تو واتر نہ بہ ئِے

نبشتہ کار: زُھرہ دشتی

بیا مھروانیں ھمبلو! تو سرپدے اَچ تو پد درد ءُ رنجاں چو نوک سوریں بانور ءَ زِرد سمھینتگ ءُ پہ مُجتی واب کپتگ۔ اَچ تو پد زندمان ءِ ھمُک زیبداریں کور ءُ کھچر ھورک ءُ ھالیگ اَنت، زندمان ءِ رولہ ءَ ھچ براہ نیست۔ اَچ تو پد ھر شکل ءُ شھد زگر ءُ بے تام اِنت، بلے جاوید تو زان ئِے کِہ ھرچیز وتی وھد ءَ روت ءُ واتر بیت۔

تاکریچیں نوبت پد ءَ ھُشک ءُ سوتکالیں درچکانی سر ءَ سبزکیں تاک جن اَنت، ھُشک ءُ بال گپتگیں کور ءُ کانیگانی پُلک ھم پہ نھنگیں کوری ھار ءَ دلمانگ اَنت۔ ابیتکیں بیگاہ ءُ رولہ ءِ بے چاڑیں ایوکی ھم شپ ءِ ودار ءَ تھاروکی یے کُٹ ءَ واب کپ اِیت، شپ ھم وتی سْیاھیں چادر ءَ گور بام ءِ ودار ءَ پیچ اِیت، زر ءِ بوجیگ ھم چولانی میار بیت ءُ وتی منزلءَ واتر بیت۔ جنوزامیں ھانُلے ءِ دل اُوں ھُلّ کنت، پہ سُھریں پوشاکے ءَ ءُ شے مریدی واھگے ءَ جنگے ءِ نیمون بیت۔

سربتگیں شِپانک گوں رمگ ءَ واتر کنت ءُ کئیت۔ بلّی ماسگے بند اِیت، ماتے پہ تاسُکیں بچّی ءِ آھگ ءَ وشیں مستاگے ءِ ودار ءَ پد ءَ ورناھے سنگر ءَ گیپت ءُ لگورانی دیم ءَ مھکمیں ھسارے بیت ءُ پد ءَ ملپداں تئی جنگانی کسہ نبشتہ بنت۔ تئی گیر ءُ مولُماں گوں وابیں جبین تْراس گِر اَنت، تھاریں آزمان ھم پہ ماھکانی ءِ ودار ءَ اوشتاتگ ءُ ابیتکیں ماہ ھم پہ وتی سمھینگ ءَ اِستال شوھاز اِیت۔ شائر ءُ نبشتہ کار پد ءَ ھمُک کارست ءِ کرد ءَ نازین اَنت، تو زان ئے کہ بازیں تئی دْروشمیں ورنا پد ءَ پہ جنگ ءَ کوہ ءَ رو اَنت۔ گیمُرتگ ءُ ٹپّی ئیں ارواہ، زدگ بوتگیں زِرد پد ءَ پہ نوکیں واھگے مرادیگ بہ اَنت۔

زھر ءُ کُچلیں ملکموت ھم پد ءَ کئیت پہ ارواہ ءِ امبازگ ءَ، پد ءَ بشی نود ءُ جمبرے ساچان بیت۔ ھور ءِ ترونگل ءُ تراولیں ترمپ ھُشک ءُ ڈُکالیں سالاں کِشار رودین اَنت، ماھکانیں شپے بیت ءُ ھما زمستانی شپ کہ گوریچ شیک شیک کنت ءُ سرجمیں میتگ گُنگ بیت ءُ جھان انسریت، تھنا یک کُڈکے ءَ پیریں پِت ءُ اَجِزیں ماتے وتی چُک ءِ ودار ءَ کنگ ءَ بنت۔

ھو! ھر چیز وتی باریگ ءِ روگ ءُ آیگ ءِ وداریگ اِنت، بلے تو واکی چو تبد ءُ لِواریں۔۔۔۔۔۔۔۔۔، سارتُکیں سمین ءَ بدل بہ ئِے ءُ پد ءَ واتر کا ئِے، اِنّا! تو واتر نہ بہ ئِے۔ من زاناں تو واتر نہ بہ ئِے، بلے ھر چیز پد ءَ واتر بوگ ءَ ساجو اِنت۔ تو چی ءَ پہ دلجمی رپتگ ئِے، تو بلکیں جیڑگ ءَ بہ بہ ئِے کہ اَچ  تو پد  من نزور بوتگ آں؟ اَچ تو پد تئی کِشک ءُ تئی جُھد ءَ چہ سرجم ءَ شموشکار بوتگ آں ءُ تھنا تئی رنجاں گوں سربتگیں ملنگے بوتگ آں؟ بلے چوش نہ اِنت، زندمان ءِ ھمُک چکاس ءَ من ءَ مھکمیں ھسارے کُتگ۔

 جاوید جان! اَچ  تو پد  زند بے کساس بے مول ءُ بے مانا اِنت، بلے دُژمن ھم وتی پروش دیوکیں جُھد کاراں گچین کنت ءُ آھانی کُنٹ ءَ اچ مارا پُلیت، بلے آھانی کِرد ءَ لگور پچ گِپت نہ کنت۔ آھانی کِرد ھمُک جنگ ءِ پِڑ ءَ دیوان ءُ مچّیانی تہ ءَ پیلو کنگ بنت، آھانی کِرد ءِ کسہ ھمُک ملپد ءُ زیداں ءُ سْیائجی ءُ مزنبند ءِ کوھانی دلبند ءَ نکش بنت ءُ ھزار ورنا ءَ جنگ ءِ نیمون ءَ ھُدوک کن اَنت ءُ تئی دابیں بازیں کردانی واھُند منی دابیں نزانتکاراں نِبیسَگ ءِ شون ءَ دے اَنت، بلے پژن ءِ گپ پد ءَ ھما پش کپ اِیت کہ تھنا تو واتر نہ بہ ئِے، تھنا تو واتر نہ بہ ئِے۔۔۔۔۔۔۔