نبشتہ کار: ڈاکٹر سنگُرزئی
یک شپے ما نشتگ اِت اِیں کہ ھالے شِنگ بوت یک زالبولے آوار جَنگ ءُ بیگواہ کنگ بوتگ، آئی نام ماجبین اِنت۔ بلے ماجبین ءِ برات چہ آئی ءَ چار روچ پیسر آوار جَنگ ءُ بیگواہ کنگ بوتگ، گُڑا ما روانکے کَش اِت۔ آیانی آجوئی ءِ ھاتر ءَ توار چِست کُت، بلے زالمیں ریاست ءَ مئے گپ گوش نہ داشت ءُ مئے سر ءَ بیڑ بُرت ءُ لٹّ شاپی کُت۔ پَد ءَ لھتیں روچ ءَ پد کیچ ءِ ھند اوورسیز ءَ یک زالبولے آوار جَنگ ءُ بیگواہ کنگ بوت کہ آئی ءِ پجّار روبینہ ء مھب اللّٰہ نام ءَ بوت، بلے آ لھتیں ادار ءَ پد آجو بوت۔
ھمے وڑ ءَ رند ءَ ھالے آتک کہ سیول سوسائٹی ءِ کنوینر گلزار دوست آوار جَنگ ءُ بیگواہ کنگ بوتگ کہ آئی ءِ گناہ ھمیش اِنت گار ءُ بیگواھیں برات ءُ گْوھارانی واستا توار ئِے چِست کُتگ ءُ راست ءَ را راست گْوشتگ ءُ ٹاپار جَنگ ءَ را ھراب گْوشتگ بس میار ھمیش اِنت۔
وتی پِس ءَ شوھاز کنگ لوٹاں:
لھتیں روچ ءَ پد پنجگور ءَ یکے پُٹبالرے آوار جَنگ ءُ بیگواہ کنگ ءَ پد آئی ءِ تیر سُپتگیں جون دُور اِش دات، بس آئی ءِ گناہ ھمیش اَت کہ کسانی ءَ وانگ ءِ وھد ءَ وتی گار ءُ بیگواھیں پِس ءِ شوھاز ءَ برے گوادر ، تربت ، پنجگور تاں اسلام آباد ءَ در کپتگ۔ گوں وتی کسانسالیں گْوھار ءِ ھمراھی ءَ ھر چارراہ ءُ روڑانی سر ءَ زگریں روچ ءِ سر ءَ نشتگ اِت اَنت
#Release_Zaheer_Baloch ءِ پوسٹرے دست ءَ اَت
بائد اِنت ما وتی بارو ءَ ودار ءَ مہ کن اِیں، انوں پہ درستاں توار چِست بہ کن اِیں۔ انوگیں دور ءَ اگاں یک چُکّے گار ءُ بیگواھیں برات ءُ گْوھارانی واستا توار چِست کنت، ماس ءُ پِس گْوش اَنت گُنگ ببو ءُ ھچ مہ گْوش کہ تو گار ءُ بیگواہ کنگ بہ ئے۔ اگاں مرچی ما توار چِست نہ کُت باندا ما ھم گار ءُ بیگواہ کنگ بہ اِیں یا تیر سُپتگیں جون لوگ ءِ مردماں سوگات کنگ بیت۔
یک جاگھے ءَ بلوچی زُبان ءِ نامداریں گُشندہ واجہ مِنھاج مکتار شائرے ءِ شَیر ءَ الھان کنت ءُ گْوش اِیت
” گپ کن ئے شَر گُنگ ءِ ءِ بہ ئے شَر واجہ ءِ تِیراں ور ئے“
راست گْوش اِیت، گُڑا مارا گُنگ بوگی نہ اِنت۔ وتی گار ءُ بیگواھیں برات ءُ گْوھارانی واستا توار چِست بہ کن ایں دانکہ مارا تیر سُپتگیں جون سوگات کنگ مہ بنت۔
