نبشتہ کار: کوھی بلوچ
بلوچ ءَ کہ وتی چم بچ کُتگ اَنت گُڑا گار ءُ بیگواھی یا آئی ءِ زانگولیں جون ماں گیابان ءَ چگل دیگ بوتگ۔ مرچی بلوچ ءِ چُکچینی ءُ دُگنیا ءِ کَری ءُ گُنگی ھَردو برجاہ اَنت، یک نیمَگے ءَ بلوچ بچ ءُ جنکانی گار ءُ بیگواھی ءُ دومی نیمگ ءَ تیرسُپتگیں جونانی سَوگات۔ بلوچ ءِ بچ ءُ جنک وھدے کہ وتی چماں پچ کن اَنت گُڑا آئی ءِ گوشاں بانگ ( وھدے یک چُک ءِ پیداک بیت گُڑا بازیں جاھاں آئی ءِ گوشاں بانگ دے اَنت) ءِ بدل تیرانی توار بیت، آئی ءَ را چمانی پچی ءَ اُوں نیل اَنت، اگاں مزن بیت ”بلوچ“ ءِ نام ءَ کہ زانگ بِندات کنت گُڑا آئی ءَ را بلوچ ءِ نام ءِ سر ءَ گار ءُ بیگواھی یا آئی ءِ تیرسُپتگیں جون چگل دیگ بیت۔
اے مَرچیگیں ھبرے نہ اِنت کہ بلوچ ءِ بچ گار ءُ بیگواہ کنگ بوگ ءَ اَنت یا آئی ءِ جون چگل دیگ بوگ ءَ اَنت، بلوچ ءَ کہ وتی چم پچ کُرتگ اَنت اے زلم ءُ زوراکی آئی ءَ دیستگ اَنت۔ مرچی نہ ایوک ءَ بلوچستان ءِ تہ ءَ بلوچ گار ءُ بیگواہ کنگ بوگ ءَ اَنت، بلکیں کُجام جاہ ءَ کہ بلوچ ساہ دیگ ءَ اِنت گُڑا اے زُلم ءُ زوراکی الم ترا گِندگ ءَ کئیت اِنت۔ مرچی بلوچ مات وتی چُکاں نہ شریں وانَگجاھے ءَ پہ وانگ ءَ دیم دات کنت ءُ ناں کہ پہ کار ءُ روزگارے ءَ۔
ریاست ءِ اے پندل انگت برجاہ اِنت، چی ءَ کہ ریاست بلوچ راج ءَ را گُلام کنگ لوٹ اِیت۔ آئی مال ءُ مڈّیاں لُٹ پُل کنگ لوٹ اِیت، آئی زُبان ءَ گار کنگ لوٹ اِیت، آئی راجی پَجّار ءَ گار کنگ لوٹ اِیت ءُ بلوچ راج ءَ را دائمی وتی گُلام کنگ لوٹ اِیت، بلے ریاست ءَ را اے زانگ لوٹ ایت کہ یک زندگیں راجے بھ گُلام نہ بیت۔ گُلام ھما راج بیت کہ آئی ءَ را راجدپتر نیست،، آئی ءَ زُبان، زمین ءُ دود ءُ ربیدگ نیست، بلے بلوچ راج ءَ اے دُرس ھست اَنت ءُ بلوچ راج تئی اے زوراکیاں نہ منّ اِیت۔ بلوچ ءِ بچ ءُ جنک مرچی سرپد اَنت کہ من ءَ گوں زوراک ءَ مِڑگ لوٹ اِیت۔
زروگِریں ریاست ءَ را اے ھبر بِھ بیھال کنگی نہ اِنت کہ بلوچ ءَ وتی سر داتگ بلے وتن نہ داتگ، گُڑا اے ھما بلوچ اِنت۔ اگاں تو بلوچ ءَ زانگ لوٹ ئے، گُڑا ترا یک برے بلوچ راجدپتر وانگی اِنت کہ بلوچ کے اِنت۔ بلوچ ءِ رَھشون ترا زانگی اَنت، بلوچ ءِ تب ترا زانگ لوٹ ایت ءُ بلوچ ءِ ھما ورنا ترا زانگی اَنت کہ آھاں پہ وتی سرڈگار ءِ رکّینگ ءَ، پہ وتی راج ءِ رکّینگ ءَ، پہ وتی راجی پَجّار ءِ رکّینگ ءَ، پہ وتی زُبان ءِ رکّینگ ءَ، ءُ پہ وتی آیوکیں باندات ءِ رکّینگ ءَ چینچو کُربانی داتگ ءُ انگت دیگ ءَ اِنت۔ بِہ گندے تو بلوچ ءَ گار ءُ بیگواہ کُت کن ئے، آئی کُشت کُت کن ئے، بلے آئی ءِ نام ءُ توار ءَ تو ھِجبَر گار کُت نہ کن ئے۔ اگاں تو اے ھبر وتی مجگ ءَ نِندارنتگ کہ من بلوچ ءَ گار ءُ بیگواہ کناں یا آئی کُشاں پدا مال ءُ مِلتکاں براں، گُڑا اے تئی ھُشکیں وابے کہ آ ھِجبَر مانا نہ بیت۔
اے راست اِنت کہ مرچی دگ ءُ چارراھانی سر ءَ لھتیں اَکس ایر یا دیوالانی دیم ءَ دْرنجوک اَنت کہ ھبر کنگ ءَ نہ اَنت، بلے اے اَکس یکے ءِ برات اِنت، یکے ءِ گْوھار اِنت، یکے ءِ آریپیں پِت اِنت ءُ یکے ءِ مات اِنت۔ ریاست اے ھبر ءَ بھ بیھال مہ کنت کہ اے اَکس بے توار اَنت، ھبر نہ کن اَنت یا اے اَکسانی کسّہ چہ اِد ءَ ھلاس بیت۔ اے اَکسانی کسّہ بِندات چہ ھمد ءَ بُنگیج بیت کہ اے اَکسانی وارِس انگت زِندگ اَنت، اے اَکس ایوک ءَ اکس نہ اَنت، بلکیں ماتانی سالونکیں بچ اَنت، گْوھارانی ارواہ اَنت، آریپیں پِتانی چمانی چِراگ اَنت، براتانی کوپگ ءُ لاڑیں گْوھار اَنت۔
اگاں اے کسّہ ھلاس بیت گُڑا گوں آجوئی ءِ بام ءِ ٹِکّ دیگ ءَ، اگاں نہ پہ ھلو ھالو تئی دْروھاپیں واب کدی مانا نہ بیت۔
