نبشتہ کار: ازیز سنگھور
رجانکار: بانڑی بلوچ
بلوچستان ءَ سک دیر اِنت کہ ورنایانی تنگ کنگ، آیانی توار ءِ گوں توپک ءِ نل ءَ دارگ ءُ آیانی پجّار ءِ ھلاس کنگ سرکار ءِ شوندات ءِ بھر اِنت۔ پَنجگُور ءَ ورنائیں زیشان زھیر ءِ درکانودی کوش ھم ھمے زوراکیانی درچ ءِ نوکتریں کڑی یے ءُ اے زوراکی ءِ بگیری ءَ کراچی ءِ ھند لیاری ءَ بوتگیں زھرشانی نہ تھنا رنج ءُ دردانی درشان کنگ اِنت، بلکیں بلوچانی گھگیری ارواہ ءِ یک نوکیں جلکشے۔
بلوچ یکجھتی کمیٹی ءِ نیمگ ءَ بیتگیں اے پر اِیمنیں زھرشانی روانک ءِ سر ءَ سرکاری ادارھانی نیمگ ءَ ناھکّیں بیڑ ھمے گپّ ءِ تچکیں درور (مسال) اِنت کہ مئے شھری ھک، گپ ءِ آجوئی ءُ پر اِیمنیں زھرشانی ءِ ھک تھنا کتابانی تہ ءَ نبشتہ اِنت۔ چہ لیاری ءِ ھشت راہ ءَ داں چاکیواڑہ ءَ پر اِیمنیں زھرشانی کنوکانی سر ءَ پولیس ءَ تھنا لٹّ ءُ کُٹّ نہ کرتگ بلکیں بانک آمنہ بلوچ ءَ ھوار ھشت کارکن دزگیر کنگ ءَ پد زندان ءَ برتگ۔
آمنہ بلوچ، بلوچ یکجھتی کمیٹی کراچی ءِ بنیادی آرگنائزر بوتگ، آئی ءَ گْرانیں جاورانی تہ ءَ گل مھکم کرتگ ءُ توار یک لیکھے داتگ ءُ بلوچ ورنا گوں زانشت ءِ توان ءَ ھوار کرتگ اَنت۔ ھما توار کہ پہ زور بیگواھیں مردمانی آجوئی ءَ برز بوتگ اَنت۔
اے اولی رند نہ اِنت کہ بلوچ ءِ گھگیری ءِ گوں زور ءَ بے توار کنگ ءِ جھد کنگ بوتگ۔ جست ھمیش اِنت کہ اے توار زندانانی تہ ءَ بند کنگ بنت؟ چے مھرنگ، بیبو، گلزادی یا شاہ جی ءِ توار بندیگ اِنت؟ ھچ وڑ ءَ ناں! بلکیں اے توار ھنچو چیر ترّینگ بہ بنت گڑا ھمنچو بُرز بنت۔
گڑا زیشان زھیر ءِ کوش ءِ بگیری ءَ زھرشانی کنگ کجام میار ءَ چوں آرگ بوت؟ چے پہ چونیں ورنایے ءَ انساپ لوٹگ میڑے؟ اگاں ھو پد ءَ ھمک نزوریں توار، ھمک ماس، ھمک گْوھار، ھمک کارکن باگی اِنت۔ گڑا اے جنگ ءَ وت ءَ ھمک گس ءَ سر کرتگ۔
بانک آمنہ تھنا یک سْیاسی کارکنے نہ اِنت، آ نزوریں ماسانی اُوست اِنت۔ بیگواھیں مردمانی توار اِنت ءُ اے پدریچ ءِ جھگیر اِنت کہ زاتی تاوان ءَ ابید ھواریں جھد ءَ پرکار اِنت۔ آئی دزگیری یک چیدگی ویلے۔ یک جنینے آئی نہ توپک ھست ءُ نہ زور، یک پوسٹر ءُ یک اوگامے گون اِنت۔ آئی گوں سرکاری زور ءَ بے توار کنگ ءِ جھد وت سرکار ءِ نزوری ءَ پدّر کنت۔
اے راستے کہ زیشان زھیر ءِ وڑیں ورنایانی ھون زوال نہ بنت ءُ اے ھم راست اِنت کہ بانک آمنہ ءِ وڑیں مردم الّم زندانی کنگ بنت، بلے آیانی لیکہ ءُ جھد ءَ چونیں ھم زورے گوں زمزیلاں بست نہ کنت۔
اے اولی رند نہ اِنت کہ سند پولیس ءَ بانک آمنہ ءِ سر ءَ دست جست کرتگ۔ سند اسمبلی ءِ دیم ءَ وھدیکہ پہ بیگواھیں مردمانی آجوئی ءَ جنین، نودربر، کماش ءُ زھگ زھرشانی کنگ ءَ اِت اَنت گڑا آمنہ بلوچ گوں سمّی دین بلوچ، کامریڈ نگمہ، ھزاران رھیم ءُ دگہ درزنانی کچ ءَ مردمانی گون ءَ دزگیر کنگ بیت۔ گڑا اے زھرشانی کنوکانی میار چے اَت؟ تھنا ھمیش اَت کہ آ چہ سرکار ءَ جست کنگ ءَ اِت اَنت کہ مئے آزیز کُج ءَ اَنت؟
پد ءَ کراچی پریس کلب ءِ دیم ءَ بیتگیں زھرشانی ءَ آمنہ بلوچ ترسناک لیکگ بوتگ۔ پہ توارانی دارگ ءِ جھد ءَ تھنا لٹ ءُ کٹ کنگ نہ بوتگ اَنت، چہ دزگیریاں ترس ودی کنگ بوتگ۔ بلے آمنہ بلوچ نہ ترس اِیت ءُ دم نہ بارت۔
گوں آئی جھد ءَ مدام یک شرپمندیں سنگتے اوشتوک بوتگ لالا وھاب بلوچ اِنت۔ ھما لالا کہ آمنہ ءِ گون ءَ ھمگام بوتگ ءُ اتکگ ءُ مرچی ھم گون اِنت۔ ھما کامریڈ نگمہ کہ مرچی برتانیہ ءَ نشتگ، بلے آئی لیکھی ءُ گل ءِ ھمگرنچی داں مرچی ھم زندگ اِنت۔ نگمہ ءُ آمنہ تھنا دو کامریڈ نہ اَنت بلوچ ءِ جنکانی اے کاروان ءِ جھگیر اَنت کہ زوراکیانی بگیری ءَ بھادری ءِ چیدگ بوتگ اَنت۔
آمنہ بلوچ ءِ دزگیری انچائیں ویلے نہ اِنت اے یک منسوبہ بندیں پالیسی یے ءِ بھر اِنت آئی مول پُر اِیمنیں زھرشانیانی میارے لیکگ ءُ پیش دارگ اِنت۔ اے دزگیری راستی ءَ ھما مارشت ءِ بندیگ کنگ اِنت کہ بلوچ ورنایاں باسما، ھم سنتی ءُ لیکہ ءَ ھیل دنت۔
