ءَ ھم ، منی بے سبب ءَ مسکرا کنگ ءِ سبب بوت کنت۔
من ترا ھرجاہ گنداں نہ کہ مدام بدن ءِ تہ ءَ، بلکیں مارشت ءِ تہ ءَ۔ ھما ھَور ءِ تہ ءَ کہ منی دیم ءَ تْرمپ کپ اَنت، ھما استالانی تہ ءَ کہ بے تواری ءَ رژناہ بنت، ھما ساز ءُ زیمل ءِ تہ ءَ کہ من تھنا رھادگ باں ءُ ھما ھر گال ءِ تہ ءَ کہ من نبشتہ کن آں۔ ھر گال کہ من ھالی ءَ گپ جناں انچوش سما بیت کہ آ تئی گور ءَ سر بوگ لوٹ اِیت۔ منی مجگ ءِ ھر جیڑہ وتی راہ ءَ پد ءَ تئی نیمگ ءَ گند اِیت۔
من ترا دوست داراں نہ کہ تو کامل ئے، بلکیں تئی جان ءَ منی جند ءَ انچیں وڑے ءَ رَتکگ کہ دگہ کس ءَ نہ کتگ۔ تو من ءَ وتی سر ءَ زورگ ءِ جھد نہ کتگ۔ تو بس ھست ات ئے ءُ من ءَ تئی ھست بوگ ءَ تاھیر رست۔ اے تئی جادو اِنت شینُل، تو زانت ھم نہ کن ئے کہ تئی دل چنچو زیبا اِنت۔ تو زانت ھم نہ کن ئے کہ تئی بے تواری من ءَ چہ سد توار ءَ گیشتر چوں گپ جنت۔
برے برے من جیڑاں کہ تو ھمے وڑ ءَ مار ئے؟
تو کدی ماہ ءَ چار ئے ءُ منی بابت ءَ جیڑ ئے؟
اگاں کسے منی نام ءَ بہ گْوش اِیت گڑا تو مسکرا کن ئے؟
تو ھم اے مھر ءَ چو ساپیں رازے ءَ وتی دل ءَ برگ ءَ ئے؟
اگاں تو نہ کن ئے ھم ھچ نہ اِنت۔ منی مھر چہ تو ھچ لوٹ نہ کنت۔ اے ترا دام ءَ بندگ ءُ بدل کنگ نہ لوٹ اِیت۔ من بس لوٹاں کہ تو وش بہ بہ ئے، اگاں چہ من ءَ دور ھم بہ بیت۔ من بس ترا زندگ بوگ، وتی وابانی پدگیری ءَ گندگ لوٹ آں۔ اے پہ من بس بیت، پرچا کہ ترا دوست دارگ زندان نہ اِنت، آجوئی اِنت۔ اے ھما جاہ اِنت کہ منی دل ءَ کرار ءُ ایمنی ءِ مارشت بیت۔
شینُل من ترا بے تواری ءَ دوست بوتگاں، دوری ءَ، انتزار ءَ؟ من ترا شَیرانی تہ ءَ دوست داشتگ کہ من ھچبر شیئر نہ کتگ۔ من ترا ھما نِمدیانی تہ ءَ دوست داشتگ کہ من ھچبر نہ دیم داتگ اَنت۔ من ترا واباں دوست داشتگ کہ ما ھما جاہ ءَ دیستگ ءُ ھچبر وش آتک نہ کتگ۔ من ترا گوں انچیں دردے ءَ دوست داشتگ کہ درد نہ کنت، بلے وانین اِیت۔
ھما وھد بوتگ کہ من ترا شموشگ ءِ جھد کتگ۔ من وت ءَ را گْوشت کہ دیم ءَ بہ رواں۔ من کوشست کت تئی نام ءَ چہ دل ءَ شموشاں، بلے ھر وھد ءَ کہ من چم بند کت اَنت تو انگت ھما جاہ ءَ اِت ئے۔ انگت ھما یکے، تو منی زند ءِ بابے نہ، تو وت کسہ ئے۔
تو منی ھالیگیں روچاناں مانا دات۔ تو منی بے تواریں لنٹاں گال دات۔ تو دل ءَ اُمیت دات کہ یک رندے باور کتگ اَت کہ پد ءَ گوں مھر ءَ ھچبر نہ ٹپّ اِیت۔ تو من ءَ انچو گھتریں، انچو راستیں چیزے ءِ مارشت دات، ءُ ایشی ءِ ھاتر ءَ من مدام منت وار باں۔
شینُل بوت کنت کہ اے نِمدی ترا ھچبر سر مہ بیت۔ بوت کنت کہ تو اے گالاں ھچبر نہ وان ئے، بلے من ءَ آ نبشتہ کنگی اِت اِنت۔ من ءَ ترا گْوشگی اَت۔ پرچا کہ لھتیں مارِشت سک گران اِنت کہ آ یکے ءَ برگ ءَ اِنت۔ ءُ اگاں تو پسّو مہ دئے ئے ھم، اگاں تو ھمے وڑ ءَ مہ مار ئے ھم، اے منی مارشت ءَ بدل نہ کنت۔ منی مھر پہ تو جُستے نہ اِنت پسو اِنت۔ اے یک راستی یے۔ ءُ اگاں دنیا مارا کدی جتا بہ کنت، اگاں وھد یا کسمت ترا دور بہ بارت، من انگت ترا چو دُوا ءَ وتی دل ءَ اَزبر کن آں۔ من انگت استالاں چاراں ءُ مسکرا کناں، زاناں کہ تو یک وھدے منی دنیا ءَ بوتگ ئے۔ من وش بھتے بوتگ آں کہ من تئی وڑیں مردمے ءَ دوست بوتگ آں.
من کامل نہ آں شینُل! بلے اے مھر کہ من پہ تو زرتگ منی ایماندار تریں بھر اِنت۔ اگاں ترا کدی یک انچیں دلے ءِ زلورت اِنت کہ ایوک ءَ پہ تو ٹپّ اِیت، یک انچیں جانے کہ تئی سر ءَ باور کنت ءُ یک انچیں مردمے کہ بس تئی مسکرا ءِ گندگ ءِ ھاتر ءَ ھرچ راہ ءَ رھادگ بہ بیت، من ءَ یات بہ کن۔
منی ھستی ءِ تہ ءَ ھستیں مھر ءِ ھمراھی ءَ۔
تئی وتی جھانزیب
